但以理書 7章1節 到 7章14節   背景資料  上一筆  下一筆
Tùi第七到十二章,這是屬tī但以理書ê第二部分。這部分全部lóng是屬tī但以理個人看見ê異象,一般來講lóng kā chit部分納入聖經中屬tī「啟示文學」ê類別。Tī這部分siōng有趣味ê事是,頭前六章講但以理有聰明ê智慧,會解夢,甚至連巴比倫王尼布甲尼撒bē記得ê夢,伊lóng ē-tàng替國王chhōe tńg來,而且iáu會解夢,hō͘國王清楚明白伊所做ê夢,á是所看見ê異象ê意義。Ē-sái講是,現在輪到家己看tio̍h異象,卻無法度明白到底是怎樣一回事,並且家己mā會驚惶、煩惱所看見ê異象,ná親像伯沙撒所看見ê異象仝款,因bē明白夢ê意思而擔憂,iáu koh khah詢問出現tī伊面前ê天使chiah得tio̍h明白。

第七章ē-sái講是但以理書中siōng中心ê一章,因為chit章tú好thang kā頭前部分kah後面部分做一個連結。特別是tī第七章讀起來就kah-ná似bat相識ê款,原來tī第二章有記載尼布甲尼撒王bē記得家己ê夢,被但以理chhōe tńg來,但以理講這夢談起有四個帝國。Tī這第七章裡,mā是談起有四個帝國,而且lóng是第四個帝國siōng強大。

「四」,chit-ê數字tī以色列文化中有真特殊ê意義,它teh表示「普遍」á是「適當」ê意思。「四」ê倍數就是「四十」,chit-ê數目咱就比較khah熟悉à。親像摩西tī埃及王宮「四十年」、tī曠野「四十年」、以色列人民tī曠野漂流「四十年」、耶穌基督tī曠野接受試探「四十工」等等,lóng kah「四」有關。

Chit段經文是但以理看見ê異象,án-ne包括四頭怪獸tùi海裡出來,這四頭怪獸分別像獅、熊、豹,以及一隻十角獸等。另外ê異象是看見寶座頂坐teh ê「萬古永存者」,有上千上萬甚至是上億ê人khiā tī其面前。續落來tī暗時ê異象中看見一位kah-ná人子ê出現。M̄-koh伊卻無法度理解chiah-ê異象ê意思。

    第1到3節,「伯沙撒做巴比倫王ê第一年」,chit句話並m̄是史實ê資料。作者是想藉用chit種方式kā第七章了後ê後半部kah頭前六章ê部分連結起來。因為重要ê乃是teh記述但以理看見ê異象,卻m̄是伯沙撒當巴比倫帝國ê王。

「異象」,這是超出一般人所ē-tàng瞭解ê圖像,mā thang當做是一種夢境。第3節講這異象包含tio̍h「四頭巨獸tùi海裡起來」。Tī以後ê經文中描述chiah-ê「巨獸」mā thang當做「怪獸」理解。

第4節,這是「第一頭巨獸像獅」,m̄-koh m̄-nā有「la̍h-hio̍h ê翼股」,mā「有人ê頭腦」。獅,Tī聖經中代表兇猛ê動物,mā thang當做雄壯ê軍隊。先知耶利米就bat kā巴比倫帝國譬喻成像獅仝款(參考耶利米書四:7、四十九:19),形容軍隊雄武堅強,無國家ē-tàng抵擋仝款。Chit節講但以理tú-teh看chit隻巨獸ê時chūn,忽然間看tio̍h巨獸ê翼股被剪除了,這表示巨獸無法度koh再飛了,而且需要藉tio̍h其他ê氣力chiah ē-tàng khiā穩。

第5節,chia提起第二頭巨獸像「熊」,牠ē-tàng「用兩隻後腿khiā立」,而且嘴齒「咬tio̍h三根胸坎á骨」,這是teh指波斯帝國tī主前546年征服了kui個波斯灣地區,並且tī主前538年消滅了巴比倫帝國,然後tī主前525年phah敗埃及。

