申命記 12章29節 到 13章18節   背景資料  上一筆  下一筆
Chit段經文lóng是teh嚴厲警告以色列人民千萬m̄-thang棄sak上帝,去拜偶像神明。若無,一定會引起上帝ê忿怒。Á為防止tī以色列人民中間出現chit種誘惑人民棄sak上帝ê人,只要查出來,一定會Kā chit種人處死,連siōng親近ê人mā仝款,bē-tàng對chit種人存任何憐憫ê心。

第十二章29到30節,chit段經文thang對照第十二章1到3節,就ē-tàng清楚看出以色列人民進入迦南地了後,並無能力kā外族人á是當地原住民驅趕伊去。因為若是有能力,就m̄免擔心學習當地風俗kah宗教禮儀ê行為出現。

第31節真重要,chia講bē-tàng kā迦南人拜偶像神明ê禮儀引進耶和華宗教敬拜禮儀中。換句話講,bē-tàng用拜偶像神明ê方式摻雜teh敬拜上帝ê事頂面。這就表示bē-tàng參觀、拜訪、詢問。M̄-koh事實上,後來以色列人民進入迦南地後,深受當地ê宗教行為影響,連國王lóng用in獻人為祭ê方式,祭拜偶像(參考列王記下十六:3、十七:17、廿一:6、廿三:10)。表示in m̄-nā無執行上帝警告,反tńg是領導者故意帶頭犯錯。

第32節,chit節原本tī希伯來聖經是編輯tī第十三章1節。表明上帝ê命令、誡命、律法、規章、律例等,lóng bē-tàng隨便加添á是更改。因為這是hō͘以色列人民成做聖潔上帝子民ê基礎。

第十三章1到5節,chit段經文提起有假先知出現tī以色列人民中間,chiah-ê人會假借上帝ê名義講虛假ê信息,攪亂人民對上帝忠實ê心。特別是chiah-ê人mā會行神跡奇事來迷惑人跟tòe in棄sak上帝。因為有chit種人出現,tú好thang考驗以色列人民是m̄是對上帝忠實,是m̄是真心跟tòe上帝ê誡命做tāi-chì。摩西特別交帶,若有發見chit種迷惑人心棄sak上帝ê人出現,就算in有能力行神跡奇事,mā tio̍h Kā chit種人hō͘處死。因為以色列人民惟有一位上帝,就是帶領in行出埃及奴隸之地ê上帝,其他ê lóng無算是真正神,絕對bē-tàng敬拜。

第6到11節,前段講tio̍h有假先知á是解夢者出現,chia是tī家族中siōng親密ê人來誘惑,就算是siōng親近ê人,mā tio̍h Kā chit種人除掉,無論是tī公開場合,á是tī暗中傳達信息迷惑人心棄sak上帝,對chit種人lóng mài有任何一絲絲憐憫,一定會除掉,án-ne chiah ē-tàng嚇阻迷惑人心棄sak上帝ê行為。Tī第9節強調懲罰chit種人ê方式,就是用石頭phah死,表示chit種人ê行為是到à褻瀆上帝之程度,罪bē-tàng赦。

第12到18節,chit段經文講tio̍h tī城市內發生ê事。因為城市內人chē,容易隱藏chit種誘惑人心棄sak上帝之行踏,因為án-ne,chia規定koh khah嚴格,只要查到chit種人出現tī某一個城市,就beh kā hit-ê城完全、徹底ê消滅,連hit-ê城ê財貨lóng bē-tàng存留。因為城市人chē勢眾,影響力mā大,若無án-ne處置,一旦擴散開來,就真oh挽救tńg來。

重新查詢 專卷研經 申命記系列
錯誤回報,請聯繫comm[@]fhl.net