以賽亞書 13章1節 到 13章22節   背景資料  上一筆  下一筆
Tùi第十三章開始,一直到第廿三章等篇幅,lóng是論到有關上帝ài怎樣對付chiah-ê強猛ê帝國,以及hō͘其他族群ê信息。Tī chit段篇幅中,真類似耶利米書第四十六到五十一章;以西結書第廿五到三十二章,以及阿摩司書第一到二章等,內容lóng是論到上帝對付列強列國ê預言。Tī頂面所講chiah-ê文獻中,以賽亞書ê篇幅是siōng長,共計有十一章,而且內容siōng詳細。

Tùi第十三章第1節開始,一直到第十四章23節止,lóng是論到有關巴比倫帝國ê事,mā明白指出該帝國會滅亡。M̄-koh有kóa學者認為chit段經文m̄是先知以賽亞ê作品,á是講,chiah-ê作品原本應該是teh指tio̍h亞述帝國講ê,因為in認為chia所講ê巴比倫乃是指tī亞述帝國統治之下ê巴比倫,因為án-ne,chia所講ê巴比倫會滅亡,乃是指亞述帝國會滅亡ê意思。因為巴比倫是亞述帝國統治之下ê siōng重要城市。不過chit種論調,mā引起bē少爭議。

第1到3節,chia講上帝ài先知以賽亞去傳達信息hō͘巴比倫。Chit-ê信息就是上帝beh懲罰巴比倫,ná親像過去巴比倫ê軍隊「豎起作戰ê軍旗」,teh攻擊其它國家仝款。Tio̍h準備攻擊巴比倫ê軍隊lóng是經過上帝挑選出來ê「勇士」,chiah-ê軍士kah一般ê戰士無仝。因為in所beh phah ê是「神聖ê仗」,表示這是一場是奉上帝ê旨意而出兵ê聖戰。

第4到5節,上帝所集合ê軍隊正蓄勢待發,只要上帝手中ê旗幟揮動,chiah-ê被徵召來討伐巴比倫ê聯軍,就會出動。Chia講上帝調動ê軍兵chē到數以萬計,勢力非常龐(pâng)大,ná親像「萬民發出ê吼叫」一般,會hō͘敵人一聽就心生懍neh。Chiah-ê軍隊是自「地ê另外一端」kah「tùi遙遠ê國家過來」。

第6到10節,「上主ê日子到à」,tī第9節koh一pái出現。Ná親像第二章11節、17節、20節所提起ê。Chia真清楚表示上帝決定討伐ê時間絕對bē改變。Chia koh再描述上帝懲罰ê方式就是「施行毀滅」ê動作,只要是上帝ê懲罰一到,只有毀滅一途,除非有上帝ê恩典,chiah有生存落來ê機會。每一個受懲罰ê對象「手股頭lóng麻痺」,而且「勇氣lóng消失」,是因為上帝親自帶軍隊來懲罰,大家一聽是上帝ê軍隊,就只有ē-tàng投降,m̄敢對抗了。Mā像「像產婦臨盆」ê「陣痛」,即使想beh逃脫lóng無法度動彈,只有ē-tàng Tī痛苦中「面面相覷」,因為tī「上主ê日子來到」ê時刻,會看見ê景象是「全地tio̍h成做荒野」,mā tùi「全地」Chit-ê詞來看,就ē-tàng知影人犯罪ê情形非常嚴重。M̄-nā是大地變成荒野,連天頂ê星辰mā lóng為tio̍h án-ne變色,因為上帝ê懲罰非常嚴厲。當星辰、月娘、日頭lóng無koh發出亮光ê時,ná親像tńg來復到本來創造chìn前ê款,烏暗到看bē-tio̍h任何亮光,世界成做「一片烏暗」ê深淵(參考創世記一:2)。

第11到13節,chia「責罰」、「終止」、「貶低」等用詞,kah「邪惡」、「驕傲」、「殘忍自大」等詞相對照,前者用詞表示上帝發大受氣ê動作,後者用來表示上帝發大受氣ê對象。Soah ē-tàng承受上帝嚴厲「試煉」過,合格通過ê人,確實是非常ê少。當上帝出手懲罰ê時,大家lóng會感受tio̍h「天戰慄」、「地搖動」tùi chia ē-tàng想像會tio̍h,人會驚惶到khiā立不住。
第14到16節,chit段經文講出當上帝出手嚴厲懲罰ê時,邪惡ê人驚惶四界竄逃,想beh躲避上帝ê忿怒。M̄-koh無任何一個所在是thang當做庇護所。因為上帝是無所不在ê主宰(參考詩篇一三九:7—8)。而且是只要上帝出手打擊,任何人lóng kā無一佳哉免得。而且siōng-kài悲慘koh hō͘人怵目驚心ê景象,就是「嬰á」被當眾phut死,「bó͘受玷污」。

其實chiah-ê lóng tī說明過去巴比倫怎樣對待附近國家,taⁿ in mā會面臨仝款ê報復。這tú好講出耶穌ê教導提起,tio̍h別人怎樣待咱,咱就該怎樣對待別人(參考馬太福音七:12)。

第17節,「米底亞人」,這是屬tī波斯帝國ê一支,khiā起tī巴比倫ê東北方,今á日伊朗ê西北部。Á當chit族群來攻擊ê時,並m̄是用錢財ē-tàng買收。因為in心中所beh ê,就是征服對方。

第18到22節,chit段經文講出米底亞人ê冷血性格,in lóng無憐憫ê心。經過in攻擊了後ê所在,無論是甚麼城鎮村落,lóng差不多變成ná親像上帝毀滅「所多瑪kah蛾摩拉」一般,成做廢墟,連放牧ê人mā無koh入來「露營」過瞑。而且in ê手段非常殘酷,甚至對嬰á mā無憐憫之心,koh khah bē對少年人手下留情。巴比倫就是會遭遇chit種結果。

重新查詢 專卷研經 以賽亞書系列
錯誤回報,請聯繫comm[@]fhl.net