出埃及記 12章37節 到 12章42節   背景資料  上一筆  下一筆
Chit段經文ē-sái講是結束以色列人khiā起tī埃及ê時間,mā統計in ê人數。

第37到39節,tī第37節chia講以色列人出埃及ê人口,「kan-taⁿ男丁,就有六十萬人」。In數算人口,指男丁ê時chūn,是用年齡「二十歲以上ē-tàng作戰ê cha-po͘人」計算(參考民數記一:18、20),tī第三十八章26節koh一pái說明「人數tī二十歲以上ê共計六十萬三千五百五十名」,chit-ê數目是用繳交聖幕負擔金來算。若koh加上「真chē外族人」,chit種話,出埃及ê人數至少高達一百五十萬人以上,甚至二百萬人,lóng是真有可能ê數目。

第38節講「真chē外族人」也kah以色列人民同齊出埃及。因為án-ne,出埃及並m̄是只有以色列人而已。Chiah-ê外族人真可能是以色列人ê家僕,á是埃及人ê奴隸,趁機會跟tòe以色列人出埃及。M̄-koh,chiah-ê人後來tī曠野ê時,mā時常成做以色列人維持秩序ê頭殼痛人物(參考民數記十一:4)。Á摩西kah亞倫tio̍h chhōa chit一大陣人tī曠野行動,iáu包括cheng-seⁿ在內,卻m̄是一件容易ê事,若m̄是上帝引chhōa,恐驚早to̍h tī曠野結束以色列民族ê性命。

第40到42節,chia講以色列人總共tī埃及tòa「四百三十年」。這kah創世記第十五章13節;使徒行傳第七章6節等等記載ê「四百年」無仝。基本上,無論是四百三十年,á是四百年,lóng teh說明he是一段真久長ê時間,á in lóng已經bē記得祖先kah上帝之間所立ê約。

第42節講上帝「親自保守in,引chhōa in出埃及」,這表示是上帝帶領以色列人出埃及,m̄是摩西,chit點一定tio̍h清楚。以色列人就用出埃及chit工kā前一晚ê Pôaⁿ過節當做性命更新ê記號,一定會嚴格遵守。



重新查詢 專卷研經 出埃及記系列
錯誤回報,請聯繫comm[@]fhl.net