創世記 12章10節 到 12章20節   背景資料  上一筆  下一筆
Chit段經文ê記事tī第二十章、第廿六章lóng重複出現,因為án-ne,tī聖經學界引起真chē議論。真有可能是仝一件事,經過真chē無仝ê傳述後有差別,m̄-koh lóng表明聖經beh說明ê一個道理:有上帝同在,並無表示lóng bē tú-tio̍h困境,卻是有夠額ê性命力,ē-tàng超越困境,甚至贏過困境。Tī chit段經文中描述亞伯蘭tú-tio̍h饑荒,tùi án-ne進入埃及,m̄-koh mā同時面臨性命危險。

第10節第一pái提起埃及對以色列民族ê「貢獻」,因為án-ne,摩西律法清楚ài以色列人民「bē-tàng輕視埃及人」(參考申命記廿三:7)。聖經真chē pái提起埃及常常是以色列民族「避難」ê場所,親像:後來雅各家族因為饑荒ê緣故進入埃及(參考四十二章起);耶穌降生時,希律王下令殺滅所有猶太人兩歲以下ê男嬰,耶穌ê父母為tio̍h避難mā進入埃及,直到大屠殺事件過了後chiah tńg來(參考馬太福音二:13— 23)。

Chit段經文mā thang看tio̍h亞伯蘭不誠實,而且因為chit-pái ê不誠實換來到「真chē牛、羊、驢、駱駝,kah奴隸」,chit種不義之財真緊to̍h teh kah羅得分地時消失à。Koh khah嚴重ê是,原本亞伯蘭受呼召是beh hō͘ koh khah chē人得tio̍h上帝賜福,m̄-koh卻因為伊不誠實, hō͘幫助伊ê埃及王國m̄-nā無得tio̍h賜福,反tńg帶來災難,這是真值得深思ê一件事。

另外一方面,亞伯蘭會án-ne做,mā是一種權宜之計,因為當時有chit種風俗:為tio̍h beh奪取對方ê bó͘,可能會動用武力強奪。亞伯蘭知影家己無法度贏過埃及國王,為tio̍h要求得生存,只好用chit種方式保護kui個家族。M̄-koh上帝為tio̍h beh實現祂對亞伯蘭揀選ê應允,因為án-ne,hō͘埃及發生傳染病,hō͘埃及國王明白家己所犯ê 錯誤。

另外一種看法:埃及發生傳染病,埃及國王卜卦了後知影kah伊娶撒拉做bó͘有關係。因為án-ne,認為撒拉是一個禍首,怪罪亞伯蘭無告知,並且趕緊kā它驅離出境。

重新查詢 專卷研經 創世記系列
錯誤回報,請聯繫comm[@]fhl.net