使徒行傳 27章1節 到 27章12節   背景資料  上一筆  下一筆
第廿七到廿八章lóng是teh記述有關使徒保羅被押解到羅馬去ê海上行程經過,kui個旅程thang講「旅途非常艱辛」。雖然押解使徒保羅kah其他囚犯到羅馬chit chōa旅程開始就不真順利,m̄-koh tī he樣艱辛ê旅程中,卻thang看tio̍h上帝ê靈所賜ê平安透過使徒保羅降臨到所有kah伊同船ê人身上。這mā是基督教信仰所beh表明ê:即使tī siōng苦難中間,mā有上帝同在、保守ê恩典。

第1節開始就用「阮」chit-ê詞,是tùi第廿一章17節後面koh一pái出現,tùi第2節thang看tio̍h kah使徒保羅同行ê有亞里達古kah作者路加。亞里達古就是tī以弗所暴亂中被民眾掠去官府ê hit位(參考十九:29)。Teh護送使徒保羅前往耶路撒冷ê人員中,伊mā是成員之一(參考二十:4),chit-má是陪伴使徒保羅上羅馬皇帝ê法庭,可見伊是一個真bē-bái ê同工。

第3到6節,這艘載運使徒保羅kah其他囚犯前往羅馬ê船頂,有一位羅馬軍官名叫猶流,伊「寬待保羅」,這可能是因為使徒保羅有羅馬公民身分,koh講,知影伊並m̄是有甚麼罪,卻是因為宗教信仰ê問題,若m̄是主動beh上訴羅馬皇帝法庭,伊早就被tháu放。

第4節提起in「tú-tio̍h逆風」,因為án-ne,猶流決定換船去意大利。

第9到12節,chia講「已經過禁食ê節期,無適合繼續航行」。所謂「禁食節」,是teh指贖罪日,hit工應該是主後59年10月5日。Chia講「已經過」,真可能是已經延誤了大約兩、三個禮拜。如果繼續航行,必定會tú-tio̍h東北季風ê吹襲。使徒保羅顯然知影koh來就無適合航行,因為án-ne,伊提出建議,m̄-koh,伊ê建議無得tio̍h回應。因為猶流相信船長,不接受使徒保羅ê意見。

重新查詢 專卷研經 使徒行傳系列
錯誤回報,請聯繫comm[@]fhl.net