以賽亞書 14章1節 到 14章23節   背景資料  上一筆  下一筆
Chit章是teh描述bat輝煌一時ê巴比倫帝國,teh-beh面臨上帝ê懲罰而滅亡。Chit對上帝ê子民以色列來講,是一個真好ê契機,in會重新得tio̍h上帝ê拯救,成做上帝所歡喜ê子民,而且會興旺盛起來,hō͘ hiah-ê過去bat俘虜in ê敵國,反而成為in ê奴婢,服侍in。

Chit段經文描述上帝kā ài如何毀滅巴比倫chit-ê龐(pâng)大ê帝國。當巴比倫ê領導者teh誇耀家己ê才能,而且家己認為比所有神明iáu koh khah偉大,甚至想beh kah上帝比高低ê時,上帝會tùi天頂落來毀滅chit種狂傲ê君王kah國家、人民、換句話講,無論jōa-ni̍h-á偉大ê君王,á是國家、民族,tī chit世間lóng是仝款,lóng會有死亡毀滅ê時chūn。

第1到2節,短短兩節,先知以賽亞講強大ê巴比倫teh beh被摧毀,而上帝ê子民以色列kā重頭tńg來上帝ê懷抱。開始就講上帝beh「koh再」對以色列人民顯示祂ê慈愛。chit-má beh hō͘ in重回故土,tī家己ê「土地頂面定居」,而且iáu有「真chē異族tio̍h kah in tòa做伙」。上帝會賜hō͘以色列民族全新ê榮耀,ná親像當年大衛王朝ê時仝款興盛,其他ê國家、族群lóng來歸順。

第3節,thang參考第四十章1到2節。上帝認為以色列人民ê懲罰已經有夠,時間mā到à。因為án-ne,tio̍h除去in ê「悲傷kah痛苦」,無人會koh再奴役in。

第4到8節,chia講殘暴ê統治者kan-taⁿ會「奴役人民,不斷來迫害被征服者ê國家」。Taⁿ上帝出手救助chiah-ê被奴役ê人,mā就是phah倒chiah-ê奴役別人ê國家、君王。這說明一個中心思想:上帝chiah是歷史ê主宰,m̄是任何君王á是統治者ē-tàng主宰世界。上帝beh重建一個全新ê世界,是「寧靜kah和平;人人歡樂歌唱」ê生活社會,chit-ê全新ê世界,是無戰爭、無暴虐ê。Án-ne,人民chiah ē-tàng享受安kah樂利ê生活(參考以賽亞二:4)。

第9到11節chit段經文真清楚指出,任何一個世人看做偉大ê君王,lóng會死亡。無永遠bē死ê君王(參考詩篇第四十九篇、八十九:48,傳道書八:8)。即使被世人看做是siōng偉大ê君王,mā是仝款,死ê時chūn lóng會先下「陰間」等待審判。

值得注意ê是chia描述過去在世間非常顯赫ê統治者,tī陰間ê居所反tńg是ná親像乞丐ê床鋪仝款。In過去在世間有人ta̍k工為in歌功頌德,m̄-koh tī陰間卻m̄是án-ne;in ê境遇是連想beh有一個清氣ê床鋪mā無可能。In ê「被窩是蛆」,m̄-nā表示會發生惡臭,而且是有bē死ê蟲teh咬(參考馬可福音九:48),絕對是痛苦難耐。因為in bat用殘酷ê手段對待hō͘ in奴役ê人民。

第12到15節,chit段經文真清楚指出巴比倫王會án-ne有悲慘ê結局,就是伊對敵上帝,而且想beh取代上帝。Chia講出巴比倫王原本像一粒「明亮ê晨星」,因為上帝呼召伊為奴僕(參考耶利米書廿五:8)。M̄-koh伊tī上帝幫助下得勝了後,就開始驕傲、敗壞,結果連伊所統治ê帝國mā tòe滅亡。滅亡ê主要原因是巴比倫王自認為是神明,甚至想beh kah上帝比高低,伊bē記得家己只不過是一個人而已。先知以賽亞tī chia真清楚指出,án-ne驕傲ê君王就是kā家己推向死亡ê「陰間」、「深淵」裡,無任何人thang救伊起來。

第16到17節,重述第9到11節所講ê。巴比倫帝國bat hō͘世間ê國家震撼、驚惶不安,是世間siōng顯赫ê國家。Á巴比倫王koh khah是被尊崇siōng偉大ê君王。M̄-koh taⁿ完全無仝款了,因為伊mā難逃死亡ê來到。

第18到20節,第18到19節是相對句型。Chia指出即使siōng弱小國家ê君王,死後所埋葬ê墳墓lóng tio̍h比巴比倫王ê iáu koh khah好,因為巴比倫王最後是連墳墓mā無。意思是伊kā死無葬身之地,因為伊mā bat án-ne對待hō͘伊征服ê人民。Tī古代社會,認為這是一個人siōng悲慘ê結局。

第21節,tī摩西ê律法中真清楚規定,bē-tàng kā頂一代ê罪責hō͘下一代來承擔(參考申命記廿四:16),每一個人tio̍h負擔家己所犯ê罪責。先知耶利米mā提出仝款ê看法(參考耶利米書三十一:30—31)。M̄-koh實際ê社會生活經驗卻m̄是án-ne。頂一代ê罪過,往往會延續到下一代去承受。

第22到23節,chit兩節講出上帝懲罰巴比倫帝國ê結果,是hō͘巴比倫帝國永遠bē重現。因為上帝決定kā伊完全剷除。

重新查詢 專卷研經 以賽亞書系列
錯誤回報,請聯繫comm[@]fhl.net