但以理書 1章1節 到 1章21節   背景資料  下一筆
Chit本但以理書ê作者雖然tī起頭就提起:「猶大王— 約雅敬坐位第三年,巴比倫王— 尼布甲尼撒來到耶路撒冷,圍城來攻擊(全民版)」(一:1)其實,有bē少聖經學者kā咱講,chit本經冊ê年代比較khah接近tī主前第二世紀,當時猶太人有一位優秀ê領袖名叫馬加比。作者可能就是採取小說文體,以古代替背景,講出當時社會ê景況是beh傳hō͘讀者ê信息。

Tùi kui本經冊就會看tio̍h作者寫chit本經冊ê主要目的,就是為tio̍h beh說明一件中心觀念:信仰一定tio̍h堅持,bē-tàng妥協。即使是tī siōng困難ê情況下,mā m̄-thang改變對上帝忠實ê心,因為上帝就tī咱ê身邊,祂kah咱同在。這就是但以理書ê中心信息。

Chit本經冊thang分做兩大部分,事(tāi)先是第一到六章,記載以但以理kah伊ê三個朋友受選進入巴比倫王宮ê故事,說明對上帝忠實ê人,tī性命siōng-kài困難ê時刻,上帝一定會伸手救助。續落來第二部分是第七到十二章,這是記載但以理所看見ê異象,透過但以理所看見ê異象,講出一個國家ê興衰,kah上帝ê旨意有密切關係。

Chit章mā是kui本但以理書ê序言,thang了解chit本經冊ê背景、人物,kah作者siōng關心ê信仰問題。作者tùi開始就敘述被掠到巴比倫做奴隸ê猶大人民怎樣tī異鄉tú-tio̍h信仰ê困境,透過但以理kah伊ê三個朋友來說明in堅持表達對上帝忠實ê信仰,因為án-ne,就算是tī siōng危險ê環境下,上帝絕對bē輕視,全能ê上帝一定會伸手救助。

第1到2節,開始就提起故事發生ê背景是tī「猶大王約雅敬在位ê第三年」,chit年應該是主前605年,m̄-koh伊做王並m̄是根據王族繼承ê方式得tio̍h ê,卻是南國猶大被埃及phah敗,埃及王尼哥立伊(原名以利亞敬)為猶大王,並且kā伊ê名改為約雅敬。M̄-koh若是tùi對照耶利米書第廿五章1節,以及耶利米書第四十六章2節ê記載來看,會發現koh khah正確ê時間應該是tī約雅敬做猶大王ê第四年,發生「巴倫王尼布甲尼撒進攻耶路撒冷,圍困都城」,並且kā約雅敬王「俘虜了」,同時搜刮了耶路撒冷聖殿kah王室所有ê貴重器物到巴比倫供奉in ê神。

第3到4節,chia提起巴比倫王尼布甲尼撒beh tùi俘虜來ê以色列人民中選出「一kóa王室kah貴族ê青年」,chiah-ê青年一定tio̍h是「無殘疾、iân-tâu、聰明、學識豐富、才智過人ê」進入宮廷去服務。Chia mā特別強調chiah-ê teh-beh選出來送入宮廷服務ê青年,lóng tio̍h教導in學習「巴比倫ê語言文字」,這含有一個特別意思,表示in lóng tio̍h學習天文、地理、占卜等chit方面ê學問,thang隨時幫助王室ê人解夢(參考但以理書二:2),以及處理一kóa疑難雜症。

第5到7節,chiah-ê被選入宮廷內服務ê菁英,thang每工「享用」宮廷ê「食物kah酒」,訓練時間是「三年」,然後「ài tī王面前供職」,表示in是hō͘選出來服侍巴比倫國王ê優秀青年,in lóng是「猶大支族ê人」,包括有「但以理、哈拿尼雅、米沙力、亞撒利雅」等四人,m̄-koh in進入王宮受訓ê時,太監總管亞施比拿「kā in賜福起了新ê名,叫伯提沙撒、沙得拉、米沙、亞伯尼歌」。Chit種改名有兩種意思;其一是in四個人lóng是屬tī國王尼布甲尼撒專用ê僕人,另外一種意思是teh指in四個人lóng會tī亞施比拿 ê教導下接受管理kah命令做tāi-chì。亞施比拿就kah-ná是in四個人ê「教父」仝款。

第8節,chit節是chit章ê中心經文,特別提起但以理「決心不沾王宮ê食物kah酒,免得家己tī禮儀上無清氣」。Chia所謂「禮儀上無清氣」ê食物,thang參考利未記第十一章ê記載。Koh講,另外一個可能是teh指祭拜過ê食物。Chit對被俘擄ê人來講,是非常困難ê一件事,但以理就先去chhōe伊ê教父亞比拿施,請求伊「幫助」。

第9到10節,chia講亞比拿施確實是真想幫助但以理,ē-sái講是萬一但以理tī lim食上照家己ê方式出了狀況,國王若是追究落來,一定會「phut了」伊ê頭當做懲罰。這真清楚teh表示亞比拿施是同情但以理,m̄-koh實際上有執行ê困難。

第11到13節,但以理並無放棄chit項堅持,伊去chhōe亞比拿施派來看管但以理kah另三位夥伴ê管家,但以理請求chit位管家hō͘伊「十工」ê時間「試看māi」,tī chit十工內,伊只食菜蔬kah lim白水,然後kā伊kah「hiah-ê食王食物ê少年人比一比」,然後chiah來決定是m̄是允准伊ê請求,m̄食「禮儀上無清氣ê食物」。

第14到16節,chit段經文已經teh暗示,有上帝幫助ê但以理等四個人,經過了「十工」了後,in比其他食王宮食物ê人「koh khah健康、koh khah強壯」。因為án-ne,chit位管理ê守衛,就hō͘但以理等人「繼續只食菜蔬,m̄食王所配給ê食物」。

第17節,chit節thang看出上帝tī背後幫助忠實tī祂ê人。幫助ê方式就是賜hō͘但以理等四個青年「精通各種文獻kah學問」,然後koh特別賞賜hō͘但以理有「解釋異象kah夢ê才能」,chit句話mā為以後但以理為國王解夢留落來一個伏筆。

第18到21節,chit段經文真清楚講出tī上帝賜福下,但以理等四個青年經過了三年ê訓練,結果確實是成做真有學問ê人,thang解答國王所提出ê「任何難題」,koh khah特別ê是「比全國任何占卜家á是術士好十倍」,tùi án-ne得tio̍h國王ê賞識,因為án-ne「chit四個人被選中留tī王宮服侍」。Chia講但以理一直留到巴比倫帝國被波斯帝國取代ê時chūn。Á波斯帝國取代了巴比倫帝國時間是tī主前538年。

Án-ne,tùi但以理受掠時代ê主前598年到現今波斯帝國取代巴比倫ê主前538年相距有六十年之久。Koh加上伊被徵召入宮ê時已經成年,若是以二十歲計算,án-ne,伊現在年齡至少mā有八十歲了。Á如果按照第一章1到3節ê記載,這是發生tī主前605年ê戰役失敗被俘虜ê,但以理應該至少beh九十歲à。Tùi chia thang知影:作者是採用一個古老英雄ê故事,beh鼓勵伊hit時代ê讀者學習但以理chit種少年人。

重新查詢 專卷研經 但以理書系列
錯誤回報,請聯繫comm[@]fhl.net