但以理書 12章1節 到 12章13節   背景資料  上一筆
讀但以理書會發現chit本經冊中有真chē「異象」,tī chiah-ê「異象」ê背後,lóng有作者beh探討真chē ê社會問題,尤其是統治者對當時以色列人民逼ê事件,致使以色列人民生活tī非常痛苦中。但以理書ê作者用「異象」ê方式來鼓勵伊ê以色列同胞,ài in以勇敢、堅定ê信心仰望上帝ê救恩。伊深信上帝必定會為祂ê子民伸冤,受tio̍h逼ê上帝子民必定會得tio̍h拯救。Chit種信息對當時正Tī痛苦中ê以色列同胞來講,確實有真大ê鼓舞作用。

	但以理書ê作者teh kā伊講hit-ê主前第二世紀時代,tī希臘安提阿哥四世極盡殘酷ê統治之下m̄-thang放棄信仰,tio̍h相信上帝必定會審判。雖然有真chē以色列人放棄原有ê信仰,跟tòe安提阿哥四世ê命令去拜宙斯神明,mā有人開始放棄家己以色列人ê身分,kā家己徹底改變成做希臘公民,teh過kah希臘人仝款ê生活。但以理書ê作者beh鼓勵hiah-ê iáu未放棄信仰ê以色列同胞,m̄-thang放棄原有成做一位上帝選民ê榮耀。

第1到2節,chia講守護以色列民族ê是「天使長米迦勒」,伊beh出現tī in中間,注意chia用了一個真重要ê詞「hit時」,這是teh指上帝審判ê時刻。但以理書ê特色是,並m̄是由但以理扮演先知ê角色講出上帝beh懲罰ê時間,卻是由天使親自kā但以理講。Chia講會出現「立國以來siōng大ê災難」,可惜chia並無說明清楚到底是怎樣ê大災難,只有講這大災難ê情況乃是空前ê。有時災難是tùi上帝來ê懲罰,m̄-koh有koh khah chē ê災難乃是因為人類犯罪引起ê結果。Chia所指ê災難,乃是安提阿哥四世對猶太人迫害所帶來ê,m̄-koh上帝並無會袖手旁觀,hō͘ chit種災難無辜地延續落去,上帝必定會施行拯救。

Chia mā提起hiah-ê名「登記tī性命冊上ê,lóng會得tio̍h拯救」。聖經有kúi-nā個地方lóng提起有關性命冊ê事。親像:詩篇第六十九篇28節;腓立比書第四章3節;啟示錄第三章5節等等。以色列人民自古以來就有天使kah性命冊ê觀念,認為一個人出世了後,天頂就有一位專門負責看顧chit-ê人ê天使,會記錄落來伊所看顧ê chit-ê人ê言行舉止,來當做上帝審判ê根據。

Koh講,但以理書作者mā提起真重要ê一件事:真chē已故ê人會koh活。Koh活chit-ê概念tī舊約聖經中真少提起,除了chia,tī以賽亞書第廿六章14節mā有記載。作者認為hiah-ê tī性命冊上有名ê人m̄-nā是koh活,iáu會享受永恆ê性命,相對ê,tī性命冊上chhōe bē-tio̍h名ê人,kā永遠受盡侮辱。

第3節,chit節是為第2節ê享受永恆性命ê人進一步提起享受chit項福氣者,乃是「明智ê領袖」kah「教導gōa人秉公行義」ê人。所謂「明智ê人」,乃是對上帝永遠忠心,bē改變心志,即使tī siōng艱困ê時chūn,mā持守tio̍h上帝ê旨意者。Á「教導chē-chē人秉公行義」者,是teh指hiah-ê遵行上帝ê教示者,bē因為受tio̍h迫害就改變應該遵守ê規律。Chit兩種人lóng是作者所khah強調tī性命冊上留有名ê人。Chit種人,會像天頂ê星辰仝款,永遠發出光芒。

第4節,真清楚看tio̍h「世界ê末日」,而末日kah審判lóng是相連結ê。另外一方面,談起末日ê tāi-chì ê時,往往是非常奧秘ê,因為末日ê事並m̄是一般人ê智慧thang明白,ná乃是上帝beh施行審判ê作為,而上帝ài怎樣進行祂公義ê審判,人ê智慧無法度理解,因為án-ne,除非有上帝親自啟示,若無,無法度óa靠人ê知識明白。天使ài但以理kā「chit卷合起來,加上封印,一直到世界ê末日」,表示這是只有tī審判者同意下chiah ē-tàng看ê冊。

第5到6節,但以理tī chia koh「看見兩個人」出現tī河邊,中間有一個人問chit位kah但以理講話ê天使「tio̍h等jōa久chiah結束」chiah-ê奇異ê事。In所詢問ê,mā to̍h是大多數以色列人民一再詢問ê問題:甚麼時chūn,以色列人民thang建立家己ê國家?甚麼時chūn,上帝會收tńg來祂ê受氣,hō͘以色列人民家己治理,不koh受到外族人ê統治?

第7節,chit位天使真清楚講出時間是「三年半」,chit-ê數目mā是第七章25節出現第四隻怪獸所出現ê意義。Kah第八章13到14節所提供ê時間是一千一百五十工類似。

	第8到10節,但以理進一步詢問tī毀滅ê時間一到ê時,到底會有甚麼「結局」會出現?天使並無直接回答伊,而且iáu叮嚀伊不beh kā所看tio̍h、聽tio̍h ê事傳講出去,「tio̍h保密封閉到末日」。原因是tī第4節已經記載chiah-ê異象所beh表明ê信息已經加上「封印」,無koh啟開,除非ê時機已經來臨。天使並且清楚說明苦難iáu會繼續落去,仝款ê,邪惡ê人並無會罷手,in á是會繼續迫害上帝子民ê工作。M̄-koh真正有智慧ê人lóng會明白,「會領悟」上帝ê旨意kah奇妙ê作為。

	第11到12節,chia提起ê數目是「一千兩百九十工」,然後koh講「一千三百三十五天」。Chiah-ê數目上ê意義到底tī tó位?真oh明白。Tùi主前168年安提阿哥污辱聖殿開始,直到聖殿潔淨了後重新恢復敬拜,總共經過了一千兩百九十工。M̄-koh tī第12節ê一千三百三十五天是怎樣來ê,已經無法度查考。

	第13節,「hiah-ê忠心到底ê人」是有福氣ê人,án-ne chiah是但以理書作者寫chit本經冊ê主要目的,因為teh迫害ê日子,這mā是唯一ē-tàng講出ê一句看起來並無甚麼特別新鮮ê話,m̄-koh卻mā是siōng重要ê話。因為但以理「忠心到底」直到伊「安息」ê時chūn,án-ne伊「koh活」ê時chiah ē-tàng享受上帝ê「獎賞」。



重新查詢 專卷研經 但以理書系列
錯誤回報,請聯繫comm[@]fhl.net