出埃及記 32章1節 到 32章14節   背景資料  上一筆  下一筆
Chit章主要是由「以羅伊文獻」ê資料構成,除了第25到29節是「耶和華文獻」ê資料。Chit章主要記載以色列人背叛上帝,鑄造金牛偶像崇拜,引起上帝極大ê忿怒。Koh khah嚴重ê是,為以色列人民鑄造金牛ê,竟然是亞倫。這mā暗示了tāi先敗壞ê,就是祭司,宗教信仰ê領導者,chit點是真值得今á日傳道者應該注意ê事。

Koh講,chit章mā提起利未chit-ê支派後來tī以色列民族中擔任祭司chit-ê重要角色ê原因,in khiā tī摩西chit-ê邊,替摩西執行懲罰背叛者ê工作。

Chit段經文描述以色列人違背kah上帝之間所立ê約,竟然是趁摩西上山去領取上帝ê誡命ê時,in對亞倫施壓, ài伊為in鑄造金牛偶像來拜。

第1節,thang參考第廿四章18節,講摩西tī上帝ê山頂停留「四十工」。這「四十」ê數字,thang表示一段適當ê時間。以色列人因為thèng候siuⁿ久,對摩西失去信心,認為摩西已經發生不測。因為án-ne,感覺無平安,想「造個神明」來帶領in。Chia ê「神明」一詞,tī第4節、第8節、第20節、第31節等等,lóng使用「複數」名詞,表示「多位神明」。因為án-ne,第1節chia所講ê「造個神明」,是teh指「造一kóa神明」ê意思。這mā表示chit種神明是用人ê手造出來,表示chit種神明是假ê,m̄是萬物ê創造主上帝,卻是bē動、kan-taⁿ會增加人ê負擔ê偶像而已(參考以賽亞書四十:18—20、四十四:9—20,耶利米書十:1—5、9)。

第2到4節,亞倫收集以色列人the̍h出來ê金耳環,伊就為以色列人鑄造「一頭金牛」hō͘ in崇拜。

為甚麼亞倫ài án-ne做?真可能以色列人聚集到伊面前ê時,帶tio̍h威脅ê口氣講ê。Koh講,可能kah in仝款,等摩西chiah-ni̍h久,家己mā會失去信心。

「金牛」,這是埃及人認為真有「力量」ê神明。可見以色列人tī埃及早已經「埃及化」,bē記得上帝kah in祖先所立ê永遠之約,in mā已經習慣kah埃及人仝款拜牛神。In甚至認為帶領in出埃及ê,就是chit隻金牛所代表ê神明。
第5到6節,chia看tio̍h亞倫建造一座祭壇,然後宣佈beh kā chit個金牛當做上帝kā它崇拜。In果然án-ne做,而且「大食大lim,狂歡作樂」,這tú好說明in確實已經習慣埃及人拜偶像神明ê方式。

第7到8節,上帝真清楚tī山腳下ê以色列人,已經悖逆祂ê旨意teh拜偶像神明。因為án-ne,上帝ài摩西趕緊落山,同時,上帝mā tio̍h採取懲罰ê動作。
第7節是kui個事件ê關鍵話句。Tī chit節,上帝對摩西講中,用「你tùi埃及領出來ê人民犯罪,背棄我」,上帝無koh用「我ê子民」、「我ê人民」(三:7— 10),mā m̄免「我帶領in出埃及」(三:8、17),卻是用「你」,這表示上帝kah以色列人之間ê關係,已經徹底破裂,因為以色列人棄sak上帝,鑄造金牛偶像敬拜。

第9節ê「頑劣」是teh指「頸硬」,無想beh聽話、順服,kan-taⁿ想beh行家己ê路。

第10節,上帝beh改用摩西kah伊ê kiáⁿ孫當做選民,kā以色列人滅絕。Chia上帝對摩西講「我beh hō͘你kah你ê kiáⁿ孫成做大國」chit句話,tú好是上帝對亞伯拉罕、以撒、雅各等族長所講ê話。表示上帝beh重新揀選摩西成做新ê族群。

第11到13節,摩西確實是一個真好ê牧者、領袖。伊知影上帝當teh忿怒,伊祈求上帝憐憫。特別是伊提起上帝已kah以色列人祖先立約,而且「發了嚴肅ê誓言」,m̄-nā beh賞賜in有算bē完ê kiáⁿ孫,而且beh賜hō͘ in土地。

摩西並無因為上帝beh揀選伊成做新ê立約子民,伊就歡喜到phut-phut-tiô起來。顛倒,伊為kui個民族ê利益設想,祈求上帝憐憫、赦免,chit點tú好說明摩西確實是一個優秀ê領導者。

第14節,mā因為摩西ê心靈án-ne純潔,上帝垂聽伊ê祈禱,無kā本來準備ài降落ê災禍hō͘以色列人。這mā說明一件真重要ê事:上帝忠心ê奴僕替人民祈求,上帝會垂聽(參考創世記二十:7,耶利米書十一:14、三十七:3、四十二:2—3)。

重新查詢 專卷研經 出埃及記系列
錯誤回報,請聯繫comm[@]fhl.net