第6節,第三頭巨獸是親像「豹」。這是比熊iáu koh khah兇殘ê動物,特別ê所在是tī牠ê尻脊骿有「四個」像鳥仝款ê「翼股,koh有四個頭」。Chia ê頭表示四個統治者,包括:塞魯士、大流士、亞達薛西(Artaxerxes)、薛西(Xerxes)等四位。

第7到8節,這是第四隻巨獸,m̄-koh chit隻巨獸siōng特別,長相mā siōng奇特,m̄-nā有「大鐵牙」,mā有「十個角」,然後tī chiah-ê角中,生出一個「小角」,而且chiah-ê小角「Kā原有十角ê三個拔掉」。Koh khah恐怖ê是這小角「有人ê目睭kah一章講誇大話ê嘴巴」,這明明是怪物中ê怪物,莫怪一開始就講chit隻巨獸看起來「hō͘人恐怖」。

第9到10節,chit兩節提起一個新ê場面,就是「萬古永存者」出現坐tī祂ê「寶座頂」,續落來講「伊宣佈開庭」,並且kā「案卷」掀開來,ài beh進行審判ê工作。

作者以東方社會官場ê審判場面形容上帝ê審判情景。Chit種描述審判者出現ê特徵,有「潔白」ná親像雪仝款ê衫褲,ná親像光一般ê火燄,但以理書ê作者講「萬古永存者」,指ê就是上帝。祂出現ê時m̄-nā有頂面所講chiah-ê景象,koh khah特別ê,乃是tī祂ê身邊有千千萬萬ê服事者。

Chiah-ê服事者主要就是聽從上帝ê差遣,去執行上帝所命令in ê工作。

第11到12節,這是真值得注意ê兩節經文,因為chia提起tāi先被懲罰ê,乃是第7節所提起ê ná第四頭巨獸,而chit隻是siōng hō͘人看了就感覺恐怖驚惶ê怪獸,牠被審判者刣死。Á前述ê另外三隻則只有剝奪「權柄」而已。會án-ne處分ê原因,是kah第8節以及11節所提起「講誇大ê話」有關係。因為「講誇大ê話」表示驕傲、狂傲,而這tú好lóng是歷代真chē殘忍ê統治者siōng典型ê問題。

第13到14節,chit兩節ē-sái講是但以理書中siōng重要ê一段經文,chit段經文之所以重要,是因為chia提起一個重要ê名詞「人子」,被福音書引用來teh代表耶穌基督ê身分(參考馬可福音九:9、十四:62)。

「人子」chit-ê詞,tī希伯來文是「ben adam」,意思就是teh指「有人性ê人」。頭前lóng指巨獸、怪獸,m̄-koh chia用「人子」,表示一位來自天頂ê上帝所差遣ê,降臨來到,chit-ê受差遣者是「有人性ê」,kah hiah-ê怪獸、巨獸ê lóng無人性,完全是顛倒ê。所謂「有人性」,意思就是有上帝ê「形像」,而上帝ê「形像」乃是祂ê疼,並且是用疼來「管理」受造ê萬物。Chit-ê「人子」就是帶上帝ê疼來「管理」世間萬國。因為是teh代表上帝,因為án-ne chit位「人子」接受上帝所hō͘ in ê「權威、光榮kah王權」,就是為tio̍h beh hō͘世間萬國、萬民lóng服事伊。

如果koh再kā chia ê「人子」身上所有ê榮耀、權柄等對照以賽亞書第九章6到7節,以及第十一章1到9節等等先知ê詩歌,就會發現先知以賽亞所講ê是一位tùi上帝來ê拯救者,而但以理書則講tio̍h上帝beh針對hiah-ê tú-teh受苦難中ê人民講ê,mā仝款是談起有一位拯救者會來臨,chit位拯救者有上帝ê榮耀,mā會永遠統治tio̍h上帝ê子民。

重新查詢 專卷研經 但以理書系列
錯誤回報,請聯繫comm[@]fhl.net