但以理書 11章2節 到 11章20節   背景資料  上一筆  下一筆
Chit章開始真清晰地指出背景就是希臘帝國時代ê景況。事(tāi)先是說明tī安提阿哥三世ê時代背景。作者主要teh說明一件事:上帝必定會為祂ê子民伸冤,mā會審判欺壓祂子民ê仇敵,一定會拯救祂ê子民脫離被迫害而受苦難ê日子。
	
Kah其他ê先知文獻有一個仝款ê所在,就是作者一再努力beh hō͘以色列人知影,上帝會拯救以色列人。雖然統治者真有權勢,mā有夠額ê財力thang蓄養真chē精良ê部隊,m̄-koh chiah-ê lóng無法度抵擋上帝憤怒ê懲罰,因為上帝絕對bē hō͘伊ê子民永遠生活Tī痛苦ê境遇中,祂一定會伸出援手幫助祂ê子民脫離迫害者ê手。人siōng大ê毛病,lóng是將軍事武力當做siōng好ê武器,不時會用它來威脅、甚至是挾持伊邦異族ài in聽從順服,m̄-koh m̄-thang bē記得,真正力量m̄是tī chiah-ê,卻是tī上帝。類似chit種信息tī先知文獻中非常豐富,只要上帝出手,人即使有siōng精良ê科技武器mā是枉然(參考詩篇三十三:13—22)。

聖經ê作者hō͘咱一個明確ê指標:無論是一個人、民族á是國家,若beh期待上帝ê拯救,siōng基本ê前提就是beh tńg來到上帝ê面前,承認上帝就是咱性命ê主宰,chit種社會、民族、國家chiah有希望。

第十一章談起希臘帝國ê歷史,thang成兩個部分,其一就是第2到20節,主要teh說明安提阿哥三世ê興起kah沒落,以及第二部分tùi第21節到45節有關安提阿哥四世ê故事。

Chit段經文是記載希臘皇帝安提阿哥三世治理時代ê情形。

第2節,chit位天使講ài kā「真實」ê話kā但以理講。Chit-ê意思就是講:這是上帝beh天使轉達ê信息,虛假bē-tàng。天使是上帝ê僕人,bē-tàng違背上帝ê旨意亂講話。

Chit節講波斯以後iáu有「三個王beh統治,以後iáu有第四個王」。其實在歷史上並無所講ê第四個王國,tī波斯開國之王塞魯士統治了後,koh來就是「大流士」一世(Darius I)、「亞達薛西」(Artaxerxes)。若講有第四個王,真可能就是teh指「薛西一世」(Xerxes I)。Á chit位「薛西一世」大約是tī主前486到465年統治波斯帝國。Tī伊統治之下ê波斯帝國ē-sái講是個黃金時代,mā因為án-ne,hō͘伊興起beh攻打希臘帝國ê念頭。Tī主前480年伊真正興兵去出征,m̄-koh無想tio̍h會失敗。這就是此節所提起ê「伊beh向希臘國挑戰」。

第3到4節,「有一個勇猛ê王會出現」,這是teh指亞歷山大大帝,伊mā是希臘帝國ê開拓者,伊統治ê時間並無長,是tùi主前336年到323年,只有十三年時間,to̍h是因為破病而往生。伊往生ê時chūn,mā是正當伊ê統治大業達到「siōng高峰ê時chūn」。M̄-koh無人會料想ê到伊會tī chit-ê時chūn往生。Mā因為án-ne希臘帝國就「分裂」成四個部分,chit點tī第七章4到7節中有提起但以理看tio̍h一個異象,講有「四頭巨獸tùi海裡起來」,所指ê就是希臘帝國tī亞歷山大大帝了後分裂ê景況。因為亞歷山大大帝並無kiáⁿ「伊ê王國kā由別人統治」。

第5節,chia提起「埃及王」,是teh指多利買王(Ptolemy),伊控制埃及kah巴勒斯坦地區。M̄-koh有另外一位將領是控制巴比倫kah敘利亞地區,這就是西流古一世(Seleucs I)。In兩位原本是好朋友,因為西流古一世tī主前316年為tio̍h逃避敘利亞總督安提格奴(Antigonus)ê追殺而到埃及去避難,得tio̍h 多利買ê庇護,伊就效忠於多利買王。並且得tio̍h 多利買王ê支持,出兵phah敗並刣死了安提格奴,而重新控制了敘利亞,mā成做希臘帝國tī亞歷山大大帝了後一位傑出ê領袖。

第6節,主前250年,多利買二世想利用家己ê cha-bó͘-kiáⁿ貝尼絲(Berenice)當做籌碼嫁hō͘安提阿哥二世,並且附上真chē真貴ê陪嫁品,藉機想beh擴張領土版圖,而條件是安提阿哥二世一定tio̍h kah原配夫人拉歐迪絲(Laodice)離婚,而且iáu koh khah廢除拉歐迪絲kah伊生ê gín-á王儲ê地位。為tio̍h chit件事,拉歐迪絲非常憤怒,伊串連效忠於伊ê將領一直teh chhōe機會報復。

