但以理書 9章20節 到 9章27節   背景資料  上一筆  下一筆
Tī前一段經文看tio̍h但以理ê祈禱文內容中,伊懇求上帝m̄-thang受氣,對以色列人民犯罪ê事懇求上帝息怒。因為耶路撒冷聖殿已經遇tio̍h安提阿哥四世ê褻瀆到慘不忍睹。Á耶路撒冷聖殿ê毀壞所代表ê意義,乃是上帝無koh繼續kah以色列人民同在,因聖殿所代表ê是上帝臨在以色列人民中間。

現在chit段經文siōng主要是記載上帝ê天使加百列來對但以理講話。Tī第八章bat記載天使加百列奉上帝之命幫助但以理解讀伊所看tio̍h ê異象,現在則koh奉命來幫助但以理明白伊所讀ê經文中,有關先知耶利米所預言ê「七十年」之事件。比較khah特別ê是,chit段經文並無說明但以理聽天使加百列解釋了後有甚麼回應,這kah一般解夢後ê反應無jōa仝款。

第20到23節,ná親像頭前講過ê,第20節mā thang續接tī第3節了後,因為án-ne讀起來mā是真順口ê。但以理祈禱中一個重要ê內容,就是「承認」犯罪。就tī伊向上帝祈禱ê時chūn,上帝差派天使加百列以「飛」ê方式,真緊來到但以理ê祈禱中。Chia講時間是tī「獻晚祭」ê時chūn,這大概是tī下晡五點á是六點ê時,通常以色列人民lóng是以日頭落山ê時間為準。天使加百列kā但以理講上帝已經聽伊ê祈禱,並且差派伊向但以理解釋chìn前提起有關先知耶利米所講有關「七十年」預言ê事,上帝beh賞賜hō͘但以理有夠額ê「智慧」ē-tàng「明白」上帝啟示ê預言。

第24到25節,chia講「七個七十年」,這先注意以色列文化中對數目的看法,in ài用數字來teh代表象徵性ê意義。「七」所代表ê是「神聖ê」、「有福氣ê」、「圓滿ê」,是含有上帝旨意在內面ê特殊數字,因為kah上帝創造天地完成ê時間有密切關係。Án-ne看起來,tī chia ê「七個七十年」,chia ê「七個」應該是一種表徵「加倍」ê意思,意思是teh指hō͘ in tī七十年ê奴隸生活中「加倍」痛苦。Mā是teh警告以色列人民一定tio̍h透過受掠做奴隸ê痛苦,知影懺悔認罪。若無,kan-taⁿ會為in帶來koh khah大ê災難,延長了上帝懲罰in ê時間,直到in「完全」、「徹底」悔改為止。Chit時上帝beh赦免以色列人民ê罪惡,帶kā in賜福「永久ê正義」。然後上帝beh hō͘耶路撒冷城tī經過「七個七年」了後ē-tàng重新建造起來。

第26到27節,chit兩節就非常清楚談起但以理書作者真正想講ê事loh;因為tī chia所講ê時間就是伊tī主前第二世紀,mā就是安提阿哥四世ê時代。

第26節一開始提起「過了chit時期」,chit句話一定tio̍h tńg來到第25節最後所提起ê耶路撒冷kā「khiā立七個六十二年」。Tùi主前538年到經過「七個六十二年」,mā就主前104年ê時chūn。

Chia所講ê「上帝選出來ê領袖會hō͘枉刣」,可能是teh指tī主前171年有一位重要ê大祭司名叫阿尼亞三世(Onias ṲI),伊ê兄弟耶孫(Jason)用錢o͘-se統治者,奪取伊ê大祭司ê職位,並使弄人kā伊刣死(參考馬加比傳下四:7—8、33—38)。Chia mā提起耶路撒冷城kah聖殿「會hō͘一個王侯ê入侵軍隊所摧毀」,這是teh指主前168年,安提阿哥四世帶兵進入耶路撒冷城,劫掠了聖殿所有ê貴重器物,並tī聖殿ê祭壇頂刣豬。Á「結局kā像大水沖來」,thang想像ê到大水沖來了後,就是一無所有,koh khah sêng是毀滅一般,m̄-nā是財產被毀,性命mā lóng會遭遇到極大ê損傷。

Chia mā提起「締結盟約七年」,這是安提阿哥四世當皇帝ê時間。Chit句話裡是teh譴責一kóa棄sak家己同胞ê猶太人,當安提阿哥四世掌權了後發生ê事。根據「次經—馬加比傳上」第一章11到15節ê記載有以色列人民kah統治者勾結,鼓勵同胞接受安提阿哥四世嚴厲推行ê「希臘化」。M̄-nā án-ne,in mā拒絕koh再接受祖先kah上帝之間立約ê記號—割禮。

Chit節ê「ná毀滅性ê thang憎ê物」chit句話,tī第十一章31節koh一pái提起,chit句話mā被耶穌基督引用來形容末日來臨ê景象,並且提醒大家tī大災難發生ê時,tio̍h注意防範ê方向。

Chit句「ná毀滅性ê thang憎ê物」就是tī指安提阿哥四世是褻瀆聖殿神聖ê人,伊kā希臘神像khǹg tī聖殿ê至聖所中。上帝ê憤怒絕對bē罷休,一定會懲罰伊,直到伊死亡為止,這神像chiah會被移行。

重新查詢 專卷研經 但以理書系列
錯誤回報,請聯繫comm[@]fhl.net