創世記 39章1節 到 39章10節   背景資料  上一筆  下一筆
Chit章thang續接第三十七章36節,講述約瑟受賣到埃及王ê侍衛長波提乏厝裡做奴隸。chit章除了第4節b句、第6節是「以羅伊文獻」ê作品外,其餘lóng是屬tī「耶和華文獻」ê資料。

Chit章ê主題相當清楚,是teh說明一個重要ê信息:一個人如果有上帝同在,即使tī siōng危難ê時chūn,mā會得tio̍h上帝所賜ê智慧、能力,hō͘伊ē-tàng贏過重重災難kah困難。

約瑟hō͘伊ê兄哥賣到埃及,真tú好賣到埃及王侍衛長波提乏ê家伙奴僕。

第2到3節,chit兩節一再重複一句「上主kah約瑟同在」,表示即使tī hiah-ni̍h惡質ê境遇之下,上帝mā無離開過約瑟,tùi伊受賣做奴隸,一直到伊tī波提乏ê家伙奴僕,lóng陪伴tī伊身邊。Mā因為有上帝ê同在,hō͘約瑟所做ê lóng ē-tàng「事事順利」、「成功」。

第4到6節,因為有上帝賞賜ê能力,約瑟tī波提乏厝裡lóng受重用,koh khah重要ê,只要kah約瑟相處做伙ê人,lóng會因為約瑟來蒙上帝賜福,chit點tú好kah亞伯拉罕蒙上帝揀選ê時,得tio̍h ê應允仝款。第6節ê chit句「約瑟體格健壯,iân-tâu飄撇」,表示這是上帝賞賜hō͘約瑟有特別ê恩典。

第7到10節,有上帝同在,並無表示lóng無誘惑。Ná親像亞當kah夏娃khiā起tī伊甸園裡,mā有奸巧ê蛇做誘惑者。波提乏ê bó͘就是一個誘惑者,一再想beh誘惑「勾引」約瑟kah伊同床。M̄-koh約瑟真清楚絕對無法度做chit種會「得罪上帝」ê事。這mā充分顯示出約瑟ê心中有真chiok厚ê信仰基礎。上帝是一個無所不在ê上帝,mā是鑒察人內心ê上帝。因為án-ne,約瑟bē tī暗中做上帝看做邪惡ê事。

重新查詢 專卷研經 創世記系列
錯誤回報,請聯繫comm[@]fhl.net