以西結書 38章18節 到 38章23節   背景資料  上一筆  下一筆
Chit段經文看起來是過去已經發生ê事,雖然無明指巴比倫帝國,m̄-koh其實就是講巴比倫帝國。因為tī先知以西結chìn前後,上帝ê僕人就bat傳出上帝警告ê信息hō͘以色列人民講,上帝beh差派強大ê勢力入侵以色列,來懲罰以色列人民。問題是以色列人民m̄聽,chiah會致使國家淪亡,人民被掠到異國去做奴隸。

第18到19節,這有兩個層面thang看,一是teh指上帝無歡喜歌革ê軍隊入侵以色列。因為án-ne,上帝tī伊ê軍隊入侵ê時,非常受氣。二是teh指以色列人民一直m̄聽警告,結果引發上帝大怒。M̄-koh tī續接ê下文來看,是第一種情形,指歌革ná親像搶匪仝款,是上帝所無歡喜ê對象。

第20節,chit節講上帝的確是受氣à,致使連「水裡ê魚、空中ê鳥、地上ê大細動物,以及人」等等,lóng會因為聽tio̍h上帝震怒ê聲音而「戰慄pi̍h-pi̍h-chhoah」,連「高山峻嶺」lóng會「崩裂」,而且「城牆倒落來」,chiah-ê現象lóng teh說明上帝確實非常忿怒。

第21到22節,上帝beh用「各種災難hō͘歌革驚惶」,chia描述上帝所用ê方式是:hō͘伊ê軍隊起「內鬨,彼此殘殺」,án-ne就會hō͘聯盟瓦解。另外koh hō͘「瘟疫kah流血」、「豪雨、冰雹、大火、硫磺」等等chiah-ê來自大自然ê災害降臨在這看起來lóng是精銳部隊ê「聯軍身上」,hō͘聯軍真緊to̍h被摧毀瓦解。這ná親像主前701年亞述皇帝西拿基立率兵攻打耶路撒冷ê時,tī半暝hō͘上帝ê天使刣死,死亡人數chē kah十八萬五千人仝款(參考列王記下十九:35)。

第23節,上帝用chit種方式beh向chiah-ê自認真偉大ê國家領導者表明,祂chiah是「神聖ê上帝」,而列國chiah知影真正上帝是甚麼人,人絕對無法度高過上帝。

重新查詢 專卷研經 以西結書系列
錯誤回報,請聯繫comm[@]fhl.net