為tio̍h m̄ hō͘使徒保羅kah西拉發生意外，帖撒羅尼迦ê信徒趕緊kā in兩人利用半暝送去「庇哩亞」。Á in iáu-koh kah過去仝款，每到一個城市，就會先chhōe猶太人會堂去見證福音ê信息。

第11節，chit節講庇哩亞人「比帖撒羅尼迦人開明」，chit句話講出作者路加tī觀察信徒ê事有特殊ê眼光。伊特別提起庇哩亞人m̄-nā聽使徒保羅傳講信息，koh khah可愛ê所在是「in熱心注意聽信息，每工查考聖經，beh知影保羅所講ê是m̄是真實。」

第12節，chit節特別強調福音ê信息tī外面邦地區反tńg真有成果，有社會領袖階層ê人mā加入了基督信仰ê行列，chit對後來使徒保羅進入雅典、羅馬傳福音有真大ê鼓勵作用。

第13到15節，仝款ê，有人加入，mā有tùi帖撒羅尼迦來ê猶太人鬧場，因為án-ne，當地ê信徒留落來西拉kah提摩太，然後護送使徒保羅獨自一人去雅典。