Tī造聖所ê工作上，事(tāi)先tio̍h講起有關建造約櫃ê細節。約櫃內面siōng主要ê是上帝所頒布，而且親手寫ê兩塊記載誡命ê石版。Koh再參考出埃及第十六章33到34 節：「摩西對亞倫講：『the̍h一個罐子，放兩公升嗎哪 tī罐á內，存在上主臨在ê所在；這是為咱ê kiáⁿ孫留落來ê。』上主án-ne吩咐摩西，亞倫就照樣作à。伊kā罐子 hē tī約櫃頭前，保存起來。」因為án-ne，約櫃內面m̄-nā放誡命ê石版，mā放兩公升嗎哪。

第10到16節，講述建造約櫃ê kui個細節，包括約櫃ê形狀、使用ê材料。Chit種「金合歡木」，是一種會發生香味ê木材，mā因為án-ne，約櫃就會發生芬芳ê氣味，收藏tī內面ê嗎哪，bē致使被蟲食掉。希伯來書第九章4節講約櫃內面iáu放tio̍h亞倫手中ná根已經發過芽ê杖。

第17到22節，是有關蓋tī約櫃頂面ê蓋（kòa）。Chit-ê蓋koh kā它稱做「施恩座」，希伯來書第九章5節講這是「赦罪座」，意思是teh指以色列人民透過獻祭，表明懺悔，上帝就憐憫in。因為án-ne，約櫃ê蓋子就象徵tio̍h上帝ê慈愛、憐憫kah恩典，意思lóng是teh指kah上帝和好。因為約櫃內面放ê是上帝ê誡命，是上帝kah以色列人立約ê記號。因為án-ne，蓋子頂面雕刻一對「基路伯」，樣式真親像「人面獸身」，而且有翼股ê怪象。Chit種基路伯ê樣式thang參考以西結書第一章5到9節。創世記第三章24節講，當人食了分別善惡ê果子了後，上帝特別差派基路伯固守伊甸園，保護性命樹無koh hō͘人食到。因為án-ne，基路伯mā是上帝ê天使、奴僕。Án-ne，約櫃蓋子上ê基路伯，是teh代表守護約櫃ê上帝奴僕。