但以理書 9章1節 到 9章19節   背景資料  上一筆  下一筆
Kā第九章kui章讀落來,就會發現第3節了後原本是接上第21節,可能是後來編者加筆添入了第4到20節chit段祈禱文。不過mā有聖經學者認為原本就有一篇祈禱文,是後來編者teh編撰chit本經冊ê時,發現仝款有關係耶路撒冷預言ê事(第2節kah第24節),而且lóng kah先知耶利米ê預言有關,因為án-ne,認為kā chit兩份資料放做伙會koh khah清楚。M̄-koh無論是甚麼款ê看法,lóng有一個共同ê主題:耶路撒冷城會koh一pái復興。作者主要目的ná親像頭前所講過ê,beh鼓勵mā安慰受難ê猶太同胞。希望chiah-ê話ē-tàng鼓勵in有koh khah堅定ê信心,m̄-thang改變心志而棄sak原有ê信仰,上帝一定會伸出援手拯救in脫離苦難。

    Chit段經文是但以理tī靈修ê時,有感tī先知耶利米ê預言以色列人民會koh再被掠到外國去,耶路撒冷會荒廢長到七十年時間ê事,禁bē-tiâu一陣悲傷tùi心底油m̄-koh生,因為án-ne,伊向上帝懇切祈求。

    第1節,chia ê「亞哈隨魯」,就是「薛西」(Xerxes)王,伊是tī主前486到465年執政,m̄-koh大流士王並m̄是伊ê kiáⁿ,顛倒ê,應該是大流士一世(DariusI)是亞哈隨魯王ê老父chiah-tio̍h。

第2到3節,chia提起但以理tī靈修ê時,讀聖經提起有關先知耶利米ê預言ê tāi-chì,chit段經文thang參考耶利米書第廿五章9到14節,上帝藉tio̍h先知耶利米傳出信息,講猶大人民會tī巴比倫teh過奴隸ê生活長到七十年。伊為tio̍h án-ne事悲傷到禁食、穿麻衣、坐tī塵埃上「懇切地」地向上帝祈禱。

    第4節,tùi chit節開始,是但以理以非常哀傷痛悔ê心teh祈禱,懇切求上帝赦免伊ê同胞所犯ê罪過。Tī這節伊提起兩點;一、上帝是信實ê,祂「信守」所立ê約。二、上帝有「無變ê疼」。

    第5到6節,但以理tī chit祈禱文中承認家己所犯ê錯誤,伊提起違背「約」ê主要原因,並m̄是in m̄知á是bē記得,卻是故意違背,因為上帝bat派出僕人先知對以色列ê領導者kah全國國民講話,ē-sái講是無人想beh聽。先知以利亞、耶利米等lóng bat有嚴厲ê控訴。M̄-nā án-ne,in iáu kā上帝ê僕人刣死(參考列王記上十九:10)。

    第7到8節,tī chit兩節中,但以理強調上帝ê作為「頭尾公正」,可惜ê是「猶大kah耶路撒冷ê居民」卻因為悖逆上帝ê旨意、教導而被異國統治,以色列人民被流放到各國去。拒絕上帝ê話,結果只是「自取其辱」而已。

    第9節,這是真重要ê一節,但以理講雖然以色列人民悖逆上帝ê旨意,m̄-koh上帝á是仝款以「憐憫」、「赦免」對待以色列人民。

    第10到14節,chit段經文是但以理繼續前一段懺悔祈禱文,Tī chit段懺悔祈禱文中,重要是teh表明:

一是表明上帝是公義ê神,祂無冤屈人,因為án-ne以色列人民受嚴厲懲罰乃是罪有應得。
但以理提起耶路撒冷被毀滅,乃是罪有應得,並m̄是冤枉。伊特別提起耶路撒冷城所受tio̍h ê懲罰比任何一個城市受懲罰iáu koh khah嚴厲,m̄-koh chit種懲罰並無冤枉,卻是公義ê上帝確實遵行kah以色列人民之間所立之「約」。

二是即使受tio̍h懲罰,mā堅信上帝ê懲罰是公正ê。Chit點是chit篇祈禱文ê中心內容之一,tī第7節、第14節等等lóng強調上帝ê審判是公正ê。當聖經teh描述上帝是公正ê時,mā有另外一個意思,就是teh指上帝乃是慈悲憐憫ê上帝。

三是雖然án-ne,以色列人民á是無認罪、懺悔。這真清楚teh說明以色列人民確實是心硬、固執。

第15節,但以理koh一pái提起上帝用祂「大能」ê手帶領以色列人民「出埃及」,chit件事一直是in永遠無法度bē記得ê事。M̄-koh以色列人民卻頭尾無停ê「做pháiⁿ犯罪」。

第16節,但以理mā是tī祈禱中koh一pái懇求上帝息怒。因為上帝ê懲罰已經hō͘附近族群、國家lóng用「輕蔑」ê眼光看待「耶路撒冷」kah以色列人民。

第17到19節,chit三節經文一再重複但以理向上帝祈求「垂聽」伊ê祈禱。伊特別提起被毀壞ê耶路撒冷「聖殿」。Tio̍h注意ê是但以理並m̄是teh控訴安提阿哥四世褻瀆聖殿ê行踏,卻是teh懇求上帝赦免憐憫伊ê以色列同胞,就是因為in ê犯罪,chiah致使in原本看做siōng神聖ê所在mā遇tio̍h仇敵ê褻瀆、詆毀in tùi祖先傳承落來siōng神聖之地。但以理知影耶路撒冷城遇tio̍h摧毀乃是上帝對以色列民族嚴厲懲罰ê結果,因為án-ne,伊懇求上帝赦免、息怒,m̄-thang再生氣,並且hō͘耶路撒冷城重見光明,thang hō͘聖殿顯現出上帝ê榮耀。因為以色列人民若是有完好ê耶路撒冷城,in就ē-tàng重新tī聖殿用隆重ê禮儀來敬拜上帝。Koh講,但以理祈求上帝施下特別恩典—大憐憫,卻m̄是以色列人民有甚麼值得o-ló á是值得上帝看做美好ê事。卻是如果上帝照祂ê公義行審判,必定會為以色列人民帶來無法度承受ê重擔,甚至kui個民族lóng有可能滅亡。因為án-ne,但以理tī chia提出了懇切地ê哀求,求上帝憑祂ê「大憐憫」來接納以色列犯罪ê同胞。

重新查詢 專卷研經 但以理書系列
錯誤回報,請聯繫comm[@]fhl.net