以西結書 22章1節 到 22章16節   背景資料  上一筆  下一筆
Chit章是談及有關耶路撒冷人民所犯之罪。Ài beh特別注意ê是,先知講tio̍h耶路撒冷ê時,並無單指hit-ê城,卻是teh代表南國猶大人民。

以西結書ê經文m̄是照時間ê順序編排,卻是先知以西結tī各種無仝ê場合、時間,伊所傳講ê信息被收集起來彙編而成chit本經冊,chit章就是一個例,kui章共計收錄三篇上帝啟示hō͘先知以西結ê信息,chiah-ê信息以「上主對我講話」做踏話頭(參考第1、17節、23節等等)。這三篇信息lóng有一個共同主題:譴責耶路撒冷ê罪惡。

這是第一篇信息,先知以西結陳述猶大人民所犯ê罪行真是五花八門,包括有:殘殺同胞、拜偶像、濫權欺壓人民、不孝、詐欺、壓迫孤兒寡婦、不守安息日、講白賊、淫亂,甚至亂倫、放高利貸等等,chiah-ê lóng是摩西律法所嚴厲禁止ê行為,卻lóng tī猶大人民身上處處可見,án-ne chiah是hō͘上帝非常痛心而決定徹底摧毀in ê原因。

第1到2節,一開始就指耶路撒冷城是座充滿「兇手」之城,城內不時發生殘害別人性命ê tāi-chì,因為án-ne上帝beh先知以西結去kā hit-ê城人民「所做一切可惡ê事」指出來。

第3到5節,tùi第3節開始,先知以西結指出猶大耶路撒冷人民「殺害真chē同胞」、「拜偶像玷污家己」,因為án-ne,上帝審判猶大人民,以及上帝ài怎樣懲罰in。

第6到12節,thang參考以西結書第十八章15到17節所列舉ê罪狀。Chia指出in ê罪狀如下:

一是「達官顯要」帶頭「亂使用權力,殺害人民」。這是違反十誡ê第六誡。

二是「無人孝敬父母」,這是違背十誡ê第五誡(參考出埃及記二十:12)。

三是「欺詐外僑,壓迫孤兒寡婦」,這lóng是違背摩西律法規定ê生活準則(參考出埃及記廿三:9,申命記十:18、19)。

四是「不守安息日」,這是違背十誡ê第四誡(參考出埃及記二十:8)。

五是「有人專門講白賊,beh置人tī死地」,這是違背十誡ê第九誡。

六是「食祭過偶像ê肉」,因為迦南地人食chit種祭祀食物ê時,in ê宗教禮儀含有chiù-chōa ê咒語,表示beh對神明忠心。

七是「滿足淫蕩ê慾望」、「kah老父ê bó͘細姨同房」、「kah別人ê bó͘私通」、「誘姦新婦」á是kah「姊妹亂倫」等等,chiah-ê lóng是亂倫ê行為,mā是違反第七誡。

八是「強迫kah經期中ê cha-bó͘人同房」,這mā是違背摩西律法ê規定(參考利未記十八:19、二十:18)。

九是「做職業殺手」,這是teh指以刣人為業,是犯刣人罪,等於違背十誡ê第六誡(參考出埃及記二十:13)。

十是「放高利貸,向以色列同胞索取利息」,這mā是違背摩西律法ê禁令(參考利未記廿五:35—38,申命記廿三:19—20)。

以上chiah-ê lóng teh表明in lóng kā上帝hō͘「bē記得」,chiah會做出頂面所講chiah-ê無應該有ê事,傷害上帝ê心。

第13到16節,說明上帝決定beh嚴懲in,beh追討in所得tio̍h ê chiah-ê「不義之財,追討」in ê「血債」,上帝必定會kā in「趕散到各國」去,hō͘列國「侮辱」in,án-ne「好終止in chit種邪惡ê行為」。

重新查詢 專卷研經 以西結書系列
錯誤回報,請聯繫comm[@]fhl.net