出埃及記 3章1節 到 3章10節   背景資料  上一筆  下一筆
Chit章mā是由三種文獻混合編輯而成ê。第1節、第4到6節、第9到14節、第19到22節等等,是「以羅伊文獻」ê資料;第2到3節、第7到8節、第16到18節等等,是「耶和華文獻」ê作品;第15節是屬tī「祭司」ê文獻。

Chit章kah第四章lóng是記載上帝呼召摩西tńg去埃及帶領以色列人民出來ê經過。M̄-koh第三章主要是解答摩西心中ê giâu疑──驚惶tńg去見伊家己ê同胞。因為tī第二章14節記載以色列人民bat質問伊講:「啥人設立你做首領kah 審判官來管阮? 你kám 會想behphah 死我,親像phah 死hit-ê 埃及人?(全民版)」因為án-ne,第三章以上帝teh解釋家己kah以色列人民之間「約」ê關係,交帶摩西怎樣去kā以色列人民講,伊是án怎領受上帝差遣ê使命。

Chit段經文是摩西hō͘ 上帝呼召ê記事,tī摩西ê記事中是非常重要ê一段。
第1節,摩西tùi原本tī埃及王宮生活,因為逃走變成一個tī曠野顧羊群ê顧羊人。Chit節講上帝ê山是「何烈山」,原來是teh指空曠之地,無任何物件。M̄-koh tī第十九章3節,講摩西去見上帝ê山卻是「西奈山」,chit-ê意思tú好kah「何烈山」完全顛倒,指ê是叢林茂盛ê意思。其實,這是因為無仝文獻傳統所提供無仝ê資料所致。

第2到3節,長老教會所謂「焚á不毀」ê記號,就是tùi chit兩節經文來ê。「上主ê天使」,其實chia指ê是上帝家己,mā thang講上帝ê天使khiā tī頭前,á上帝就tī火燄中出現對摩西講話。

第4到6節,chia上帝第一pái紹介祂家己hō͘摩西認bat,祂是「亞伯拉罕、以撒、雅各ê上帝」,chit句話主要teh表達ê就是「約」,mā是teh回應第二章24節所講ê。因為火燄實在siuⁿ大,hō͘摩西無法度正目睭看teh上帝,後來伊bat要求koh再看一pái,m̄-koh無成功,因為無人ē-tàng看見上帝ê面á存活落來(參考出埃及記三十三:18—23)。

第7到10節,chit段經文是上帝teh說明祂beh揀選摩西去埃及帶領以色列人民出來ê原因。

Tī chit段經文中,一再重複並強調上帝親目「看見」、親耳「聽tio̍h」,已經知影以色列人民「渴望掙脫奴役ê哀號」。因為án-ne,決定beh「落來」tùi埃及人手中kā以色列人民拯救出來,帶領以色列人民去一個「肥廣闊、流奶kah蜜ê所在」。並tī第8節說明chit-ê肥廣闊kah流奶kah蜜之地,是「迦南人」等六個民族khiā起ê所在。

所謂「流奶kah蜜」,意思除了是teh指土地肥之外,iáu有另外一個意思,是teh指會有上帝同在。只要有上帝同在,就bē有缺乏之慮(參考以賽亞書七:21—22)。

第10節,這是上帝ài摩西去帶領以色列人出埃及ê命令。

重新查詢 專卷研經 出埃及記系列
錯誤回報,請聯繫comm[@]fhl.net