Chit段經文lóng是講tio̍h有關以色列社會領袖ê問題。做一個領導者，非常重要ê工作，就是beh排解人民彼此之間ê糾紛，親像解決財產ê問題、傷害ê問題等。Koh講，做一個以色列民族ê領導者，一定tio̍h帶領人民堅持遵守敬拜ê誡命，chit點chiah是chit段律法ê基本精神所在。換句話講，chit段經文mā說明一點：ài做以色列人ê社會領袖，基本條件是beh有堅定ê信仰，對信仰有真清楚ê認bat，chit種人chiah ē-tàng tī人民中間成做領導者。因為好ê信仰者，bē接受o͘-se（參考十六：19），因為伊知影伊ê審判是teh代表上帝teh執行公義。另外一個特點：bē-tàng為家己積存金銀，貪圖財富（參考十七：17），chit種領袖chiah bē驕傲，á忽略因為sàn-chhiah受冤屈ê人。

Chit段經文講tio̍h有關設立審判官處理人民之間糾紛ê事。Chiah-ê審判官ê選派，是一件相當重要ê事，基本要件是信仰。

第18到20節，有人ê所在，就會有糾紛，這是人ê軟弱。因為án-ne，ài tī各城鎮設立審判官，á chiah-ê審判官ê基本要求是：1.公正無私，不濫權。

Bē-tàng接受o͘-se。正確地講，一個公正ê審判官，就bē接受o͘-se。會接受o͘-se，就bē是公正ê審判官。3.公正ê審判官會公正執法。只有tī chit種條件下，人民kah社會chiah會安定，有安定ê社會生活，chit種社會chiah ē-tàng長居久安落去。這mā是一般常講ê「司法是一個國家、社會安定最後ê底線」。