以西結書 44章1節 到 44章14節   背景資料  上一筆  下一筆
Tùi chit章開始,談起有關祭司ê規矩。主要用意是提醒in絕對無法度koh再像過去hit種做出污穢家己神聖職責ê事。因為án-ne,tùi第四十四到四十五chit兩章,lóng是談起有關聖殿內ê人事規矩。

Chit段經文談起上帝帶領先知以西結進入聖殿內後,hō͘伊看見上帝ê榮耀充滿tio̍h整座聖殿,並且ài伊知影外族人bē-tàng參與聖殿祭祀禮儀,然後談起利未人過去所犯ê嚴重錯誤,最後是講tio̍h祭司階層。Chit段經文mā提起關係利未族人被降級,以及被禁止當祭司ê原因。

第1到3節,chia一開始講帶領先知以西結tńg來到「聖殿外院ê東門」處,伊看見「門關閉tio̍h」,而且講以後chit-ê東門會「永遠關閉」。並且強調講「任何人lóng m̄准用這門」進入聖殿,m̄-koh君王thang tùi東門進入到上帝祭壇ê面前,是因為舊約時代ê君王,lóng hō͘人認為是上帝在世間所任命ê代表(參考撒母耳記上廿四:6、廿六:9),而且君王lóng會tī祭祀禮儀中扮演tio̍h重要角色。

第4節,先知以西結被帶領tùi「北門」來到聖殿頭前,chit時伊「看見上帝ê榮耀充滿tio̍h伊ê聖殿」,這表示上帝顯現在聖殿內面,先知以西結看見上帝chit種榮耀,真自然tek就「坦覆 (thán-phak)tī土腳」。

第5節,上帝beh先知以西結「留意」伊所「看見」kah所「聽tio̍h ê一切」。上帝beh kā所有關係聖殿ê規則,就是「注意toh種人thang進入聖殿、toh種人bē-tàng進入聖殿」,免得影響tio̍h聖殿ê聖潔。

第6到9節,chit段經文真清楚說明toh種人thang進入聖殿,toh一kóa人應該被拒絕。Chia講上帝絕對m̄准、mā「無koh容忍」過去「悖逆ê以色列人民」,繼續in過去所做「一切可惡ê事」,這是teh指過去in tī聖殿裡拜偶像ê事(參考以西結書第八章、耶利米書七:30、三十二:34)。現在真清楚表示無受過割禮,以及被逆上帝旨意ê異族人lóng bē-tàng進入聖殿內獻祭。

第10到14節,chit段經文談起有關利未人m̄准當祭司,是因為有「利未支族ê人隨從其他以色列人棄sak」上帝,跟tòe去「拜偶像」,這是非常嚴重ê錯誤行為。因為án-ne,上帝無koh hō͘ in繼續tī「聖殿工作」,換句話講,上帝解除in當「祭司事奉」ê資格,m̄-nā án-ne,連beh「接近」上帝ê「聖物」kah「至聖所」mā lóng tī禁止ê範圍。In只有ē-tàng tī「聖殿內當雜役」,喪失過去當祭司ê榮譽。

重新查詢 專卷研經 以西結書系列
錯誤回報,請聯繫comm[@]fhl.net