創世記 19章1節 到 19章11節   背景資料  上一筆  下一筆
除了第29節是「祭司文獻」外,其餘ê lóng是「耶和華文獻」ê作品。第29節mā講出「祭司文獻」ê特色:上帝是一個遵守「約」ê上帝。祂kah亞伯拉罕立「約」,必定會照「約」去行。

有關所多瑪、蛾摩拉這兩城毀滅ê記事,mā是kui本聖經中kúi-nā pái引用作警語ê素材(參考申命記廿九:23、三十二:32;以賽亞書一:9—10、三:9、十三:19;耶利米書廿三:14、四十九:18、五十:40;耶利米哀歌四:6;以西結書十六:48;阿摩司書四:11;西番雅書二:9)。通常lóng是用來警告犯罪ê結果會親像chit兩個罪惡ê城市仝款,遇tio̍h上帝徹底ê毀滅。

Chit章mā傳達了兩個重要信息:罪惡ê結果會帶來上帝嚴厲ê懲罰;á tī上帝嚴厲懲罰ê毀滅中,會看見上帝仁慈ê作為,進行拯救ê工作。

Chit段經文詳細描述所多瑪城犯罪嚴重ê景況,差不多是到人人lóng是罪惡ê共犯。Mā同時回應了第十三章13節所提起ê,hit-ê城ê人邪惡,大大得罪上帝。

第1到2節,chit三位來到亞伯拉罕厝裡作客ê人中間,tùi第十八章17節真清楚講出有一人是上帝,另外兩個就是天使。Chit兩位天使來到所多瑪城,hit時「羅得坐tī城門口」,這表示羅得tī hit-ê城已經有社會地位。因為城門口mā是聖經時代ê法院、貿易ê所在。羅得對生份人ê動作,ná親像伊ê伯父亞伯拉罕仝款,好款待出外人。伊像亞伯拉罕仝款,看見chit兩位生份人竟然「坦覆 (thán-phak)tī in面前」,kah-ná感覺in是特別ê生份人,因為án-ne用相當熱情、誠懇ê態度接待。

第3節,雖然這兩人本來是無phah算beh tī羅得ê厝過暝,m̄-koh因為羅得「堅持邀請」,後來伊chiah有得tio̍h有拯救ê機會。羅得用水替in洗腳,mā烘餅hō͘ in食。

第4到5節,chit兩節說明所多瑪城人惡質ê面貌,mā回應了第十八章20節所記載ê,講hit-ê城kah蛾摩拉城ê人民真正是惡貫滿盈。

第6到8節,古代中東社會有chit種風俗,只要是接待出外人入室,就beh保護in ê安全,甚至tio̍h犧牲家己ê性命mā無teh可惜。為tio̍h beh保護chit兩位天使,羅得甚至願意犧牲家己iáu是處女ê cha-bó͘-kiáⁿ任in蹂躪。

第9到11節,m̄-kohhit-ê城ê人顯然不買帳,甚至清楚表示in眼中ê羅得,並m̄是in尊敬ê人。雖然伊位居重要職務(坐tī城門口,有ná長老身分),in甚至恐嚇伊,tio̍h用koh khah凶悍ê方式對待伊。Chit兩個天使終其尾出手保護羅得,並且hō͘民眾「chheⁿ-mê眼,chhōe bē-tio̍h門」。

重新查詢 專卷研經 創世記系列
錯誤回報,請聯繫comm[@]fhl.net