出埃及記 12章1節 到 12章11節   背景資料  上一筆  下一筆
Chit章是用「祭司文獻」為主軸,包括ê資料有第1到20節、第28節、第40到41節、第43到50節。然後有「耶和華文獻」ê資料,包括第21到27節、第29到34節、第37到39 節。第三種資料比較少,是「以羅伊文獻」ê資料,只有第35到36節。另外第42 kah 51 節是編者附加上去ê。

Chit章siōng主要是記載以色列人tī摩西kah亞倫ê帶領下,終其尾行出埃及。相配合ê,就是記載兩個重要ê節期,一個是Pôaⁿ過節,另外一個是除酵節。Á chit兩個節期連接做伙,有時會kā它稱做除酵節,有時會用Pôaⁿ過節來說明。

Tùi chit段經文teh紹介Pôaⁿ過節tio̍h注意ê事項,á是講遵守Pôaⁿ過節ê規律,mā thang看出「祭司文獻」ê特色,就是對祭祀禮儀、律法條文、數字等非常重視。

Tùi第1節ê「tī埃及」chit-ê詞,就ē-tàng看出有關Pôaⁿ過節kah第15到20節ê除酵節,lóng是siōng早ê節期,早kah tī埃及ê時chūn,就已經有一個雛(chhu)形ā。

第2節提起出埃及ê hit-ê月(名叫「亞筆月」,參考十三:4)beh做一年「月份ê開始」。因為Pôaⁿ過節是tī春分了後ê月圓以後,因為án-ne,通常lóng是tī三到四月之間。Hit時是百花齊放,一切看起來lóng充滿性命ê氣息。Kah巴勒斯坦地區ê人秋收了後,準備過冬ê暗霧歲末真無仝款。以色列人民用chit種方式來表示:一個新性命ê起頭,就是充滿希望。用chit種方式來區別in kah埃及人無仝款,也kah中東地帶ê人有差別。 

第3到11節講tio̍h有關準備Pôaⁿ過節各種tio̍h注意ê事項,包括宰殺羊隻,而且thang kah左鄰右舍ê人同齊享用。Á宰殺羊羔ê時間是tī日頭落山ê時chūn(參考申命記十六:6),這表示一工ê開始,因為以色列人是tùi日頭落山開始計算一工ê時間。因為án-ne,mā thang án-ne講,出埃及事件表明ê乃是性命ê重生。

第7節,chit節講beh用宰殺羊ê血抹tī門框頂,當做天使巡視ê記號。這mā是teh表示tùi埃及人中間分別出來。

第9節規定羊只有ē-tàng用烘ê,無法度用煮ê。原因是:煮ê時chūn,就一定tio̍h切做塊狀,若無,無可能有hit種大ê鍋á。若是用烘ê,chiah ē-tàng保持kui隻完整。

第11節講「這是上主ê Pôaⁿ過節」,chit句話非常重要,表示這是屬tī上帝ê工作。任何人想beh改變是無可能ê。


重新查詢 專卷研經 出埃及記系列
錯誤回報,請聯繫comm[@]fhl.net