出埃及記 39章32節 到 39章43節   背景資料  上一筆  下一筆
Chit段經文mā kah第三十五章10到19節ê記載仝款,只是第三十五章是記載準備ài動工建造聖幕kah chiah-ê物件,chia則講全部lóng建造好à。

第32節,「上主聖幕ê一切工程lóng完成à。」表示kui個聖幕ê工程,包括祭司ê衫褲等lóng全部完成,然後用chit句話:「上主吩咐摩西ê,以色列人民一一做。」為kui個聖幕建造ê工作劃下一個美滿ê句點。Teh代表以色列人民確實是遵照上帝ê旨意做tāi-chì,是確確實實照上帝ê奴僕摩西ê指示做tāi-chì。Chit句話mā是kui本創世記ê主題中心:一切lóng遵照上帝ê話。創世記ê開始就是tùi chia開始,上帝講beh有甚麼,就出現甚麼,一切ê開始,lóng是用上帝為準。Chit點mā是「祭司文獻」ê精神。

第33到41節,描述聖幕內面一切該有ê物件,包括祭司tī聖所供職ê時所穿ê華貴聖服等,全部lóng順利完成à。

第42節,chit節koh一pái強調所有ê chiah-ê工作,lóng是照上帝吩咐摩西ài以色列人民做ê去做。這是敬拜上帝ê事,一定tio̍h án-ne頂真地一五一十遵照上帝做chiah thang。M̄是照人ê想法,是依上帝ê命令做tāi-chì。

第43節,chit節ē-sái講是kui個建造聖幕ê工程之總結,然後摩西teh代表以色列人民kā聖幕奉獻hō͘上帝,這就是「摩西就祝福in」chit句話ê意思。是表明伊祈求上帝賜福hō͘以色列人民tī chit件建造聖幕ê事工上,lóng遵照上帝ê旨意去做,祈求上帝賜福in所做ê工,bē致使落空。

綜觀第廿五到三十章ê第一組建造聖幕ê工程,kah第三十五到三十九章ê第二組建造聖幕工程,無論是第一組á是第二組建造之工程,lóng有三點共同ê所在:

一是強調所有建造聖幕ê路用品,lóng是來自全體以色列人民「甘心樂意」之奉獻,chiah會出現所奉獻ê,lóng超過聖幕所需要ê量。

二是所有參與建造聖幕工程ê人員,lóng是以色列人民中siōng傑出、siōng優秀ê工匠,表明kā siōng好ê奉獻出來hō͘上帝用。Á這mā包括後來ê祭司lóng是tùi利未家族中精選siōng優秀ê人擔任(參考利未記廿一:16—23)。

三是建造聖幕ê工程,tùi siōng細微ê到siōng大ê,全部lóng是照上帝吩咐摩西去做,mā teh表明以色列人民對上帝絕對忠實ê信仰告白,用建造聖幕來表明:in lóng會遵守上帝(約)去行。

重新查詢 專卷研經 出埃及記系列
錯誤回報,請聯繫comm[@]fhl.net