何西阿書 2章14節 到 2章23節   背景資料  上一筆  下一筆
如果tio̍h用一句簡單ê話形容先知文獻ê特色,就是teh指出以色列人民背叛上帝,去拜偶像神明。伊kā上帝kah以色列人民之間ê關係,以「夫妻」ê關係來比並,說明以色列人民ná親像時常紅杏出牆ê淫婦一般,背叛了伊ê丈夫。伊mā指出siōng可惡ê一件事,就是以色列人民去拜偶像神明ê時chūn,iáu the̍h了上帝所賞賜kā in賜福ê各種食物當做獻祭供物去祭拜,甚至講hiah-ê lóng是偶像神明所賞賜ê,chit點明明是令上帝無法度原諒in。即使是án-ne,上帝是慈悲ê,祂有豐富而且堅定ê疼,對悖逆ê以色列人民,祂á是想出所有ê辦法beh阻止以色列人民繼續沉淪落去,希望in ē-tàng醒悟過來歸向創造萬物ê上帝。先知何西阿提醒以色列人民,如果in iáu繼續去拜偶像神明,上帝一定會收tńg來祂賞賜hō͘以色列人民所有ê一切。

現在chit段經文是先知何西阿koh一pái用愛情婚姻ê關係,形容上帝會以siōng koân ê愛情來對待以色列人民,為tio̍h是beh希望以色列人民會知影珍惜。上帝beh kah以色列人民重新立約,雖然祂bat真受氣以色列人民棄sak祂,m̄-koh祂á是iáu-koh teh疼in,想出所有ê辦法beh hō͘ in歸回到祂ê身邊來。Ná親像一個仁慈ê丈夫,對待伊淫亂ê bó͘仝款,會一再呼籲tńg來到伊ê身邊。

第14節,chit節講上帝beh chhōa以色列人民tńg來「到曠野,安慰伊,贏tńg來伊ê心」。「曠野」chit-ê詞可能指ê是以色列人民tī出埃及入曠野ê時代,hit時chūn ē-sái講是以色列人民kah上帝之間是siōng親密ê時段。因為tī曠野甚麼都無,唯一ê óa靠就是全能ê上帝。現在上帝透過先知何西阿對以色列人民講,祂beh帶領in到曠野,就是beh koh一pái hō͘ in學習知影真正性命ê主乃是創造萬物ê耶和華上帝。Chit節ê「帶領」mā是非常重要ê詞,chit-ê詞mā thang當做「鼓勵」、「勸導」、「招呼」、「誘導」ê意思。Chit-ê詞帶有一而koh再、koh再而三ê動作ê意思。

第15節,上帝講「beh kā葡萄園還hō͘伊」,原來是tī曠野之地,無任何ē-thang性命倚賴ê食物,現在卻有葡萄園出現,這是真貴重ê禮物。用tī chia,就表示以色列人民會koh一pái明白:賞賜葡萄園kā in賜福,hō͘ in所栽種ê葡萄樹ē-tàng結實纍纍ê,乃是耶和華上帝,m̄是巴力。

Chia ê「災難谷」,thang參考約書亞記第七章22到26節,意思原本以色列人民因為干犯上帝ê禁令,應該是hō͘嚴厲ê懲罰。M̄-koh現在,上帝不koh án-ne對待in,而是beh hō͘ in ê性命有新ê希望,而且無koh有人因為違背上帝ê旨意受tio̍h連累。

第16節,節提起以色列人民kah上帝ê關係就是「夫妻」ê關係。這就是kui本何西阿書ê中心主題。Chia講出夫妻之間ê關係是無法度分開ê,因為有性命相交纏ê關係,無法度分離。

第17節,就提起tī夫妻關係中,bē-sái有第三個對象介入其中,上帝beh以色列人民「忘掉」巴力。Chit-ê「忘掉」就是「根除」ê意思,連名mā無koh提起。

第18節,chit節thang看tio̍h上帝是怎樣深深teh疼以色列人民。Chia講上帝beh kah kui個受造物立約,包括飛禽、行獸、爬蟲等物,就是為tio̍h beh hō͘所有受造物lóng知影上帝kah以色列人民乃是夫妻關係,bē-tàng傷害以色列人民,因為傷害in,等於是傷害上帝ê「bó͘」仝款ê嚴重。作者用chit種方式teh表明:上帝kah以色列人民之間ê關係是親密到無法度分離ê狀態。Án-ne,上帝kah以色列人民立ê「約」,就含有「安全」、「平安」ê意思。Ná親像chit節所講ê,上帝beh毀滅所有相戰ê武器,祂ê子民m̄免擔心會有戰爭發生。Án-ne類似ê詩歌mā出現tī以賽亞書第二章4節kah彌迦書第四章3到4節。

第19到23節,這是一首非常好ê詩歌,koh一pái表明上帝kah以色列人民之間「夫妻」關係ê情景。上帝m̄-nā是beh娶以色列人民做bó͘,iáu koh khah用下列幾項「禮物」當做聘金;

一、「仁義公平」:這是teh指上帝ê救贖bē有任何偏私。

二、「慈悲無變ê疼」:chia ê「慈悲」一詞是teh指上帝ê引chhōa、保護。「無變ê疼」,指ê是上帝ê憐憫,是關懷in ê需要。這關懷是永恆ê,m̄是暫時性ê。

三、「信實」,指ê是誠實、可靠ê意思。換句話講:以色列人民ná親像嫁hō͘一個誠實、可靠ê丈夫仝款,m̄免擔心會hō͘ hiat-ka̍k、遺棄,á是被出賣等等。

四、上帝會「垂聽」以色列人民ê「祈禱」(tī中文《和合本》用「應允」,意思是仝款ê)。意思是teh指上帝聽以色列人民祈禱後,會有實際行動ê回應kā in賜福,chiah-ê行動有兩項具體ê內容,一是會hō͘土地產出「五穀、葡萄、橄欖」,而且是大豐收。二是koh一pái確認上帝kah以色列人民之間永遠bē分離ê關係。

五、上帝ê應允,就是確認「約」ê關係—上帝就是以色列人民ê上帝;以色列人民乃是上帝ê子民。

重新查詢 專卷研經 何西阿書系列
錯誤回報,請聯繫comm[@]fhl.net