何西阿書 14章1節 到 14章9節   背景資料  上一筆
Kui本聖經有一個明顯ê方向:上帝所期待ê,是祂ê子民會悔改歸向祂。所謂「歸向祂」,意思是teh指以誠實之心遵行祂ê旨意。上帝siōng無歡喜ê事,就是以虛假ê外表,掩蓋(khàm)棄sak祂旨意,去拜偶像ê行為。Chit種掩蓋(khàm)ê外表,包括真chē宗教禮儀,親像獻祭(參考阿摩司書五:21—23,彌迦書六:6—7)、禁食(參考以賽亞書五十八:3—5)等,chiah-ê m̄-nā無消除上帝ê憤怒,顛倒ê,卻是令上帝siōng受氣ê事,因為宗教禮儀原本是beh表明對上帝ê忠心、感恩,m̄-koh taⁿ抱tio̍h掩蓋(khàm)虛假ê心,等於teh否認上帝明鑑ê能力仝款,認為上帝只看外表,m̄知人心內ê意念。Koh講,做一個人想beh用外表ê宗教禮儀來掩蓋(khàm)心內ê虛假ê時,往往是因為犯下惡質ê行踏,若無,就m̄免用chiah-ê虛假ê宗教禮儀來掩蓋(參考阿摩司書五:10—15、24,彌迦書六:8)。這就是先知何西阿所傳達出來上帝ê話講:「因為我ài 憐憫,無ài 祭祀;ài 人認bat 上帝,贏過燒祭。(全民版)」(何西阿書六:6)

現在所讀ê何西阿書最後一章,ē-sái講是一篇以「懺悔詩歌」為主軸編輯而成ê經文。Chit種「懺悔詩歌」ê特色,就是呼籲人民悔改認罪,上帝有「疼痛ê疼」會回應。Tùi chit章經文mā thang看tio̍h先知何西阿對以色列人民ê期待,伊tī kā伊講ê同胞,上帝ná親像一位有堅定之愛ê丈夫,一直teh期待背逆ê bó͘ tńg去厝裡團聚。祂會赦免伊ê罪,赦免伊所有ê罪過。上帝bē去追究祂ê子民過去所犯ê罪,只要in悔改歸向祂。

第1到2節,tī何西阿書中「歸向」、「tńg來到」,chit兩種詞字一再提起,親像第二章7節、第三章5節、第六章1節、第七章10節、第十二章6節等等,它m̄-nā是何西阿書ê中心信息,koh khah是先知文獻ê中心題旨。它表明ê意思是:誠心實意ê悔改。是徹底ê醒悟,知影家己所犯ê過錯,而且bē因為驚惶懲罰,就以真chē藉口來合理化家己犯罪ê無奈。真正悔改ê人,知影家己所做惡質ê事是錯ê,會心甘情願地接受應得ê審判。

注意第2節ê「祈禱」、「祈禱」。做一個人teh表明心中有上帝ê時,伊就會祈禱,因為祈禱(á是祈禱)是teh表明家己ê軟弱、有限,需要上帝ê扶持kah祝福。拒絕祈禱,á是藐視祈禱ê人,lóng teh表明hit人ê心中已經無上帝。
除了ài有虔誠ê態度外,先知何西阿tī chia提起tio̍h以色列同胞向上帝祈禱ê主要內容是:祈求上帝垂聽,並且ē-tàng赦免in一切ê罪過。這ē-sái講是祈禱主要ê內容之一。

第3節a句,in beh向上帝祈求赦免ê事,就是坦白承認犯罪ê內容—向亞述求救,向埃及求援(參考七:11、十二:1b),mā向偶像祭拜。Tī希伯來文,chit節是連續用了三個「不」字,表示in過去所犯ê,是一而koh再、koh再而三,chiah會引起上帝極大ê受氣。先知阿摩司bat用過chit種語句,形容為甚麼上帝會對一kóa國家、民族採取懲罰ê行動,就是因為hiah-ê國家kah人民是一而再、再而三犯罪(參考阿摩司書一:3、6、9、11、13、二:1、4、6)。

