創世記 10章1節 到 10章32節   背景資料  上一筆  下一筆
Chit章是一般siōng常受疏忽ê族譜。Chit章ê作者認為之所以有無仝口音、語言,是因為in khiā起ê所在無仝ê緣故(參考第5節、第20節、第31節),chit-ê看法kah第十一章ê作者對tī族群分散在地面上ê看法差別真大。第十一章用巴別塔ê故事說明一個重要ê問題:人會彼此之間有語言上ê差別,乃是因為受tio̍h上帝懲罰ê緣故。M̄-koh tio̍h注意ê是tī第5節、第20節、第31節ê經文,其背景lóng是比巴別塔故事ê來源khah慢ê作品,mā是屬tī「祭司」文獻ê資料。巴別塔故事是出tī古老ê資料,差了約四百年ê時間。可見二者之間對tāi-chì ê瞭解有極大ê差別。
另外一點,第6節特別說明含ê kiáⁿ包括埃及人kah迦南人。Tī第九章一再強調「迦南」會做其他兄弟ê奴隸。換句話講,chit種講法所beh表示ê就是無包括「埃及人」在內。Tī申命記第廿三章7節講:Tī申命記第廿三章7節講:「M̄ -thang 怨恨以東人,因為伊是你ê 兄弟。M̄ -thang 怨恨埃及人,因為lín bat 出外tī hia。(全民版)」

Chit份族譜ê特色是,用族譜ê方式描寫國家ê形成。民族kah國家分bē開,國家親像一個民族,mā親像一個大家族。

Chit份族譜另外有一點值得注意ê是:作者用族譜ê擴大,表明上帝就ná親像祂kah挪亞立約時所講ê仝款,beh賜福hō͘人類,hō͘人類有能力生湠chē-chē,遍滿全世界(參考九:1)。上帝是信實守約ê上帝。Koh講,舊約族譜中ê名,特別是tī創世記、出埃及記中出現ê名,通常m̄是只代表一個人,mā是代表一個家族、民族、地區、城邦,甚至是國家。Chit份族譜總共提供「七十個」國家ê名稱,m̄-koh全世界m̄-nā chiah-ê國家而已。而且chit份族譜中,lóng無提起中國、日本、韓國等等chiah-ê亞洲國家。

第十章32節後半句講:「Chiah-ê lóng 是挪亞ê kiáⁿ ê 宗族,各照in ê 世系,in ê 邦國。大水以後,in tī 地上分做邦國。(全民版)」咱需要有chit種認bat:這是當時作者ê世界觀。因為伊所接觸ê範圍就是chiah-ni̍h大。當時ê交通kah今á日ê科技時代無仝,所ē-tàng知影ê mā受限tī當時ê環境。人類有比較寬闊ê世界觀,是tī文藝復興了後chiah有ê。因為án-ne,thang án-ne了解,聖經作者用族譜beh表達一件中心信息:無上帝ê賜福,性命就無法度延續落去。性命是tī上帝ê賜福中得tio̍h氣力。



重新查詢 專卷研經 創世記系列
錯誤回報,請聯繫comm[@]fhl.net