何西阿書 2章1節 到 2章13節   背景資料  上一筆  下一筆
先知文獻中siōng大ê特色是先有譴責,續落來了後就有拯救ê希望。先知何西阿一開始提起上帝beh伊去娶妓女歌蜜做bó͘,伊就順從上帝ê話去娶伊做bó͘。並且後來連續kah bó͘歌蜜生三個kiáⁿ。上帝beh伊kā三個kiáⁿ號ê名來形容祂kah以色列民族之間ê關係,chit三個kiáⁿ ê名是「耶斯列」表示上帝必定會報應;「羅‧露哈瑪」表示上帝無koh憐憫,kah「羅‧阿米」,表示上帝kah以色列民族斷絕了關係等。對先知何西阿來講這確實是真大ê負擔,m̄-koh伊卻順服了上帝ê旨意,何西阿書第二章kah第一章是真無仝款ê文體;第一章是以散文體寫出來,第二章ê內容卻是以詩歌ê形式寫出(《現代中文譯本》並無以詩歌ê方式編輯chit章經文,m̄-koh中文《和合本》kah《台語漢字版本》,以及《呂振中教授版本》則lóng是以詩歌ê文體編輯;m̄-koh天主教《思高聖經學會版本》kah《現代中文譯本》、《台語羅馬拼音版本》仝款)。頭前有講過,先知何西阿kā上帝kah以色列人民之間ê關係,以「夫妻」ê方式表達出來。先知以賽亞、耶利米mā lóng有chit種譬喻(參考以賽亞書五十四:5,耶利米書三十一:32)。因為án-ne,teh解釋何西阿書ê經文內容ê時,tùi「夫妻」關係去看家庭問題,就會koh khah清楚先知何西阿chit本經冊ê內容。

第1節,chit節是teh解釋第一章11節提起ê復合帶來ê性命意義完全改變;原本kah上帝之間ê關係是斷絕ê,現在kā koh一pái復合。復合帶來新ê關係kah意義,兄弟姊妹無koh分開,而且lóng是永遠活ê上帝ê子民。因為上帝已經憐憫了in,kah以前無koh憐憫完全無仝。

Chit段詩歌中ē-tàng看出:當上帝ài先知何西阿娶妓女歌蜜做bó͘ mā生落來了三個kiáⁿ,m̄-koh歌蜜婚後並無檢點,á是kah過去仝款,花枝招展地四界勾引cha-po͘人。因為án-ne,先知何西阿ài伊ê kiáⁿ去「勸告」in ê老母歌蜜。Chia所用ê「哀求」á是「勸」字,tī希伯來文有「控訴」á是「譴責」ê意思。真明顯ê,chit段經文mā講出先知何西阿用丈夫對淫蕩ê bó͘做譬喻,形容上帝對tī以色列人民背叛行為ê審判。

第2節,chit節講先知何西阿ài伊ê 眾kiáⁿ去「哀求」老母,請伊m̄-thang koh再暴露肉體誘惑cha-po͘人。其實歌蜜ê名本身就帶有「廟妓」ê意思,因為án-ne,伊可能就是參與了當時民間宗教祭典ê時,用穿插暴露ê方式勾引cha-po͘人kah伊行淫。

第3節,先知何西阿對kiáⁿ講若是bó͘歌蜜mā就是gín-á ê老母,若á是m̄聽勸勉,伊就準備ài「剝光」bó͘歌蜜身上ê衫褲,hō͘伊「裸露」全身而被眾人侮辱。Chit節經文可能被後來ê先知以西結引用(參考以西結書廿三:10、十六:1—21)。意思是teh指上帝以後be7 koh憐憫以色列人民,beh hō͘ in Tī痛苦中死亡,「像曠野,像沙漠」面臨無食物、飲水ê日子境遇仝款。

