以賽亞書 14章24節 到 14章32節   背景資料  上一筆  下一筆
有kóa聖經學者認為chit段經文應該kah第十章編輯做伙,主要內容是上帝透過先知以賽亞對亞述國講ê預言,kā in講teh beh受tio̍h上帝嚴厲ê制裁。

Chit段經文mā thang分做兩個段落來看:

一是第24到27節,是預言有關亞述帝國毀滅ê情形。Chit段經文ê背景真可能是發生tī主前701年,當時亞述皇帝西拿基立帶領將近二十萬大軍攻打耶路撒冷無成功,最後家己iáu死tī兩個kiáⁿ ê手中(參考以賽亞書三十七:36—38)。因為án-ne,若是tùi猶大國kah耶路撒冷ê人民來看,chit段經文ê預言是完全實現了。M̄-koh m̄是teh描述主前612年亞述帝國被巴比倫帝國消滅ê背景。

二是第28到32節,chit段經文非常珍貴ê所在,就是提供了一個年代背景—亞哈斯王往生ê hit年,這大約是tī主前718到715年左右ê時代。Chit段經文ê內容真類似現代人常用ê警語:m̄-thang幸災樂禍,而是beh tùi別人ê災難得tio̍h警誡,來學習自我儆醒。Chit段經文mā thang參考耶利米書第四十七章;以西結書第廿五章15到17節;阿摩司書第一章6到8節;西番雅書第二章4到7節等等先知ê文獻中,lóng有提起類似對非利士人ê警語。

第24節,上帝「chiù-chōa」,類似chit種用詞tī舊約聖經中非常chē,lóng是teh表明上帝指祂ê「聖名chiù-chōa」,意思表示祂所「計畫」ê一切「一定實現」。

第25節,chit節講上帝應允hō͘以色列人民得tio̍h自由,無koh hō͘亞述人khiā起tī以色列人民ê土地頂面,意思就是beh消滅亞述chit-ê國家。

第26節,chit節講出上帝對kui個世界有管理ê主權。亞述帝國只不過是一個例,所有世界各國lóng仝款,只要是違背上帝ê揀選目的,結果必定引來上帝ê「伸手攻擊」。

第27節,chit節回應第24節所講ê。

第28節,「亞哈斯王死ê hit年」,大約是tī主前718年。

第29到30節,chit兩節ê背景真可能是teh指亞述皇帝撒縵以色五世往生,非利士人拍手慶祝叫好,講打擊in ê「棍子已經at斷了」。M̄-koh非利士人忽略繼承王位ê人比前一個國王撒縵以色五世koh khah殘酷,chit-ê繼承者就是撒珥根二世。Chia預言非利士人會遇tio̍h報復ê時,m̄-koh相對ê,上帝卻對猶大人民傳送好ê信息。Chia講「上主beh做窮困人ê牧者」,chia所指ê「窮困人」就是猶大ê以色列人民。上帝會親像好牧者仝款庇護以色列人民,而失去上帝看顧ê非利士人會tú-tio̍h koh khah殘酷ê對待。因為in kā tú-tio̍h亞述帝國ê侵犯,m̄-nā土地飽受戰爭ê摧殘,人民ê性命mā受tio̍h嚴重ê蹂躪,飽受痛苦來死去。

第31節,chit節指亞述帝國龐(pâng)大ê軍隊,所到ê所在勢如破竹,南下攻擊kui個巴勒斯坦地區,而受摧殘siōng嚴重ê kā是非利士人。

第32節,koh一pái提起ê非利士人會受tio̍h災難一定tio̍h對外求救,m̄-koh猶大卻tī上帝ê庇護之下,ē-tàng安然無恙。

重新查詢 專卷研經 以賽亞書系列
錯誤回報,請聯繫comm[@]fhl.net