出埃及記 20章1節 到 20章17節   背景資料  上一筆  下一筆
Chit章thang講是出埃及記siōng重要ê一章,記載有關十條誡命ê內容。Chit章全部lóng是「以羅伊文獻」ê資料。kāchia記載有關十誡ê內容(第1到17節),對照申命記第五章6到22節,thang發見其中siōng大ê差別是tī第四誡有關守安息日ê規定。Tī出埃及記chia講守安息日,是因為上帝創造天地ê關係,á tī申命記第五章soah講是因為記念出埃及ê緣故。後者kah in進入迦南後ê生活必定有密切ê關係,in因為墮落,bē記得上帝ê誡命。因為án-ne,申命記koh一pái提醒in,bē記得上帝ê誡命,會為in帶來亡國ê運命。Á bē記得上帝siōng常見ê態度,就是連安息日lóng bē記得。因為安息日是敬拜上帝ê日子,bē記得安息日,等於無koh敬拜上帝à。先知耶利米就bat嚴厲警告這會為以色列人民帶來滅亡(參考耶利米書十七:19—27),後來果然應驗ā。

另外,tī第五誡孝敬父母ê誡命上,出埃及記直接講「tio̍h孝敬父母」,申命記則加上「tio̍h遵照我ê命令」,若án-ne做就ē-tàng「事事順利」。

第三,tī第十誡,出埃及記講「bē-tàng貪圖別人ê房屋」chit件事pái tī第一位,m̄-koh tī申命記則「bē-tàng貪戀別人ê bó͘」列入優先。

其實,「十誡」chit位稱,原本是teh指「十句話」。如果是十句話,十誡就是án-ne:
1.M̄-thang敬拜別ê神明。
2.M̄-thang為家己造任何偶像。
3.M̄-thang亂使用我ê名。
4.T io̍h謹守安息日做聖日。
5.Tio̍h孝敬父母。
6.M̄-thang刣死人。
7.M̄-thang姦淫。
8.M̄-thang偷the̍h。
9.M̄-thang做假證陷害人。
10.M̄-thang貪圖別人ê財產。

Tùi頂面所講ê十誡,mā thang kā它分做兩個部分;其一是第一到四誡,這是屬tī人對上帝應該有ê態度。這部分ê誡命ná親像申命記第六章5節記載ê:「你tio̍h 盡心、盡性、盡力,疼上主— 你ê 上帝。(全民版)」Chit句話mā是kui本聖經ê基本教示。第二是第五到十誡,屬tī人kah人之間ê關係。這第二ê部分mā thang以利未記第十九章18節b句所講ê:「M̄ -thang 報仇,mā m̄ -thang 埋怨你本國ê 人民,tio̍h 疼厝邊親像家己(全民版)」kā chit兩部分合起來,等於是十誡ê總和,mā是耶穌基督回答hit位教法律ê人ê答案(參考路加福音十:25— 37)。

十誡siōng基本ê結構tī第2節,chia講:「我是上主 — 你 ê 上帝,bat
chhōa 你tùi 埃及地,tùi 做奴隸ê 家出來ê。(全民版)」Chit句話kah-ná是一個圖章印記,真清楚說明這是屬tī上帝ê法律,bē-tàng輕視、疏忽。顛倒地,是beh tiâu tiâu記tiâu。

第3節,「我以外,你 m̄ -thang 有別 ê 上帝。(全民版)」chit條誡命mā是大多數改革宗基督教會,以及希臘正教看做十誡ê第一誡。Mā thang án-ne講,十誡實際上是只有一誡而已,就是這第一誡。用上帝做中心,以後ê九條誡命lóng是用chit-ê誡做基礎。Bē記得chit-ê誡,其他ê lóng kā失去準則。以上帝當做人、事物等一切ê中心,chiah ē-tàng談其他ê。

第4到7節,這是第二條誡命「bē-tàng為家己造任何偶像」。Ài beh特別注意ê是「bē-tàng為家己」,表示bē-tàng kā人看做偶像來拜。Koh講,bē-tàng因為家己ê需要á製造偶像。Ná親像出埃及記第三十二章記載,以色列人民為tio̍h滿足家己ê需要,竟然tī曠野製造金牛崇拜。Á這金牛偶像神明,就是in tī埃及寄居生活所學tio̍h ê,是屬tī生產ê神,mā是力量ê神明。M̄-koh上帝堅定ê命令,絕對無法度容忍以色列人民有chit種行為。

Chit條誡命iáu有附帶要件,就是違背ê,會hō͘追究責任到kiáⁿ孫三、四代,m̄-koh頂真遵守ê,必定會得tio̍h上帝ê賜福到「千代kiáⁿ孫」。
Tio̍h注意第5節所講ê,「恨惡」上帝ê人,其實就是teh指去拜偶像神明ê人。

