阿摩司書 2章1節 到 2章16節   背景資料  上一筆  下一筆
Chit章除了繼續提起摩押人kah猶大人民外,siōng重要是提起有關北國以色列人民ê問題。因為先知阿摩司hō͘上帝呼召,主要ê對象就是針對北國以色列,in kah頭前所提起ê附近族群lóng仝款「koh再三犯罪」,甚至真chē舉止lóng是表明in ê心中根本to̍h無上帝。因為án-ne,上帝絕對bē袖手旁觀,一定會懲罰in。

    第1到3節,chit段經文談起「摩押」chit-ê族群ê問題。

    摩押人mā是以色列人ê親族,是羅得ê kiáⁿ孫。以色列人民進入曠野後,就不時kah摩押人有衝突(參考民數記第廿一到廿五章)。Chia講摩押人「Kā以東國王ê屍骨燒成火灰」,意思是teh指in對以東人ê嚴密追殺是到連死者ê墳墓lóng無放過。用現代人ê講法,是teh指「鞭屍」。這m̄-nā是件真缺德ê事,tī當時ê人看起來,遇tio̍h án-ne境遇ê死者,kā永遠bē得安寧。因為摩押人chit種行踏hō͘上帝看做是非常惡質,因為án-ne先知阿摩司傳出上帝受氣ê話語mā特別ê重,伊講「摩押ê首領」iáu有「官長」lóng kā tī戰爭中被刣死,這kah亞捫人ê落場仝款。

    「加略」,這可能是摩押人ê一個重要城鎮(參考耶利米書四十八:24),mā有可能tī阿摩司時代是摩押ê首都,因為án-ne chia講上帝beh摧毀「加略ê宮殿」。Á上帝懲罰in ê方式是hō͘「摩押人一定tī戰場上死亡」。

    第4到5節,chit段經文是關係南國「猶大」,而這mā是先知阿摩司家己ê國家。上帝beh懲罰猶大ê主要原因是in背叛了上帝。Chia清楚講tio̍h猶大會hō͘上帝懲罰,是因為in「棄絕」上帝ê「律法」,「m̄遵守」上帝ê「誡命」,寫phoe去奉「假神」,致使「離開正道」。Chiah-ê所謂「律法」、「誡命」,lóng含有kah上帝「立約」ê意義。因為án-ne,chia講「棄絕我ê律法,m̄遵守我ê誡命」,意思是teh指猶大人民bē記得kah上帝之間所立ê「約」。Bē記得上帝ê「約」,siōng具體ê表現就是去拜虛假ê偶像神明。Kui個先知運動中,就是以chit-ê做主題,向以色列人民提出警告,ài in tńg來到上帝ê面前,承認耶和華上帝就是in惟一ê主,in是上帝ê子民,這mā是以色列人民kah上帝立約ê基礎(參考利未記廿六:12,耶利米書三十:22,卅一:1,何西阿書二:23)。

    Tùi頂面所講thang看tio̍h上帝懲罰ê方式,lóng是用「火燒」、「摧毀」。表示chiah-ê族群、人民,包括領導者在內,lóng無法度佳哉免得,無任何人ē-tàng逃離。過去in俘虜別人來做奴隸,現家己變成奴隸beh去服侍別人。

    Tùi第6節開始,以後chit本阿摩司書lóng是談起北國以色列ê問題。

    第6到8節,chia提起ê「以色列人」,指ê是北國以色列人民。先知阿摩司tī chia提起以色列人民所犯嚴重ê問題:

    一、in苛待sàn-chhiah人,kā sàn-chhiah人變賣做奴隸,chit種作為是真違反摩西律法ê教示。舊約聖經利未記第廿五章39到42節講,sàn-chhiah人thang kā家己á是家己ê子女賣做奴隸,m̄-koh到à禧年,mā就是第七年,beh hō͘ chiah-ê人kah伊ê kiáⁿ離開,tńg來到家己ê家族,到伊祖先ê土地去。M̄-koh chia卻講in對待「老實」ê sàn-chhiah人是為tio̍h錢,竟然kā hiah-ê已經窮得無錢ê困苦人,用「一雙涼鞋ê價錢」賣做奴隸,做出án-ne殘忍ê事,這是上帝所無法度允准ê事。

    二、tī信仰上犯姦淫ê行為,這是上帝所無法度接受ê事。Chia提起ê「神廟娼妓」,是teh指迦南地ê廟宇裡有妓女,kah來參加慶典á是平時祭祀ê人苟合。因為án-ne這可能指ê是:以色列人民tī迦南地ê敬拜行為中,mā已經溶入了迦南地人民ê淫亂行為,kā娼妓引進敬拜ê禮儀裡,chit種行為tī摩西ê律法中是嚴厲禁止ê(參考申命記廿三:17)。

    三、chiah-ê有錢人是kā sàn-chhiah人所抵押借錢ê衫褲the̍h去祭壇邊,提供給參與祭典者歡樂ê時踩踏ê路用。而且the̍h剝削sàn-chhiah人所得tio̍h ê錢去敬拜上帝ê所在lim酒作樂。Chit種行為真清楚說明一件事:以色列人民ê心中已經無上帝了,in bē記得上帝ê救恩,mā bē記得in bat tī埃及受苦ê日子。

    第9到10節,「亞摩利人」,這是teh指迦南地ê族群。In ê體型高大、強壯,所以形容in是ná親像「香柏樹」、「橡樹」,m̄-koh上帝照樣徹底摧毀in。當上帝kā以色列人民tùi埃及領出來,Tī曠野中帶領了in經過四十年時間,然後kā迦南地人ê土地「賜hō͘」in khiā起。簡單ê幾句話,講出上帝帶領以色列人離開埃及到曠野,直到進入迦南地。

    第11到12節,chit兩節是對照句;第11節講上帝為tio̍h beh帶領以色列人民行正確ê道路,tùi in中間「揀選先知」,mā訓練青年人,hō͘ in成做「離俗人」。所謂「離俗」,意思是「分別為聖」(參考民數記六:1—21)。M̄-koh第12節講以色列人民卻是強迫chiah-ê下願當「離俗人」ê青年lim酒。換句話講,家己墮落無啥要緊,iáu koh khah強迫chiah-ê有心beh改革社會ê青年棄sak上帝。Á koh khah無法度原諒ê是,以色列人民卻一再設法beh阻止眾先知講話。Án-ne chiah是kui個以色列社會敗壞ê主要因素,因為無先知ê話,社會必定會亂甚至滅亡,這to̍h是阿摩司書siōng重要ê信息。

    第13到16節,上帝清楚表明beh處罰以色列人民,無任何一個人ē-tàng逃離上帝審判ê手,即使是「賽跑健kā」、「走得siōng快ê戰士」、「siōng勇敢ê戰士」、「軍人」等lóng仝款,只有ē-tàng「倉皇逃命」。先知阿摩司描述北國以色列ê遭遇tú親像一台「滿裝五穀ê車」碾過路ê時chūn,發出「咯吱咯吱做響」ê哀號聲,表示痛苦難當。

重新查詢 專卷研經 阿摩司書系列
錯誤回報,請聯繫comm[@]fhl.net