創世記 1章1節 到 1章31節   背景資料  下一筆
通常chit段經文hông稱做是第一個創造ê故事。
Tī創造開始ê第一件事,就是上帝先運行祂ê「靈」tī「水面」。這真重要,因為以色列文化認為「大水」、「海」lóng是威脅性命ê氣力。因為án-ne,上帝創造萬物chìn前,一定tio̍h先kā chit種威脅性命ê氣力kā它控制落來,á是kā它降服,了後,chiah開始祂奇妙ê創造。這mā說明真tú好ê創造,就是帶來性命。

這第一個創造ê故事有幾個特色:

第一個特色是上帝用「命令」來創造宇宙萬物(參考第3節、第6-7節、第9節、第11節、第14節、第20節、第24節、第30節)。上帝創造萬物無材料,唯一ê就是祂(命令)。

第二個特色是除了第二工ê創造,因為iáu未全部完成,因為án-ne無講「好」之外,其餘每工創造後,上帝lóng有經過自我評鑑,了後就會講「上帝看XX是好ê」,表示完成(參考第4節、第10節、第12節、第18節、第25節、第31節)。Tio̍h注意ê所在,是tī第三工上帝連續講了兩pái「是好ê」(參考第10節、第12節)。這mā說明只要是上帝創造ê,lóng是好ê。

第三個特色是每項創造lóng是「各種各類」分kah真清楚。Ē-tàng看出上帝創造之初,lóng是真有秩序ê,bē混雜、混亂,卻是分類清楚(參考第11節、第12節、第21節、第24節、第25節、第26節),m̄-nā植物án-ne,動物mā是án-ne。

第四個特色就是真有秩序,作者tī上帝每工創造後,lóng會用chit句「晚間過去,清早來臨」(參考第5節、第8節、第13節、第19節、第23節、第31節)來形容上帝創造ê秩序。

第五個特色是上帝創造chiah-ê動、植物了後,就會賜福hō͘ chiah-ê生物,上帝ê賜福是hō͘伊延續性命,因為án-ne,作者tī第11到12節用「有產五穀ê,mā有結果子ê」chit句話來形容植物繁延性命,然後用「繁殖」一詞來形容動物(參考第20節、第22節、第24節),á用「生湠chē-chē」形容人類(參考第28節)tī性命上ê延續。

第六個特色是顯示出對照ê成果:有光kah暗、日kah夜、天空kah大地、陸地kah海洋、日頭kah月娘、星辰、有男有女等。

第七個特色是只有造人ê時chūn,是用上帝ê「形像」來創造,而且同時造「男」、「女」,主要目的,是beh人參與上帝ê工作,好管理一切受造物,這mā是上帝用祂ê形像造人ê原因。

Tī chit章ê創造中,咱thang kā它分做二個組別:

第一組(第一到第三工):
第3到5節ê光kah暗。
第6到8節ê穹蒼kā水分做頂下。
第9到10節ê陸地、海洋。

第二組(第四到第六工):
第14到19節ê光體分開了日kah瞑。
第20到23節ê地下ê水裡有生物,以及空中有飛鳥。
第24到25節ê地上有人,有動物、植物。

Tùi chia thang看tio̍h一個明顯ê創造秩序:就是tī第一組是先造出基礎,然後第二組tī基礎上有加添需要ê物品。親像先造光kah暗(第一工),然後第四工造光體強化光kah暗ê區別(第四工)。

以上是六天ê創造情形kah特色。




重新查詢 專卷研經 創世記系列
錯誤回報,請聯繫comm[@]fhl.net