創世記 45章1節 到 45章15節   背景資料  上一筆  下一筆
Chit章是由「耶和華文獻」kah「以羅伊文獻」chit兩種資料混合編輯而成ê。第1節a句、第2節b句、第4到5節a句、第9到11節、第13到14節、第19到21節a句、第28節lóng是屬tī「耶和華文獻」ê資料。其它lóng是屬tī「以羅伊文獻」。

Chit章主要重點khǹg tī約瑟kah伊ê兄弟相認,並且引起埃及國王ê重視,進一步koh正式邀請雅各家族進入埃及,hō͘ kui個約瑟族長ê故事達tio̍h siōng koân峰,mā是雅各家族進入埃及ê序曲。Koh講,chit章iáu有另外一個主要ê目的,是teh說明約瑟確實是真有信仰ê人,伊kah伊ê兄弟重新修好,並無因為今á日ê發達,就kā過去ê積怨the̍h來做報復ê手段,無,因為伊是一個信靠上帝ê人,知影這一切lóng是上帝ê安排。

約瑟聽完猶大講頂面所講ê經過,mā知影in兄弟確實疼便雅憫,以及對年老老父雅各ê忠實。伊深受感動,koh khah án怎都無法度忍tiâu內心ê激動,因為án-ne,命令所有身邊ê隨從lóng離開,伊向伊ê眾兄弟表白家己ê身分。

第2節,chit節是為第16節後面,埃及國王聽tio̍h約瑟kah兄弟相認ê事,做伏筆。Mā回應了第四十章14到15節、第22節約瑟向酒政長懇求落空ê事。原來伊講hō͘人綁架,犯chit種錯事ê就是伊ê兄哥。

第3到4節,約瑟向伊ê眾兄弟公開家己ê身分就是in出賣到埃及來ê約瑟。In聽當然會嚇到無法度講出話來,而且驚受tio̍h報復性ê懲罰。

第5到8節,chit段經文ē-sái講是約瑟故事ê中心。主要teh說明chit件出賣伊ê事,完全是出tī上帝ê旨意,「為tio̍h保存大家ê性命」,上帝「親自」差遣伊到埃及來ê。約瑟強調,一切lóng是出tī上帝特別ê旨意,ài伊來埃及管理糧荒年代ê事務,用chit種方法來救眾人,特別是救家族ê性命。Chit種講詞,tú好說明約瑟tī信仰上ê敬虔kah謙卑。第6節講大饑荒iáu有五年,表示iáu會真痛苦。

第9到15節,chit段經文為第四十六章先作一個序言,說明雅各後來帶所有家眷、一切所有進入埃及ê原因。

Chit-má約瑟ài伊ê眾兄弟趕緊tńg來到老父hia去,kā老父和全部家眷,包括家畜等所有財產chhōa過來埃及避難。伊叫眾兄弟tńg去照伊,以及in親目所見ê一切lóng向老父說明,thang hō͘老父雅各thang安心遷徙到埃及來。

約瑟siōng關心ê iáu是同母生ê小弟便雅憫,因為án-ne,兩人相攬大哭,然後伊koh kah其他眾兄哥相攬、chim嘴,chiah-ê動作lóng teh表明和好、親密ê意思。Mā表示約瑟無koh為過去ê事受氣、不滿。

重新查詢 專卷研經 創世記系列
錯誤回報,請聯繫comm[@]fhl.net