第3節b句,「阮知影,你向孤兒施仁慈」,thang看出先知何西阿帶領以色列人民用「孤兒」來表示家己ê軟弱kah無助,向上帝祈求憐憫kah恩典。這是真重要ê觀念,因為Tī聖經中一再提起上帝對孤苦無助ê人非常關心、致意,祂一定會照顧chiah-ê被疏忽ê對象。

另外一方面,tùi chit句子mā thang看出以色列人民已經行到走投無路了,發現除了上帝,已經無任何力量thang幫助in。Chit時in chiah知影上帝是唯一thang óa靠ê氣力。因為án-ne,in祈求上帝以「仁慈」對待in。因為in孤獨無助,ná親像孤兒無人照顧一般。

第4節,chia講上帝beh「醫」以色列人民ê「創傷」。「醫」,這是teh指「復合」ê意思。原本以色列人民因為棄sak上帝ê旨意,致使上帝kah以色列人民之間有極大ê鴻溝。Á「創傷」是tùi上帝來ê懲罰,是嚴厲ê懲罰。現在上帝講beh「醫」chiah-ê懲罰所帶來ê「傷」,意思就是teh指上帝beh拯救in,並且kah in重新建立和好ê關係。上帝醫ê方式:一是「專心一意愛in」,意思是teh指kā以色列人民當做家己親生ê kiáⁿ看待。;二是「無koh向in受氣」,tī第十一章3到4節先知何西阿bat提過上帝beh用「雙臂kā in抱tī懷中」,用「慈繩愛索牽引in」。上帝beh「抱」起以色列人民「像抱嬰á óa貼tī面頰上」,m̄-nā án-ne,iáu koh khah親自「俯下身子,養飼in」。這hō͘咱看tio̍h ná親像父子般bē-tàng分ê關係,就是無koh有受氣出現。

第5到6節,chia是以田園ê景象來描述上帝怎樣恩待以色列人民,講出有上帝ê疼滋潤tio̍h以色列人民ê性命,就ná同在野地ê百合花仝款,有甘露無停滴落tī它頂面,hō͘伊開出美麗潔白ê花朵。

第7節,chia用「黎巴嫩ê香柏樹」來形容上帝恩待以色列人民,會hō͘ in成長kah ná親像香柏樹仝款高壯。香柏樹是當時siōng珍貴ê建築材料。聖經mā用「香柏樹」teh代表「力量」真大(參考詩篇三十七:35),á是華貴、美麗(參考列王記上七:2—7)。講出有上帝ê眷顧、保護,性命就ē-tàng得tio̍h滋養,生長茂盛,ná親像花木繁茂仝款,mā像「chē產ê葡萄園」會結出真chē果子。

第8節,所謂「絕緣」就是斷絕了關係,無koh互相來往。當in kah「偶像絕緣」ê時,chiah ē-tàng kah上帝有相通ê管道。Chit時上帝beh「垂聽in ê祈禱」。上帝bē聽棄sak者ê祈禱,上帝mā bē聽m̄信者ê祈禱,上帝koh khah「m̄聽罪人ê祈求;伊只垂聽ná敬拜伊、並實行祂旨意ê人」ê祈禱(參考約翰福音九:31)。Tī chia,先知何西阿講上帝beh垂聽以色列人民ê祈禱,這表示in已經承認家己ê罪,悔改歸向上帝。

第9節,chit節ē-sái講是chit本何西阿書ê附錄。Mā ē-sái講是chit本經冊ê一個總摘要結論。內容kah形式真親像智慧文學ê表達方式,ná親像箴言ê句型。「義人」kah「罪人」是相對ê存在。對上帝ê旨意mā是採取相對ê態度。

Chit節ê中心思想tī「上主ê道路是正直ê」chit句話。就是beh勸導以色列人民遵行上帝ê道路去行。作者主要目的是提醒南國猶大ê以色列人民,希望in ē-tàng明白北國以色列會án-ne滅亡,就是因為棄sak上帝ê旨意。希望南國猶大ê以色列人民ē-tàng tùi北國滅亡ê事件得tio̍h教示,就是聰明koh有智慧ê人,知影怎樣tùi別人ê失敗得tio̍h經驗。

重新查詢 專卷研經 何西阿書系列
錯誤回報,請聯繫comm[@]fhl.net