申命記 8章1節 到 8章10節   背景資料  上一筆  下一筆
Chit章是一篇非常好ê講章,chit篇ê主題khǹg tī「曠野」。曠野,這原本是出埃及記ê主題中心。上帝ài摩西去kā埃及國王講,hō͘以色列人民離開埃及,去「曠野」敬拜祂。Mā因為是聽tio̍h去曠野ê緣故,hō͘埃及國王相當看bē起以色列人民ê上帝,認為祂是真無水準ê上帝,是一個甚麼lóng無ê上帝。M̄-koh上帝就是beh hō͘埃及國王kah人民知影,甚麼是曠野?為甚麼是曠野?埃及國王kah人民是付出真大ê代價chiah認bat chit位創造萬物ê上帝,是帶領以色列人民行出埃及、進入曠野,然後koh帶領in進入siōng肥ê土地ê上帝。Á這曠野對以色列人民有相當重要ê意義,是轉換性格、生活態度,kah信仰確認ê所在。

申命記作者認為,上帝訓練以色列人民siōng重要ê所在,就是tī曠野訓練摩西四十年,然後差派伊去埃及帶領以色列人民出來,續落來tī曠野漂流經歷四十年之久,chiah會得thang進入迦南地。有曠野ê經歷,chiah有迦南流奶kah蜜之地ê福份thang承受。因為án-ne,曠野m̄-nā tī出埃及記是真重要ê一個中心主軸,包括民數記,kah chit-má所讀ê申命記lóng是kā焦點khǹg tī 回憶曠野漂流時代ê各種記事。

Chit段經文koh一pái強調一個中心信息:ē-tàng hō͘以色列人民安然經過四十年曠野漂流生活,m̄是因為in有甚麼本等,mā m̄是因為in家己雙手之力,卻是因為上帝teh指引。作者因為án-ne特別提醒以色列人民一定tio̍h tiâu tiâu記tiâu,遵守kah上帝ê約,忠實tī上帝,án-ne chiah ē-tàng永遠存活。

第1到3節,tī chit-ê三節經文中就是先提醒in「一定tio̍h切實遵行」上帝ê一切律法,án-ne,in chiah ē-tàng生存落去,chiah ē-tàng tī上帝應允ê土地上蒙福。然後作者ài in回想beh tī曠野漂流四十年期間所經歷過ê一切,到處lóng lóng是上帝ê考驗,為tio̍h是beh hō͘ in謙卑落來,boài認為家己真有辦法,卻是因為有上帝。上帝tùi天頂降落in從來無食過ê嗎哪,hō͘ in學習tio̍h一個性命功課:「人ê生存m̄-nā是靠食物,卻是靠上主所講ê每一句話。」第3節說明人性命ê存在m̄-nā是tī肉體上ê,mā是tī心靈上ê。人ê心靈上會得thang滿足,就ē-tàng贏過肉體上ê欠缺。顛倒,人如果tī肉體上不欠缺,卻tī心靈上缺乏上帝,則會一再感受tio̍h性命ê bē滿足、有欠缺(參考阿摩司書八:11—12)。

第4到6節,chia特別提起以色列人民雖然是行艱困ê曠野,m̄-koh in lóng安然無恙,原因是上帝對待in,「像老父管教伊ê kiáⁿ」仝款,雖然嚴厲,卻是充滿tio̍h慈愛。因為án-ne,謹守上帝、誡命、律法,就是生存之道。

第7到10節,chia真清楚描述上帝應允beh賜hō͘以色列人民khiā起ê土地,確實是流奶kah蜜之地,會hō͘ in食得飽,無koh有任何缺乏,因為he是一塊富饒、肥ê土地。

重新查詢 專卷研經 申命記系列
錯誤回報,請聯繫comm[@]fhl.net