Chit章律法規定比較零散，比較值得注意ê，是tī第5到10節ê規定，說明延續家族性命好保護土地。

第1到3節ê chit段經文，是舊約聖經第一pái提起有關鞭刑ê細則，規定只有ē-tàng鞭phah三十九下，無法度超過四十下。這真可能是因為「四十」chit-ê數目，表達ê意思是teh指「完全」。因為摩西tī埃及王宮「四十」年、tī曠野「四十」年，chhōa以色列人民tī曠野經過「四十」年。Koh講，無法度超過「四十」下，mā是teh表示he是一個人所ē-tàng忍受ê siōng koân 本等，如果超過，hit-ê受刑ê人會有性命ê危險，因為án-ne，只有ē-tàng phah到三十九下，免得因為多phah一下，造成死亡，就變成死刑à。使徒保羅bat提起家己為tio̍h傳福音被鞭phah過三十九下（參考哥林多後書十一：24）。

第4節，chit節說明申命記ê特點，就是m̄-nā關心人，mā關心到動物ê需要（參考廿二：4、6—7）。新約時代，使徒保羅bat引用此節經文講tio̍h有關傳道者接受酬勞ê事（參考哥林多前書九：9，提摩太前書五：18）。