使徒行傳 1章12節 到 1章26節   背景資料  上一筆  下一筆
Chit段經文有兩個重要ê主題,其一是關係猶大ê死。其二是關係遞補門徒猶大死後留落來ê缺。

猶大ê死,tī早期ê教會流傳tio̍h兩種講法,一種是馬太福音第廿七章3到10節記載ê,講猶大後來吊tāu自殺à。另外一種就是作者路加所收集ê版本,猶大是墜死。雖然詳細內容無仝,m̄-koh有一點是仝款ê,he就是猶大出賣耶穌並無得tio̍h伊想得tio̍h ê,無論是錢mā好,á是所講ê有「政治企圖心」mā好,換句話講,人想beh用家己ê方式改變上帝ê計畫,he是真愚戇ê想法。

另外一個主題是關係揀選另外一個人遞補猶大,這kah早期教會ê發展有關。使徒團iáu是希望維持「十二」chit-ê人數,mā可能是kah猶太人ê十二支派之傳統有關。彼得訂出遞補ê條件是:「Chit-ê人一定tio̍h是當主耶穌tī咱中間出入ê時──tùi約翰行洗禮開始到耶穌被接升天為止hit段期間──頭尾kah咱做伙ê人。」

當時符合chit-ê條件ê人bē少,因為跟tòe耶穌ê人真chē,m̄-koh,耶穌只tùi chiah-ê人中間揀選出十二名做門徒。M̄-koh chiah-ê跟隨者並無因為無被選上就脫隊了,無,in iáu是跟tòe耶穌到耶路撒冷,而且親目chiu金金看見伊受難、koh活。Chit種心境是真重要ê。

第23到26節,in tùi眾人中間「推選兩個人,就是約瑟kah馬提亞」。經過祈禱了後,用「抽籤」方式,「抽出馬提亞來」,án-ne,koh變成「十二個使徒」à。


重新查詢 專卷研經 使徒行傳系列
錯誤回報,請聯繫comm[@]fhl.net