創世記 27章1節 到 27章29節   背景資料  上一筆  下一筆
Chit章mā是由頂面所講三種文獻混合編輯而成ê。chit章mā是大家所熟悉ê有關以撒ê兩個雙生á kiáⁿ,以掃kah雅各兩位兄弟之間ê問題。Chit章之所以重要,是因為由此開始,創世記ê編者將族長ê主軸開始chhōa入雅各ê系統。Mā tùi chit章開始,一直到創世記結束,創世記ê作者紹介雅各──(koh稱做以色列)kah伊ê家族之所以被揀選ê經過,以及怎樣進入埃及,kah後來會án-ne有摩西受上帝揀選,去帶領以色列人出埃及ê事件背景,lóng記載tī第廿七到五十章chit段經文中。

Chit段經文koh一pái說明以掃kah雅各兄弟之間衝突ê原因,kah雅各欺騙in老父,奪取大kiáⁿ ê名分,引起以掃極大ê不滿,soah準備beh殺害雅各。

第1到4節,以撒準備ài kā伊ê財產傳承hō͘伊「偏愛」ê kiáⁿ以掃。所以伊ài以掃去準備伊siōng愛ê口味佳餚。

祝福,這mā講出一個重要觀念:分離。老父年老ê時,kā gín-á祝福,表示伊teh beh kah gín-á分離。

第5到10節,chit段經文說明利百加設計beh kā丈夫以撒對偏愛ê kiáⁿ以掃ê祝福,搶奪到家己偏愛ê kiáⁿ雅各身上。關鍵ê經文是tī第8節,利百加ài她偏愛ê kiáⁿ雅各去做她a̍i伊去做ê事,就是用羊代替兄哥以掃獵取ê野味,thang欺騙以撒,thang奪取以撒ê祝福。

第11到17節,雅各提醒偏愛伊ê老母利百加,chit種欺騙行為若是被老父以撒發見,m̄-nā得bē-tio̍h祝福,反tńg是帶來詛咒。

M̄-koh利百加表示為tio̍h奪取chit份重要ê祝福,就算因為被發見á需要承擔詛咒,伊mā甘願。這tú好說明父母鼓勵gín-á作無正確ê事,甚至溺愛到願意承受性命ê詛咒。「照我ê話去做」(參考第8節、第13節、第43節),果然雅各就照老母ê話去做。創世記作者beh表達一件事:人會犯罪ê基本原因,就是無照上帝ê話去做,卻是照誘惑ê欺騙話語去做,像第三章蛇對人ê誘惑仝款。Mā因為án-ne,雅各足足有二十年ê時間,受盡伊丈人拉班ê欺騙、受苦。

第18到29節,chit段經文說明雅各成(chiâⁿ)實tī老母利百加ê設計下,成功地欺騙過、奪取tio̍h老父以撒ê祝福。

以撒為tio̍h beh防止家己因為年老、目睭chheⁿ-mê,確實真詳細地檢驗雅各ê身分,chiah-ê詳細ê檢驗,lóng tī說明過去家庭生活中,伊一再領教過雅各不斷來欺騙。

第18到20節,這是用撒第一pái因為聽覺所帶來ê懷疑,理由是聲音無親像以掃ê。Á雅各用上帝ê名來欺騙以撒,伊將家己ê欺騙行為,講是上帝ê賜福。

第21到23節,這是第二pái用觸覺檢視雅各ê身分,因為看bē-tio̍h m̄-koh對聲音有懷疑,因此to̍h想beh用觸摸身軀來辨別。因為以掃出世ê時, 全身lóng是毛(參考廿五:25)。M̄-koh因為利百加有事先準備,用羊毛皮來欺騙看bē-tio̍h ê以撒。

第24到25節,這第三pái是用味覺來測試,伊透過詢問認定身分,了後又ài雅各將準備好ê肉the̍h hō͘伊食。

第26到27節a句,這第四次是用嗅覺來測試,以撒ài雅各用chim嘴來表示。

以上四次lóng因為以撒ê目睭chheⁿ-mê soah hō͘雅各ê欺騙成功。

第27節b句到29節,這是用撒對雅各ê祝福,tī chit-ê祝福中主要有三件事:一是天頂有甘露,二是地上有肥沃ê土地,三是成做領導者,mā就是大族長ê意思。

重新查詢 專卷研經 創世記系列
錯誤回報,請聯繫comm[@]fhl.net