使徒行傳 2章14節 到 2章42節   背景資料  上一筆  下一筆
Chit段經文thang講是眾使徒siōng早ê見證詞。

第14到16節,「彼得kah其他十一個使徒khiā起來」見證講,in並無lim酒,因為hit時chiah上午九點鐘。

第17到21節,這十二個使徒引用約珥書第二章28到32節。先知約珥對tùi巴比倫奴隸之地tńg來到耶路撒冷ê猶太人所講,指上帝kā重建in,hō͘猶太人有新ê性命力。眾使徒kā chit種話用來勉勵早期ê信徒,mā是teh表示因為信靠koh活ê耶穌,會hō͘人ê性命重建起來。因為上帝差遣耶穌來到世間,就是beh重建猶太人,成做新ê選民。Á相信耶穌ê人就是耶穌beh拯救ê對象,hō͘伊成做新ê子民。其實,使徒用chit種方式teh宣講,mā有一個重要ê用意:beh hō͘猶太人知影耶穌就是先知預言beh來臨koh是in期待已久ê拯救者。

第21節,原本約珥是「呼求上主ê名」,chit-má使徒kā它改成做「呼求主名」,意思指只要向耶穌呼求,就會得tio̍h救恩。

第22到28節,這是眾使徒見證ê第二部分。Tī chit段宣告中,眾使徒真清楚kā耶穌傳「上帝國度」ê信息,kah伊死tī十字架上ê信息連結做伙。換句話講,tio̍h傳揚耶穌,就tio̍h tùi伊死tī十字架上ê事開始。Á十字架是teh代表性命ê苦難,m̄-koh卻hō͘人看tio̍h上帝ê救恩。

第25到28節ê chit段詩歌,是引用詩篇第十六篇8到11節。Chit段詩篇通常hō͘人認為是大衛王tī預言拯救者to̍h是teh beh來臨ê詩歌。主要teh說明,一般人所經歷ê性命之死,耶穌mā有。M̄-koh耶穌並無死後停留tī陰間,伊ê身軀m̄-nā無腐爛,卻是成做得救ê通道,hō͘新ê性命得tio̍h喜樂。

第29到35節,這是第三段見證。Chia眾使徒特別強調一個敏感ê問題,就是猶太人siōng喜愛、尊崇ê大衛王,伊就算真偉大mā是死去,而且埋葬。相對tī耶穌,m̄-nā無死,而且是有koh活。這是「上帝已經hō͘伊有koh活」,chiah-ê使徒就是為耶穌koh活ê事做見證ê人。

第30節,是引用詩篇第一三二篇11到12節、17到18節,另外mā thang參考以賽亞書第十一章1節等等。

耶穌m̄-nā有koh活,伊是升天到上帝ê正pêng,tī hia領受聖神ê氣力。Á chit-má眾使徒就是因為耶穌ê聖神充滿而講話。

第34到36節,chia ê詩歌是引用詩篇第一一0篇1節,說明大衛mā尊稱chit位拯救者就是伊ê「主」。Á chit位「主」就是耶穌,祂有koh活。

第37到39節,chit段經文mā成做今á日教會勸人悔改ê內容。彼得ài大家「悔改,並且tio̍h奉耶穌基督ê名受洗」,thang hō͘「罪得tio̍h赦免」,án-ne就會領受聖神。換句話講,有悔改認罪ê人,透過洗禮會得tio̍h上帝hō͘ in性命ê氣力,這是上帝所應允beh賞賜ê恩典。

第40到42節,大家lóng深受感動,因為án-ne,一下á受洗ê人就有「三千人」,chiah-ê人m̄-nā受洗,而且「專心向使徒領教,參加團契生活,分享愛筵,同齊祈禱」,早期教會就án-ne開始有雛形,信徒增加長ê速度ē-sái講是非常ê快。


重新查詢 專卷研經 使徒行傳系列
錯誤回報,請聯繫comm[@]fhl.net