以西結書 46章1節 到 46章24節   背景資料  上一筆  下一筆
Chit章經文是繼續前一章有關君王參與祭典ê各項規矩。Mā koh一pái提起有關君王ê土地,傳承hō͘家己ê子女,kah賞賜hō͘臣僕無相仝;hō͘子女ê ē-tàng繼續傳承落去,m̄-koh hō͘臣僕ê,只要臣僕往生,就收回歸王室所有。並且提起祭司使用灶腳ê時應該遵守ê規矩。

第1節,「tī六個工作日內」是表示不包含安息日在內。「內院ê東門一定tio̍h關閉」,原因只有君王chiah thang tùi東門(正門ê意思)進入。Chia講「安息日kah初一,東門tio̍hphah開」。因為chit-ê時間君王beh進入,所以一定tio̍h phah開東門。

第2節,「當祭司為君王獻燒化祭」,表示君王beh代表人民獻祭,是ná親像今á日ê主祭官仝款。M̄-koh chia由祭司主持儀式。

Tio̍h注意ê是君王tio̍h「khiā tī門柱邊á」,意思是teh指君王只有ē-tàng進入來內院ê門邊,無法度進入內院。因為內院只有祭司kah利未人thang進入。

第3節,「安息日kah初一」hō͘人看做是siōng重要ê日子,因為án-ne,全國人民lóng tio̍h敬拜上帝。

第4到5節,chit兩節詳細記載君王tī「安息日」應該「beh向上主」獻祭ê物件。

第6到7節,這是關係「初一」tio̍h獻祭ê物件。

第8節,chit節kah第2節所提ê仝款,koh一pái講tio̍h君王á是領袖teh代表人民,因為án-ne,伊thang tùi東門進入。

第9節,chia就真清楚講tio̍h:因為節期民眾真chē,為tio̍h beh維持聖殿獻祭活動路線ê秩序,就規定進出聖殿ê時採南北門相對為動線,就án-ne門進,就tio̍h tùi另外一門出去!

第10節,「人民入來ê時chūn,王mā tio̍h入來」,意思是teh指非節期ê時,若是君王mā tio̍h kah一般人民仝款是tùi南門á是北門進入,tùi相對ê門出去。

第11節,chit節是teh指特別節期ê獻祭,需要注意獻牲祭ê時,lóng需要配搭「十七公升半ê素祭」kah「三公升ê橄欖油」同時獻上。

第12節,chia提起王beh進入內院獻祭ê時,thang kah安息日仝款,請人替伊開東門,m̄-koh伊一離開,東門就馬上「關密」。

所謂「自願祭」,是teh指「還願」ê祭(參考利未記七:16、廿二:18—22)。

第13到15節,「每工早起」,tio̍h準備「無殘缺ê一隻一歲ê小羊做燒化祭hō͘上主」,iáu koh khah搭配「兩公升麵粉kah一公升橄欖油」ê素祭。Chit種獻祭是「永久有效」,因為án-ne,「bē-tàng間斷」。

第16節,若是君王處理家己ê土地hō͘子女,得tio̍h分配ê人就ē-tàng永遠得tio̍h hit種產業。這是為tio̍h beh落實第四十五章7到8節ê規定,hō͘君王無貪婪ê心思意念。

第17節,若是君王kā土地「賜hō͘臣僕」,chit種賞賜是「暫時」擁有。等到「歸還年」就beh歸還hō͘國王。這「歸還年」有兩種意思,一是teh指安息年,mā就是每一個第七年。換句話講,領受tio̍h土地ê臣僕只有七年ê所有權(參考申命記十五:12)。另外一個意思,是teh指利未記第廿五章10節所提起ê五十禧年。Chiah-ê tùi獎賞領受tio̍h ê土地,lóng tio̍h歸還hō͘「王族」,這是因為只有「王kah王子thang永久擁有這土地」。 
第18節,仝款規定王族ê人bē-tàng「侵佔人民ê產業」,王族ê人只有ē-tàng使用家己家族ê產業,án-ne就ē-tàng「免得伊欺壓人民」,致使「侵佔」上帝子民ê「土地」。

第19到20節,這是說明祭司tī使用ê房間,特別分別出來「是聖ê」。有兩個地方,一處tī「南邊」,另外一處tī「西邊」。這兩個所在,lóng是隱密ê,就ē-tàng避免「傷害人民」,原因獻祭後ê物件,iáu hō͘人看做是神聖ê物。「chit-ê所在是hō͘祭司煮贖罪祭á是贖過祭ê肉用ê,mā是烘素祭用ê」,就kah灶腳仝款,tī chit所在煮食,mā tī chit所在食用。這mā thang防止獻祭ê物件流落到外面去。

第21到22節,這是利未人thang活動ê所在,特別是tī「外院ê四個角落」lóng有利未人活動ê「小庭園」,這小庭園「長二十公尺,闊十五公尺」。

第23到24節,tī每一個庭園「靠tio̍h石牆」有「爐á」,指引先知以西結看ê hit-ê人講,這是「灶腳」,是hō͘利未族人「tī chia煮人民所獻ê祭物」,了後mā tī chia食用。

重新查詢 專卷研經 以西結書系列
錯誤回報,請聯繫comm[@]fhl.net