申命記 2章1節 到 2章25節   背景資料  上一筆  下一筆
Chit章thang分做兩個部分,一是第1到25節,是一個簡短歷史ê回顧。第二部分是第26到37節,描述in phah敗亞摩利人ê經過。

Chit段經文kā過去歷史做一個回顧kah簡述。Chit段回顧ê事件lóng是發生tī約旦河東岸ê南部,kui個過程長到了三十八年ê時間。Koh講,chia提供三個民族是不准以色列人民kah in交戰ê對象,一是以東人,in是以掃ê後代,以掃是雅各ê孿生兄哥。Koh講是摩押人kah亞捫人,in lóng是羅得ê後代,因為上帝bat應允羅得後代khiā起生活ê地區,因為án-ne,上帝禁止以色列人民佔領á是攪擾in。

第1節,chit節是回應第一章40節。

第2到6節,chit段經文thang參考民數記第二十章14到21節,提起有關以色列人民一定tio̍h經過以東人ê地區。Chia講以東人驚惶以色列人民,m̄-koh上帝禁止以色列人民「向in挑戰」,原因是上帝早就kā以東人khiā起ê土地賞賜hō͘ in。不過,ē-tàng向in購買所需要ê食物kah飲料。

第7節,提醒以色列人民一定tio̍h遵守上帝ê命令,就會有滿足,bē有任何欠缺。因為有上帝同在,就有一切。

第8到9節,chia提起in來到摩押人地方。上帝mā是仝款,不准in「攪擾摩押人,á是向in挑戰」,原因是摩押人mā是in ê遠親,是羅得ê後代,á羅得是亞伯拉罕ê姪á。

第10到12節,上帝既然kā土地賞賜hō͘摩押人khiā起,就會幫助摩押人phah敗比in身材iáu koh khah魁武ê原住民。這已經teh隱喻,ài以色列人民m̄免驚惶迦南地ê人jōa-ni̍h-á高大、魁武、強悍,只要上帝決定beh hō͘以色列人民進入迦南地khiā起,上帝就會幫助in得tio̍h hi̍t 所在。Ná親像chia所講ê,上帝幫助摩押人得tio̍h chit片土地。

第13到15節,chit段經文只有講離開埃及ê第一代以色列人民lóng往生,並無說明經過這長到三十八年時間,in第一代ê人民Tī曠野中所tú-tio̍h ê各種經歷。Á chiah-ê lóng tī出埃及記kah民數記有koh khah chē詳細ê描述。

第16到19節,chit段是講以色列人民新生代開始接棒,繼續行到亞捫人ê地區。Ná親像經過以東人kah摩押人ê地區仝款,上帝mā是不准in「攪擾亞捫人,á是向in挑戰」,原因是亞捫人kah摩押人lóng是羅得ê kiáⁿ孫(參考創世記十九:30—38)。

第20到23節,ná親像tī第10到12節ê記事仝款,chia講上帝幫助亞捫人phah敗當地ê原住民,即使當地「散組明」人ê身材高大,人口眾多,是強悍ê民族mā是仝款。

第24到25節,chit兩節講上帝允准kā亞摩利人ê土地hō͘以色列人民,因為án-ne,以色列人民chiah ē-tàng kah in作戰,而且佔領in ê土地。Mā因為án-ne,hō͘各地ê原住民一聽tio̍h以色列人民,lóng驚惶「驚惶phi̍h-phi̍h-chhoah」。Án-ne,in往迦南地推進ê時,就會順利。	

重新查詢 專卷研經 申命記系列
錯誤回報,請聯繫comm[@]fhl.net