第三十五章到四十章全部lóng是「祭司文獻」ê資料
Tī chit-ê六章中，會發覺內容真熟悉，這是因為頭前已經有提起過關係聖幕kah聖幕內ê器皿kah物件ê pái設kah製造方式。Tī chit-ê最後ê六章中，「祭司文獻」作品表現出它ê特色，就是對祭典禮儀ê重視。作者真詳細記載chiah-ê典章律例，為tio̍h是beh教導以色列人一定會用頂真ê態度敬拜上帝，因為in kui個民族之所以ē-tàng存在，就是有上帝ê憐憫kah赦免。

Chit章到第三十九章就是重複敘述有關聖幕製造ê過程kah規律。

chit三節是關係守安息日ê規定。這mā是十誡ê第四誡，thang參考出埃及記第二十章8到11節。

第1節，摩西一開始就強調這是出tī上帝ê「命令」以色列人一定tio̍h「遵行ê事」。Chia ê「命令」，表示上帝ê話。Mā是性命ê源頭（參考約翰福音一：1—4）。

第2節，thang參考第十六章23到30節、第二十章8到11節、第三十一章12到17節等等，lóng記載強調守安息日ê重要性，這表示teh維護性命ê延續。

Ná親像第三十一章12到13節所提起ê，守安息日，是用來表示kah上帝之間有約ê憑證。換句話講，遵守安息日，chiah ē-tàng表示是屬tī上帝ê子民。因為án-ne，當摩西teh向上帝陳述以色列人是上帝ê子民ê時（參考出埃及記三十三：13），上帝就ài in以遵守安息日來表白。

第3節，chit節講安息日厝裡bē-tàng開爐灶起火煮飯，前一工就beh準備好。Chit點teh降嗎哪ê時，就已經教導過（參考十六：23）。