何西阿書 5章1節 到 5章15節   背景資料  上一筆  下一筆
一個社會是m̄是敗壞,tùi宗教領袖ê身上就thang看會出來。如果宗教領袖mā會貪婪、自私、欺騙,chit種社會是bē有安寧日子thang過ê。因為宗教工作者乃是一個社會最後ê良知,如果連宗教領袖lóng m̄知道見笑,有貪婪、自私、欺騙ê行為,chit種社會就bē有平安ê日子thang過。

先知何西阿指出ê問題是連祭司mā帶頭犯罪,而且是「人數jú chē就jú大膽得罪上帝」(參考四:7),這是非常嚴重ê事。莫怪tī先知何西阿ê時代,伊是眼睜睜地看tio̍h家己ê國家滅亡,tùi主前750年耶羅波安二世siōng興旺ê時代,一直到主前721年,mā不過是短短30年,就被亞述帝國消滅結束。

Chit章先知何西阿先tùi宗教領袖講起,續落來提起m̄-nā北國以色列出現問題,連南國猶大mā仝款沉淪,棄sak了上帝。最後上帝談起祂ài怎樣懲罰以色列人民。

第1到3節,先知何西阿先tùi指控「祭司」,續落來點名以色列人民,koh來是「皇親國戚」,ài in注意聽上帝beh「審判」in ê聲音。因為in tī暗中所做ê惡質tāi-chì,上帝lóng真清楚知影,絕對bē袖手不管。第3節koh一pái講出何西阿書ê主題—以色列人民對上帝無忠實。先知提醒頂面所講chiah-ê族群,hō͘ in知影上帝「真了解以色列人」,表示上帝非常清楚in teh做甚麼惡質ê事。

「米斯巴」,這是teh指設tī便雅憫之地ê米斯巴,因為它靠近猶大kah以色列ê邊界,mā是北國以色列ê宗教聖地。因為tī chia有先知撒母耳所立ê石頭,為記念上帝拯救以色列人民脫離非利士人ê攻擊(參考撒母耳記上七:7—14)。

「伊泊山」,這是設tī耶斯列平原ê東南方,靠近拿撒勒附近。
「什亭」,這是tī約旦河東岸。以色列人民tī chit所在kah摩押ê cha-bó͘人行淫,而且去參加偶像神明ê崇拜(參考民數記廿五:1—3)。

 先知何西阿用「kho͘-á套」、「網羅」、「陷阱」等chit三項害人ê工具,隱喻頂面所講三個地方。Chit三個地方lóng是當時出名ê所在、繁榮ê區域,taⁿ卻變成人民墮落ê城市。可能是teh指tī經濟繁榮背後,隱藏tio̍h害人á是誘惑人棄sak上帝教示ê烏暗面。

第4節,續落來指出以色列人「m̄-bat上主」。先知以賽亞mā bat提出chit種聲音,說明上帝感覺siōng-kài艱苦心ê事,就是祂ê選民竟然m̄-bat祂(參考以賽亞書一:2—3)。

第5到7節,講出以色列人民「m̄-bat上主」ê原因,就是驕傲。而且m̄-nā是北國以色列人民án-ne,連南國猶大ê以色列人民mā仝款。Chia mā指出in犯罪ê明確事實,就是雖然有獻祭,m̄-koh無用,因為in mā同時獻祭hō͘巴力,就是chia所提起ê,in「對上主不忠」。第7節講tio̍h「私生kiáⁿ」(《台語漢字本》用「偷生kiáⁿ」),這可能有兩個意思,一是:迦南人認為巴力是一個「生產ê神」,以色列人民為tio̍h生gín-á,mā向巴力祈求。結果in得tio̍h gín-á,m̄-koh上帝講chit種kiáⁿ m̄是祂賜福下生ê,因為án-ne kā它稱做「私生kiáⁿ」,上帝bē繼續賜福in。二是:指in既然已經去拜巴力,上帝mā就棄sak in。無koh承認kah以色列人民之間ê關係。因為án-ne,in m̄-nā會失去原有ê「夫妻」關係,連本來siōng基本ê「父子」關係mā無koh存在。上帝m̄承認in是祂ê子民,ná親像第一章9節上帝ài先知何西阿kā伊kah淫亂ê bó͘歌蜜所生ê第三個kiáⁿ號名「羅‧阿米」,表示上帝kah以色列人民切斷了關係。

第8到9節,tùi第8節開始到第七章16節,這是一段新ê段落。Chit兩節就是這新段落主要ê內容。雖然是短短ê兩節經文,卻講出一個重要ê歷史背景:南北兩國戰爭ê問題。北國以色列為tio̍h beh自保,去走chhōe別國ê援助,攻打南國猶大。仝款ê,南國猶大為tio̍h所謂國防安全ê理由,mā走chhōe他國協助防衛,結果是兩國lóng因為án-ne受tio̍h損傷,北國以色列甚至因為án-ne帶來亡國ê厄運。Chit兩節lóng提起作戰ê事,thang參考列王記下第十五到十七章。

第10節,koh一pái提起上帝beh嚴懲猶大ê原因,是in ê領袖「侵佔以色列ê領土」,意思是teh指當亞述舉兵攻打以色列ê時,猶大卻趁機會收復了以前失去ê土地,而且iáu移動了邊界,hō͘以色列tī困境中ná親像雪上加霜仝款,國勢koh khah脆弱。

第11到12節,講以色列kā「被欺壓」,這是teh指亞述會侵犯in,in走chhōe埃及ê援助,結果反遭亞述大舉派兵攻打。果然,tī主前721年,亞述帝國ê軍隊就攻入了北國以色列ê首都撒馬利亞,以色列因為án-ne滅亡。亞述就是用以色列亡國來威脅beh「消滅猶大」。

第13節,chia ê「病」kah「傷」,lóng是teh指外國ê侵犯。南北二國lóng bat tī亞述ê指染下成做附庸國仝款,臣服tī亞述ê統治。Thang參考列王記下第十五章19到20節,是發生tī主前745年到737年之間米the̍h現在位期間。無論北國以色列,á是南國ê猶大,lóng是想走chhōe亞述幫忙,結果lóng因為án-ne付出非常大ê代價,甚至是亡國ê後果。這就是此節所講ê「病jōa-ni̍h-á沉重」、「傷jōa-ni̍h-á嚴重」ê原因,是teh形容kui個國家病入膏肓。意思是走chhōe亞述ê結果kan-taⁿ會帶來koh khah嚴重ê結果。

第14節,以「獅」來譬喻上帝。先知何西阿用獅來形容上帝ê懲罰是親像獅teh吞食phah獵tio̍h ê動物。Chia講上帝beh「親自」出手懲罰in,ná親像獅「拆裂in,kā in拖行,無人ē-tàng救in」。

第15節,是chit章經文中心信息,表明ê是只有tī苦難中反省後chiah會醒悟,走chhōe上帝ê救助是唯一ê生存之道。Mā tùi chit節看出慈愛ê上帝á是期待tio̍h以色列人民tńg來chhōe祂。

「知罪tńg來chhōe我」,這是一句非常重要ê話,說明上帝ê慈愛特性,祂雖然講beh棄sak以色列人民,m̄-koh á是存一絲ǹg望,teh等待in悔改tńg來歸向祂。


重新查詢 專卷研經 何西阿書系列
錯誤回報,請聯繫comm[@]fhl.net