第7節,這是第三誡命「bē-tàng亂使用我ê名」。「亂使用」一詞,tī中文《和合本》用「妄稱」,天主教《思高版本》mā是用「妄稱」。Chit-ê詞原本ê意思是teh指「無適當」,á是「無好ê動機」。意思是teh指不誠實ê方式,假借上帝ê名欺騙人。Chit種行為等於是teh褻瀆上帝ê神聖仝款,bē-tàng原諒(參考利未記十九:12)。換句話講,只要是用上帝ê名,無論是祈禱、講話,lóng一定tio̍h頂真守tiâu絕對誠實ê要件。

Koh講,「亂使用」mā是teh指稱呼上帝ê名kah上帝ê本性不相符。Mā因為án-ne,猶太人就真驚惶直接稱呼上帝。In認為上帝太神聖了,teh敬拜ê時恐驚因為稱呼上帝ê名有誤,致使褻瀆了上帝ê神聖,因為án-ne,in ài用「天」來代表。這天mā teh表示創造kui個宇宙萬物ê主宰ê意思。

第8到11節,這是第四誡命「tio̍h謹守安息日做聖日」。Ná親像頭前提過ê,對照申命記第五章12到15節,就會發見chia強調上帝ê創造,á申命記是為tio̍h記念出埃及脫離性命苦難á守安息日。

第七工歇睏,所以六天內lóng ài認真工作,第七工歇睏bē-tàng工作,包括「kiáⁿ、奴婢、牲畜,á是僑居ê外族人」等lóng tio̍h停止工作。因為人停止工作,包括奴婢在內,真自然tek,牲畜mā會跟tòe歇睏停工。Tùi chia延伸出來ê,就是第七年安息年,大地mā因為án-ne得tio̍h喘息ê機會。
第12節,這是第五誡命「tio̍h孝敬父母」。Tùi這第五誡命開始,到第十誡命,lóng是講tio̍h人kah人之間ê關係。

chit-ê誡命mā是有附帶ê祝福,遵守chit-ê誡命ê人,thang tī khiā起ê土地上「享長壽」。Tùi「孝敬」延伸出來ê就是絕對禁止「咒罵父母」,chit種人一定tio̍h處死(參考出埃及記廿一:15、17)。

第13節,這是第六誡命「m̄-thang刣死人」。Chia ê「殺」原本是無任何受詞,是teh指「bē-tàng殺害」ê意思,因為án-ne,傷害別人lóng是tī禁止之列。因為性命tùi上帝來,任何殘害性命ê事,是一定tio̍h絕對禁止ê。

Koh講,chia ê「殺害」,是teh指故意、蓄意ê行為。聖經中一再表示,上帝siōng無法度忍受有權力者殺害無辜ê性命。Chit款tāi-chì,上帝絕對bē赦免、原諒(參考列王記下廿四:4)。

第14節,這是第七誡命「m̄-thang姦淫」。姦淫,這是屬tī男kah女之間不正當ê關係。M̄-koh mā附帶有chiok厚ê宗教信仰意義。因為上帝kah以色列人民之間ê關係,就是一種婚姻ê夫妻關係。犯姦淫ê行為,等於teh侮辱對上帝忠實ê心靈。因為上帝ê子民一定tio̍h聖潔(參考利未記十九:1—2),聖潔ê子民,就一定tio̍h tùi清楚ê性關係開始做起。

第15節,這是第八誡命「bē-tàng偷the̍h」。Chia ê偷the̍h範圍包括綁架別人ê奴隸。其實,chit-ê誡命mā隱含tio̍h一個基本信念:就是愛人如己(參考利未記十九:18)。這真清楚teh說明:上帝賞賜hō͘每一個人lóng夠額。會偷the̍h,表示對上帝賞賜ê無信心,想beh貪得koh khah chē。Ná親像tī曠野ê時,上帝tùi天頂降落嗎哪,要求in一定tio̍h嚴守每工每人需要量「兩公升」,bē-tàng多撿,表示對上帝絕對忠實。使徒保羅就指出,貪,就是拜偶像ê行為,chit種人不配當上帝國度ê子民(參考以弗所冊五:5,歌羅西書三:5)。

第16節,這是第九誡命「bē-tàng做假證陷害人」。Chit條誡命mā說明誠實ê心靈ê重要性。假見證mā會害死無辜ê性命,等於是kah第六誡ê「殺害」仝款。為tio̍h beh防止有誤判á是假證ê事發生,申命記第十九章15節規定,一定tio̍h有兩個以上ê證人作證chiah ē-tàng hō͘訴訟案件成立。對tī做假證ê人,m̄免憐憫,「以眼還眼,以牙還牙,以手還手,以腳還腳」(參考申命記十九:21)。

第17節,這是第十誡命「bē-tàng貪圖別人ê房屋;mā bē-tàng貪愛別人ê bó͘、奴婢、牛驢,á是其他物件。」原本是只有「bē-tàng貪別人ê財物」chit-ê句話。Teh進入迦南地了後,kā它寫得koh khah細。Chia ê「貪」,指ê是奪取,用不正當ê手段得來ê。

重新查詢 專卷研經 出埃及記系列
錯誤回報,請聯繫comm[@]fhl.net