這是第三個災難，mā是「蝨母」之災。蝨母，天主教《思高版本》ê翻譯做「蚊á」，mā有其它版本翻譯做「蛆蟲」之災。如果以尼羅河下游環境ê沼澤地帶來看，講「蚊á」、「蛆蟲」lóng是非常可能ê。 Chit-ê災難只出現tī「祭司」ê文獻中。

第16節，因為埃及國王ê心koh剛硬起來，拒絕履行伊所應允beh hō͘以色列人民離開，去曠野敬拜上帝。因為án-ne，上帝繼續打擊埃及。Chit-pái beh「hō͘埃及遍地ê塵埃lóng變成蝨母」。

第17到18節，摩西叫亞倫用伊手中ê柺「擊地」，就án-ne，只要有塵埃ê所在，就有蝨母ê災難出現。M̄-koh仝款ê，埃及國王ê巫師mā施行法術，m̄-koh只造成koh khah chē蝨母ê災難。Ná親像第七章11節、22節，kah第八章7節所記載巫師所做ê仝款，致使「人kah家畜身上lóng是蝨母」，這thang看出災難之大。

第19節，這是非常重要ê一節，chia講巫師mā承認in無法度抵擋上帝，只好講：「Chit件事是上帝做ê！」chit句話原本ê意思是teh指「上帝ê手造成ê」，表示上帝ê手創造一切。其實，巫師ê chit句「這是上帝做ê」，mā teh kā埃及國王講，in已經無法度kah上帝對抗，國王應該tio̍h知難á退à。

值得注意ê是chia並無講埃及國王向摩西kah亞倫祈求消除災難，只有記載「國王ê心猶原剛硬」，表示伊beh繼續kah上帝對抗ê意思。