Chit章是由三種文獻共同編成ê；包括「祭司文獻」ê資料tī第1節、第8到16節；「耶和華文獻」ê資料tī第2節、第7節，以及「以羅伊文獻」資料ê第3到6節等等。

Chit章主要是兩件事，其一是in缺水。Tī曠野缺水是一定會tú-tio̍h ê。頂pái tī書珥是chhōe bē-tio̍h thang lim ê水，chit-má則chhōe bē-tio̍h水。上帝tùi石磐頂出水hō͘ in lim。其二是第一pái經歷作戰。頂pái是tú-tio̍h埃及ê追兵，chit-má則tú-tio̍h亞瑪力人beh攻打in。Tī第十三章18節bat留落來一句伏筆講：「以色列人離開埃及ê時已經武裝好，準備隨時作戰。」我tī頭前提過比較khah正確ê講法應該是in the̍h了兵器離開埃及。chit-má則thang派上用場，因為tī曠野ê所在，必定有真chē ê原住民tī hia，以色列人民hit種龐大ê一陣人，而且男女老幼加上牲畜，難免引起當地居民ê覬覦。

Chit段經文記載以色列人民tī曠野地區不時tú-tio̍h缺水ê問題，這並m̄是第一pái tú-tio̍h，m̄-koh出埃及記作者hō͘一個範本：以色列人民tī曠野tú-tio̍h任何困難，就會埋怨，真少感謝。Kan-taⁿ會埋怨ê人，就會bē記得上帝ê恩典。這mā是後來in棄sak上帝ê原因。

第1到2節，以色列人民遵照上帝指示，離開汛ê曠野，來到一個新ê所在是「利非訂」，這地點已經無法度thang考。這是一個缺水ê地區，因為án-ne，in要求摩西hō͘ in水lim。

第3到4節，以色列人民因為口渴非常艱苦心，koh開始埋怨摩西，in甚至講出當初摩帶領in出埃及，kám講是beh hō͘ in死tī曠野án-ne失去理性ê話。表示in已經bē記得chìn前出埃及所經歷到ê各種神跡奇事。Inm̄-nā是講威脅，甚至iáu想「the̍h石頭phah死」摩西。M̄-koh in bē記得，in ê chiah-ê怨言m̄免摩西轉述，上帝mā lóng聽見à。

第5到7節，上帝ài摩西the̍h手中ê杖擊phah石磐，石磐果然流出泉水，解以色列人民ê口渴，消除了性命威脅，mā為hit所在號名「米利巴」，表示in bat懷疑上帝、抱怨上帝。後來詩人記錄落來chit段軟弱ê經歷（參考詩篇九十五：8－9），好提醒後代kiáⁿ孫mài重複chit種khiap-sì ê經歷。