以西結書 45章7節 到 45章17節   背景資料  上一筆  下一筆
Chit段經文lóng是關係君王ê部分,包括in khiā起ê土地kah相關ê祭祀禮儀。

第7到8節,chit兩節提起beh劃分出兩塊土地「hō͘君王」,就是東邊kah西邊各一塊。特別分出這兩塊土地來hō͘君王,主要原因是希望君王「bē koh再欺壓」上帝ê子民,ná親像亞哈王想beh佔有拿伯ê葡萄園仝款(參考列王記上第廿一章)。

第9節,chit節是對君王ê勸勉。Ná親像申命記第十七章16到20節仝款,真清楚規範君王應該注意ê事項,就是要緊記上帝ê話語,án-ne就bē成做欺壓上帝子民ê惡君,而會以公義治理人民。Chia講「有夠!」,意思是表示tio̍h知影「知足」。「tio̍h伸張正義,主持公道」,這thang講就是kui本聖經ê教導。君王是上帝所揀選ê僕人,就應該tio̍h實踐公義ê準則(參考創世記十八:19,耶利米書九:24、廿二:3,何西阿書十二:6,彌迦書六:8)。Á「bē-tàng koh再強迫我ê子民離開in ê土地」,chit句話隱含tio̍h一個重要ê訊息:惡質ê君王,kan-taⁿ會逼kah人民遠離家園到各地去走chhōe thang安居樂業之地khiā起。

第10節,thang參考利未記第十九章36節。

「人人lóng tio̍h用標準公正ê度量衡」,chit句話m̄-nā表示司法一定會公平;另外一方面,這mā是對所有人民講ê,ài大家lóng用公正ê態度過社會生活,bē-tàng有欺騙ê行為,án-ne chiah會hō͘上帝所接受、歡喜。

第11節,「賀梅珥」,這是一種容積單位,包括「固體」kah「液體」。先知以西結制訂新ê度量衡,用賀梅珥做基準,一個「伊法」á是「罷特」等於十分之一ê賀梅珥。

第12節,「舍客勒」,這是重量單位siōng基本ê單位,每一個舍客勒,是「等於二十季giú」,而一個「彌ná」等於六十個「舍客勒」。

第13到15節,chit段是teh指beh捐hō͘君王ê供物,mā thang做「稅」來看。

「小麥」、「大麥」等lóng是「六十分之一」,而「橄欖油」則「收成ê百分之一」,「羊」是「兩百隻tio̍h獻上一隻」。

第16到17節,既然人民有提供君王稅賦,君王就有責任為全國人民提供獻祭所需要ê一切物件,特別是tī「贖罪」ê祭品上koh khah是beh由眾領袖家己負擔,代表全國人民辦理「贖罪祭、素祭、燒化祭、平安祭」等祭祀禮儀,原因是君王á是領袖,lóng是頂面所講chiah-ê祭典ê主祭官。

重新查詢 專卷研經 以西結書系列
錯誤回報,請聯繫comm[@]fhl.net