以弗所書 1章15節 到 1章23節   背景資料  上一筆  下一筆
Ná親像頭前提起過ê,此書信siōng中心ê思想是tī第22到23 節講ê,基督就是教會ê元首,教會是耶穌基督ê身軀。換句話講,所有信耶穌ê人,lóng是結連tī耶穌ê身上,因為án-ne之故,tī基督ê名而形成ê信仰團契,彼此之間是無貴重á是卑賤ê分別,á是大kah小ê區別。因為人人lóng是屬tī基督耶穌救贖ê對象,lóng是屬tī一個共同信仰團契一份子。

第15到17節,使徒保羅聽tio̍h以弗所教會信徒有真好ê信心,表現tī彼此之間ê相疼,這是伊siōng感覺欣慰ê事,為tio̍h án-ne,伊對上帝獻上感謝。注意第17節chia所講「聖神會hō͘ lín智慧」,chia「智慧」一詞,是teh指「認bat上帝」ê意思,是明白有關上帝ê事。一個人ē-tàng明白上帝ê事,m̄是靠tio̍h人家己ê努力á是能力,mā m̄是因為人ê學識背景,卻是tùi上帝來ê啟示(請參考哥林多前書一:21—25)。

第18到20節,使徒保羅為所有閱讀此書信ê人代禱,懇求天父賞賜hō͘閱讀ê人有智慧,明白上帝ê旨意,特別是明白上帝行了大能奇事,並hō͘耶穌tùi死裡koh活,hō͘ koh活ê耶穌基督tńg來到天頂。

第21到23節,koh活ê基督,就是一切ê主宰,統治tio̍h一切萬有,特別是教會ê頭。所有屬tī基督名號ê教會,就是基督ê身軀。這說明兩項基本認bat:甚麼人分裂了基督ê教會,等於teh分裂基督身軀仝款。Tī基督ê教會內,無任何人ē-tàng自視比別人koh khah貴重。因為真正信仰中心,m̄是teh指某一個人,卻是tī koh活ê基督。

重新查詢 專卷研經 以弗所書系列
錯誤回報,請聯繫comm[@]fhl.net