前一首hông稱做是摩西ê詩歌。Chia忽然記載出現摩西有一位阿姊美莉安，伊帶領以色列人民跳舞唱歌頌讚上帝。

第19節，chit節ē-sái講是講頭前詩歌ê濃縮，mā是美莉安tī第21節帶領以色列婦女唱歌頌讚上帝之詩歌ê序言。

第20節，chia講美莉安是亞倫ê阿姊，伊同時mā是一位「先知」。民數記第十二章2節記載上帝mā對美莉安講話，傳達上帝ê信息hō͘人民。因為án-ne，伊tī以色列人民中間ê地位是lóng受尊崇。

Chit節mā講美莉安帶領以色列婦女「the̍h-tio̍h鈴鼓」，然後帶領跟tòe伊ê婦女「一面phah鼓，一面跳舞」。這mā是一種表示極大喜樂kah性命得tio̍h重生ê雀躍方式。

第21節，詩歌講上帝「得tio̍h光榮ê勝利」，chit句話說明上帝親手kah埃及精銳部隊相刣，kā埃及軍隊ê「戰馬kah騎兵lóng投進海裡」，意思是phah垮了埃及追兵。