申命記 24章6節 到 24章22節   背景資料  上一筆  下一筆
Chit段經文lóng是屬tī社會生活ê規範。

第6到7節,「磨石」,這是每一個家庭生活必備ê器具,the̍h走人家ê磨石作抵押,等於是hō͘債務人陷入生活困境,是m̄-tio̍h ê。第7節mā thang參考出埃及記第廿一章16節,禁止欺壓窮乏人,kā無法度還債ê sàn-chhiah人販賣為奴,是惡質ê行踏,應該處死。這kah以色列人民bat tī埃及當過奴隸ê經驗有關,主要teh警告in,bē-tàng逼sàn-chhiah人行上絕路。

第8到9節,所謂「患tio̍h傳染性ê皮膚病」,是teh指癩ko病á是瘟疫,按照當時ê規定,患者一定tio̍h被隔離起來(參考利未記十三:45—46),這mā是Tī當時醫藥常識á是藥材相當缺乏ê時代唯一thang阻絕傳染病繼續擴大ê方式。無論是甚麼人,即使是摩西ê阿姊美莉安mā是仝款(參考民數記第十二章),無法度因為是摩西ê阿姊就享有特權。Beh保持一個民族整體ê福利、生存,就一定tio̍h一視同仁。

第10到13節,不准進入債務人ê厝搜刮財物,一定tio̍h是債務人家己感覺thang當做抵押ê物件,親自the̍h出來hō͘債權人chiah thang,尤其是衫褲,he是遮蓋禦寒用ê,絕對bē-tàng作抵押品。因為tī巴勒斯坦,早暗溫差非常大,暗時sàn-chhiah人若是無外衫,就失去用來取暖ê蓋被à。

第14到15節,這是對雇工生活ê一種保障方式,避免窮乏ê雇工陷入生活困境。就算是寄居tī in中間ê外僑,mā一定tio̍h受tio̍h基本生活ê保障。這mā是一種bē-tàng欺負外僑ê律法規定。

第16節,chit節清楚說明甚麼人犯罪,甚麼人負責(參考耶利米書三十一:30),bē-tàng牽連別人。Án-ne thang避免有權勢者對弱勢者抄家ê惡質行踏,á是因為kah全家m̄ kah,á故意陷害入罪。

第17到22節,chit段經文mā thang參考利未記第十九章9節、第廿三章22節等等。Chia特別一再重複提起tio̍h關心孤兒、寡婦、外僑等生活ê需要,hō͘ in有基本生活ê條件。因為in lóng是社會上siōng弱勢ê人。Á會有chit種規定,lóng kah以色列人民過去tī埃及當過奴隸,知影弱者被欺負á是被疏忽ê性命苦難。Chit點kah今á日台灣對所謂「低收入戶」一定tio̍h hō͘ in生活補助仝款ê意思。

重新查詢 專卷研經 申命記系列
錯誤回報,請聯繫comm[@]fhl.net