第4到5節,chit兩節提起三個問題:一是老母犯罪ê行為已經hō͘ gín-á mā tòe墮落à。當先知何西阿ài伊ê眾細kiáⁿ去勸老母歌蜜,in並無聽從,因為in已經受tio̍h老母ê影響,無認為he是錯誤ê事。因為án-ne chia chiah講「我不疼伊ê kiáⁿ,因為in是淫婦生ê」,意思是in已經認同老母ê行為。二是以色列人民ê觀念是:個人ê行為kah團體之間ê關係是分bē開ê。一個人犯罪,可能會影響tio̍h整體人民ê安全。親像:約書亞記第七章有關亞干犯罪ê事,致使kui個以色列人民受tio̍h懲罰。三是誘惑歌蜜去跟tòe ê,是chiah-ê屬tī物質生活所需要ê物件,包括「食物、飲料、羊毛、衣料、橄欖油,和美酒」等等,chiah-ê lóng kah農產有關。這mā是以色列人民進入迦南地後,siōng快受tio̍h誘惑ê原因—追求物慾上ê滿足。可能kah in過去tī曠野四十年不時tú-tio̍h缺水、食物有關。物質ê慾望真可能hō͘人心受tio̍h迷惑。耶穌基督ê山上寶訓中,就提醒咱m̄-thang為tio̍h食、lim、穿ê事無閒、煩惱。應該先追求ê是上帝國度ê實現(參考馬太福音六:28—34)。

第6到7節,用「刺phè做籬笆堵住伊ê去路」,刺phè是有刺ê草根植物,無小心tú-tio̍h ê時會疼痛。丈夫何西阿用刺phè做圍牆,主要目的是hō͘ bó͘歌蜜一tú-tio̍h圍牆就知影危險、疼痛而醒悟。Ē-sái講是雖然有刺phè當做籬笆,有石頭築起來ê高牆,伊á是想出所有ê辦法beh追逐伊ê「情郎」,結果á是追不上,因為人ê物慾永遠bē滿足。追到倦tah-tah了後,最後chiah想tio̍h beh tńg去過頭來chhōe「前夫」,並且認為「以前ê光景比現在真chē了」。

第8節,chit節回應了第5節所提起淫蕩ê bó͘歌蜜講beh去chhōe情郎,並講tī情郎hia thang得tio̍h「食物、飲料、羊毛、衣料、橄欖油,和美酒」等物。Chit節chia soah講chiah-ê物件lóng m̄是情郎hō͘ ê,卻是丈夫(指上帝)hō͘ ê。Chia指出bó͘歌蜜所有ê chiah-ê生活物件lóng是丈夫何西阿hō͘ ê,連伊身上掛戴ê金銀mā是,m̄-koh淫蕩ê bó͘歌蜜卻kā chiah-ê物件lóng the̍h去獻hō͘她 ê情郎。

第9到13節,Tī chit段經文中,丈夫何西阿決定下列用幾個動作回應淫盪bó͘歌蜜ê棄sak行為:
一是過去hō͘ in ê,taⁿ lóng無koh hō͘伊。這表示上帝會hō͘以色列人民ê農作物欠收。先知耶利米認為上帝懲罰ê方式就是:戰爭、饑荒、瘟疫等(參考耶利米書十四:12、十八:21、廿一:7、9、廿九:17—18、三十四:17)。其實,chit三項懲罰lóng thang歸納成一種,就是戰爭。

二是當tio̍h情郎ê面侮辱伊,就是剝光伊身上ê衣物。這mā是siōng難堪ê一種懲罰,特別對tī ná陷入愛情ê人來講,這明明是無法度接受ê恥辱。古早人認為hō͘人剝光衣物是一件非常見笑ê事。

三是beh hō͘以色列人民無法度koh過正常ê宗教生活。一個國家、社會之所以ē-tàng安定,宗教生活是非常重要ê。

四是sàn-chhiah。咱知影以色列人民siōng大宗ê農產品就是葡萄。Kah無花果mā是象徵chit-ê民族ê果子樹之一(另外兩種是橄欖kah石榴)。Taⁿ上帝講beh「phut掉」chiah-ê果子樹,並且hō͘ chiah-ê果園荒廢。這清楚講出in會就án-ne陷入sàn-chhiah ê生活慘狀,m̄-nā無法度tī宗教生活上獻祭,連基本生活ê需要mā kā成做負擔。

以上是上帝所tio̍h用來懲罰以色列人民ê方法。Á tī第13節則做總結:上帝beh chhōe歌蜜「算帳」。這tú好回應了開始ê時chūn,先知何西阿奉命娶歌蜜做bó͘了後,生落來ê第一個kiáⁿ名叫「耶斯列」ê意思—上帝beh趕散。原因是in「忘掉」了上帝。

重新查詢 專卷研經 何西阿書系列
錯誤回報,請聯繫comm[@]fhl.net