當多利買二世tú-teh陶醉家己ê策略成功ê時,四年後忽然往生。就tī伊往生了後,貝尼絲因為tī婚姻生活上並無hō͘安提阿哥二世感覺滿意,就án-ne安提阿哥二世趁此機會kā貝尼絲hō͘廢掉,然後koh一pái kā原配夫人拉歐迪絲chhōa tńg來王宮。伊一入宮就進行報復行動,kā貝尼絲kah伊kah安提阿哥二世所生ê gín-á刣死,mā刣死貝尼絲ê tùi僕,並且設法毒死伊ê丈夫安提阿哥二世洩恨。

第7到8節,貝尼絲ê兄哥繼承老父ê王位,kā它稱做多利買三世。伊bat利用安提阿哥二世宮廷內chit種家族鬥爭ê時,趁機會出兵替家己ê小妹報復。沿途路過殺戮真chē,攻落ê城市bē少。Kā chiah-ê城市ê「神像kah神殿裡ê金器銀器lóng帶tńg來埃及」,豐富了埃及ê國庫「過了幾年ê太平日子」。

第9節,「敘利亞王」安提阿哥三世繼承王位了後,真想重振國勢,造成埃及極大ê威脅。

第10到12節,「敘利亞ê眾王子」中ê「一個王子」,指ê就是安提阿哥三世(Antiochus ṲI, 223〜187 BC),真想beh koh再攻打埃及,因為án-ne積極準備,除了招募傭兵之外,mā囤積真chē糧食。然後tī主前219年對埃及作戰,作者講伊ê軍隊勢如破竹般ê勇猛,kā埃及ê軍隊phah得落花流水,mā奪回了原本失去ê巴勒斯坦大片土地。M̄-koh卻tī主前217年,koh一pái攻打埃及軍隊tī 拉飛爾(Raphia)ê時,卻被埃及國王多利買四世phah敗。Mā因為chit pái埃及戰勝,hō͘埃及軍隊俘虜獲真chē軍隊、戰利品,kah收tńg來失土。可惜伊並無趁勝追擊,hō͘安提阿哥三世有機會養精蓄銳,koh一pái整軍備武等待機會beh倒拋。

    第13到16節,chit段經文koh一pái描寫埃及kah敘利亞之間ê戰役,chia講安提阿哥三世經過了長到十四年ê準備,伊徵集koh khah chē ê軍隊beh攻打埃及。就tī主前205年,埃及王多利買四世往生王位由只有五歲大ê 多利買五世繼承,伊根本無法度料理國事,只有ē-tàng由別人來攝政輔佐。安提阿哥三世認為機會難得,就tī主前203年,聯合馬其頓王飛利普ê軍隊,kah埃及ê軍隊開戰,雙方軍隊tī巴尼亞斯(Paneas)交鋒。Á猶太人中間,有人為tio̍h個人ê利益,支持並贊助了安提阿哥三世攻打埃及。安提阿哥三世此舉m̄-nā kā埃及ê軍隊逼退,mā收復了kui個巴勒斯坦地區。M̄-koh原本參與協助安提阿哥三世對抗埃及ê hiah-ê猶太人認為會為家己ê同胞á是家鄉帶來安穩、自治ê機會,可惜事kah願望相違背,因為tī第16節真清楚寫出,安提阿哥三世帶hō͘巴勒斯坦ê,竟然是「橫行無忌,無人ē-tàng抵抗」,安提阿哥三世並無感謝猶太人支持伊,反tńg虐待khiā起tī巴勒斯坦ê猶太人。

第17到19節,敘利亞安提阿哥三世雖然伊phah敗埃及ê軍隊,mā佔領了巴勒斯坦地區,m̄-koh繼續擴張國家版圖ê心願卻從來無一絲á減少。主前197年安提阿哥三世kā家己ê cha-bó͘-kiáⁿ克麗帕狄雅(Cleopatra)嫁hō͘埃及王多利買五世。M̄-koh伊ê cha-bó͘-kiáⁿ竟然慫恿家己ê丈夫多利買五世kah羅馬聯盟共同抵抗家己ê祖國敘利亞。這就是第17節所提起ê,安提阿哥三世ê計劃「對伊無好處」ê原因。雖然án-ne,安提阿哥三世á是積極地前後tī主前196年到192年間攻落一kóa城鎮,同時佔領了馬其頓ê幾個地區。Chit種擴張版圖ê舉動當然會引起羅馬帝國kah臨近國家ê giâu疑。主前191年,馬其頓得tio̍h羅馬ê支援,tī特摩派里(Themopylae)phah敗安提阿哥三世ê軍隊。隔年,羅馬ê將軍西比歐(Lucius Cinosephale Scipio)koh率兵kah之對抗,安提阿哥三世ê軍隊慘敗,只好撤退tńg來敘利亞,m̄-koh mā付出極大ê代價,就是beh割地賠款。

第20節,chit-ê起來繼承安提阿哥三世ê王位者,就是伊ê kiáⁿ非羅巴達,mā就是所謂西流古四世(Seleucus IV Philiopator)。伊並m̄是一個聰明有智慧ê君王,可能因為受tio̍h老父一定tio̍h賠款hō͘羅馬帝國ê影響,因為án-ne伊只知影「欺壓人民,橫征暴斂,為tio̍h beh增加王國ê財富」。伊ē-sái講是一位昏庸ê統治者,根本就無算是甚麼治國理想kah遠見。Chit節講伊統治「無久伊就會hō͘刣」。這就是chit節所講ê伊「m̄是死tī戰爭」ê原因。


重新查詢 專卷研經 但以理書系列
錯誤回報,請聯繫comm[@]fhl.net