何西阿書 11章12節 到 12章14節   背景資料  上一筆  下一筆
Tùi以色列民族被揀選到出埃及ê chit段經歷,是以色列民族早期歷史上非常重要ê一段。所有以色列人民lóng知影in會hông稱做「以色列」,並m̄是偶然ê,卻是上帝tī in祖先ê身上有過一段真特殊ê掙扎了後chiah發生ê。Thang án-ne講:當上帝決定揀選以色列民族ê祖先雅各為僕人ê時chūn,一定真掙扎痛苦,因為上帝所揀選ê是一個會「欺騙、爭鬥」ê人,卻m̄是一位可愛、溫柔、聽話ê好gín-á。Mā thang tùi chia想像會tio̍h:如果當父母ê,有兩個gín-á,其中一個真溫順、體貼、聽話,另外一個是真會欺騙koh歡喜kah人爭鬥ê gín-á,iáu會kah父母吵架,想看看,當父母ê,in會選擇甚麼人繼承家業?咱thang想親像上帝決定beh揀選雅各為族長,並m̄是件容易ê決定,祂一定經歷真痛苦ê掙扎,其中mā充滿對雅各特殊ê疼,這愛mā是一種「痛苦ê疼」。因為揀選雅各,就一定tio̍h為雅各所做所為付出koh khah chē ê代價。這就是先知何西阿tī第十一章8節所講ê:

「以法連,我ná 會棄sak 你?以色列,我ná會kā你交hō͘ 敵人?我 ná 會 hō͘ 你親像押瑪?ná 會kā 你做洗扁款待?我回心轉意,我慈愛ê 心真熱。(全民版)」

無錯,上帝無法度án-ne做,因為tī以色列人民ê身上,上帝有一段非常「痛苦ê疼」tī內面,he是無法度分割ê疼,是無法度棄sak ê疼!

第十一章12節,先知何西阿一再提起以色列人民用「白賊」欺騙上帝(參考七:3、十:13)。Tī雅各ê身上mā看tio̍h chit種影像,雅各欺騙老父以撒,這是大家lóng熟悉ê故事(參考創世記廿七:1—29),伊mā用「詭詐」ê方式奪取丈人拉班ê財產(參考創世記三十:34—43)。「詭詐」,tī希伯來文是「米爾瑪」(mirma),這字ê原本意思是teh指「心內發出ê陰謀」,mā kah「貪婪」有關。

Koh講,chia真清楚指出,「背叛」上帝ê m̄-nā是北國以色列人民,mā包括南國猶大人民。表示全體以色列民族lóng背叛了上帝。

第十二章1節,koh khah清楚說明北國以色列ê問題,就是想beh tī埃及kah亞述中間取得平衡,á是想beh兩pêng lóng討好,m̄-koh結果lóng失敗à。這就是先知何西阿tī第七章11節,in只知影討好強國,卻bē記得真正ē-tàng保護in ê,是用大能救in脫離埃及ê全能上帝。Á事實mā證明:北國以色列m̄-nā無得tio̍h安全保障,顛倒ê,卻被兩國hō͘夾持逼。

第2節,真清楚提起南國猶大mā是上帝懲罰ê對象,因為in所犯ê過錯kah北國以色列人民所犯ê錯誤仝款,in並無因為北國以色列遇tio̍h災難有所警戒。
第3到4節,是用雅各被揀選ê經過當主軸講述以色列人民kah上帝之間ê關係。雖然這是簡短ê歷史背景,m̄-koh卻講出上帝kah以色列人民之間ê特殊「愛情」。Chit段背景thang tùi創世記第廿五章看tio̍h第三十二章,是記載有關雅各出世到伊tùi丈人拉班家chhōa bó͘-kiáⁿ tńg去故鄉ê kui個經過。Mā thang看tio̍h伊tī母親ê胎中,就爭teh beh先出來(參考創世記廿五:26),甚至tī kah天使相ián ê時chūn,iáu要求天使祝福伊(參考創世記三十二:24—28)。

第5節,chit節ē-sái講是非常關鍵性ê一節經文,作者提供咱認bat上帝ê兩個特性:一是上帝乃是「萬軍ê統帥」,另外一是上帝ê名是「耶和華」。前者是teh回應第1節提起ê問題—以色列人民走chhōe埃及kah亞述ê幫助。卻bē記得當年帶領in ê祖先出埃及ê是上帝。後者講上帝ê名是「耶和華」,這是非常重要ê一句話。因為以色列人民進入迦南地了後,siōng嚴重ê問題就是kā上帝hō͘ bē記得,而為tio̍h beh hō͘土地chē加添生產而跟tòe當地迦南人去拜巴力神明,並稱呼巴力神明是in ê上帝。當人忘掉對方ê名ê時,就表示對方tī chiah-ê人ê心目中ê地位已經被取代、疏忽à。

第6節,先知何西阿呼籲以色列人民一定tio̍h用實際ê行動—實行無變ê疼,伸張正義,來回應上帝並且永遠kah上帝做伙。Chit種呼籲mā出現tī同一時期ê先知彌迦ê信息中(參考彌迦書六:8)。

第7到8節,這是何西阿書中siōng明顯指出以色列人民犯罪ê一段經文;Tī chit段經文中提起以色列人民敗壞ê實況—欺騙,不誠實,chit種行為顯示出in心中無上帝。

第9節,chit節koh一pái提醒以色列人民知影,是上帝帶領in ê祖先離開埃及。既然in bē記得,iáu去拜巴力偶像神明,因為án-ne,上帝決定beh hō͘ in koh一pái試探tī「曠野」漂流ê經驗,就是甚麼都無,看in beh óa靠ê是甚麼人?因為只有tī曠野,in chiah會真正體驗tio̍h,只有上帝chiah是in性命ê óa靠,tī曠野mā是in kah上帝關係siōng親密ê時段(參考何西阿書二:14)。

第10到11節,講出以色列人民真正ê問題,就是m̄知醒悟。Chia提起上帝透過先知傳達信息、看見異象、警告人民等,lóng是tùi上帝來ê差遣。M̄-koh,以色列人民猶原m̄知悔改,繼續tī重要ê宗教重鎮「吉甲」kah「基列」向偶像神明「獻祭」。因為án-ne,上帝決定beh懲罰chit兩個城市,hō͘ in成做廢墟。

第12節,chit節若是編輯tī第4到6節中會比較khah通順。先知tī chia koh一pái提起歷史ê事件,有可能beh表達一件事:先祖雅各為tio̍h beh娶所疼ê拉結做bó͘,無惜受盡一切折磨,被欺騙koh剝削。相對ê,現在以色列人民為tio̍h beh加得tio̍h農作物豐收,竟然ē-tàng放棄疼in ê上帝,去拜巴力神明。

第13節,chia講有一位先知,這真清楚是teh指摩西。可惜以色列人民並無因為án-ne感謝上帝、遵行上帝ê旨意,引起上帝ê受氣。

第14節,chit節清楚指出以色列人民á是仝款,拒絕聽從先知ê勸告,mā拒絕接受先知ê信息,這等於是藐視上帝ê恩典仝款,最後一定會tú-tio̍h嚴厲ê懲罰。
重新查詢 專卷研經 何西阿書系列
錯誤回報,請聯繫comm[@]fhl.net