第廿九到三十這兩章是摩西第三段ê講詞。Tī chit段講詞中，siōng主要是koh一pái表明「重新立約」ê重要性，mā tùi chit點thang看出以色列人民kah-ná bē記得過去立約ê精神kah背景。所謂 「重新立約」，並m̄是有甚麼特殊ê新內容，卻是kā過去ê約koh一pái提起，hō͘ in知影實況到底是怎樣一回事。因為án-ne，聖經學者認為這部分真可能是tī被掠到巴比倫了後ê作品，因為in tī亡國了後有深刻ê反省，知影之所以國家會滅亡，是bē記得kah上帝之間所立ê約所致。

Chit段經文是koh一pái提起過去出埃及進入曠野ê歷史。Tùi chia ē-tàng看出以色列人民對歷史ê重視，因為bē記得出埃及ê歷史，等於是bē記得上帝ê救恩仝款ê嚴重。

第1節，chit節提起何烈山ê約，mā提起tī約旦河東岸摩押平原koh一pái立約ê經過。這teh表明以後以色列人民每年lóng會有一pái，kah上帝間所立ê約重複敘述一pái。

第2到4節，重新敘述tī出埃及chìn前，發生tī埃及國王kah人民身上ê災難，用此來提醒以色列人民謹記一點：不聽從上帝，發生tī埃及人身上ê災難，mā會發生tī in身上。

第5到8節，chit段經文是講述in tī離開埃及了後，進入曠野漂流四十年期間所tú-tio̍h ê經歷之濃縮。

第9節，koh一pái提醒以色列人民tio̍h確實遵守上帝ê誡命。